રમઝાન માસ ચાલી રહ્યો હોવાથી પોલીસ વધુ સતર્ક
ખાસ-ખબર ન્યૂઝ અમદાવાદ
અમદાવાદ શહેરના પોલીસ કમિશનર જ્ઞાનેન્દ્ર સિંઘ મલિક, સંયુક્ત પોલીસ કમિશનર જયપાલ સિંહ રાઠોડ તથા નાયબ પોલીસ કમિશ્નર ઝોન 06 શ્રી રવિ મોહન સૈની દ્વારા હાલમાં ચાલી રહેલ રમઝાન માસ દરમિયાન હિન્દુ મુસ્લિમ બંને કોમ વચ્ચે સદભાવના બની રહે તેમજ બંને કોમ વચ્ચે સોશિયલ મીડિયા દ્વારા વૈમનસ્ય ફેલાવતા લોકો ઉપર નજર રાખી, અમદાવાદ શહેરની શાંતિને ડહોળતા તત્વોને ઝેર કરવા કાર્યવાહી કરવા તમામ પોલીસ અમલદારોને સૂચના કરવામાં આવેલ છે. અમદાવાદ શહેરના વટવા પોલીસ સ્ટેશનની હદમાં ચુનારા વાસમાં અમન સાજા, અજજુ કાણિયાને અમિત ચુનારા તથા સુનિલ ચુનારા સાથે થયેલ અંગત અદાવતમાં સામાન્ય મારામારીનો બનાવ બનેલ અને જે સંબંધે વટવા પોલીસ સ્ટેશન ખાતે ગુન્હો નોંધી, આરોપીઓને પકડી પાડી તેમજ બંને પક્ષે અટકાયતી પગલાંની કાર્યવાહી પણ કરવામાં આવેલ હતી.
- Advertisement -
આ બાબતે વટવા પોલીસ સ્ટેશનના પીઆઈ દ્વારા બનાવની વિપરીત રજૂઆત કરતું ઇન્ટરવ્યુ પોતાની જાતે બનાવી, બે કોમ વચ્ચે વૈમનસ્ય ફેલાય અને અમદાવાદ શહેરની શાંતિ ડહોળાય, એ હેતુથી મૂકનાર મહેંદી હુસૈન મહેમુદુલ સૈયદ વિરુદ્ધ સરકાર તરફે ફરિયાદી બની, ગુન્હો દાખલ કરવામાં આવતા, અમદાવાદ શહેરના જે ડિવિઝન એસીપી પ્રદીપસિંહ જાડેજાનાં માર્ગદર્શન હેઠળ વટવા પોલીસ સ્ટેશનના પીઆઈ પી.બી.ઝાલા, પીએસઆઈ અશ્વિન ગંધા તથા સ્ટાફના હે.કો. જગદીશસિંહ, યુવરાજસિંહ, સહિતની ટીમ દ્વારા વટવા ખાતે ચુનારા વાસ વિસ્તારમાં રહેતા મહેંદી હુસૈન મહેમુદુલ સૈયદ ઉવ. 21 રહે. વટવા, અમદાવાદની તત્કાલિક ધરપકડ કરવામાં આવી છે. પકડાયેલ આરોપી મહેંદી હુસૈન સૈયદ સોશિયલ મીડિયામાં રીલ બનાવવાનો શોખીન છે અને ભૂતકાળમાં તેના પિતા દ્વારા પણ આરોપી રીલ બનાવવામાં વ્યસ્ત રહેતો હોવાની તથા કોઈ કામધંધો નહીં કરતો હોવાની રજૂઆત કરેલાનું પણ તપાસ દરમિયાન ધ્યાને આવેલ છે. બે કોમ વચ્ચે વૈમનસ્ય ફેલાવતા સોશિયલ મીડિયામાં રીલ મૂકતા લોકો ઉપર પોલીસની નજર ચાલુ જ રાખવામાં આવી રહી છે અને કોઈ વ્યક્તિ દ્વારા આવી રીલ મૂકવામાં આવશે, તો પોલીસ કાર્યવાહી કરવામાં આવશે, એવું પોલીસની એક યાદીમાં જણાવવામાં આવેલ છે.
