ગુજરાત પ્રદૂષણ નિયંત્રણ બોર્ડમાં ફરિયાદ કરવા નિર્ણય કરતાં ગ્રામજનો
ખાસ-ખબર સંવાદદાતા
ખીજડીયાની જમીનમાં સ્થપાયેલી ફૂલેત્રા સ્ટીલ પ્રોજેક્ટ ચાલુ થતાં જ પ્રદૂષણની માત્રા કણકોટના લોકોને જોવા મળી હતી અને કણકોટના જાગૃત લોકો દ્વારા 3 જાન્યુઆરીના દિવસે કણકોટ ગામના ચોકમાં એક મીટીંગનું આયોજન કરવામાં આવ્યું હતું, જેમાં આજુબાજુના સરપંચ અને ગ્રામ લોકોએ હાજરી આપી હતી. આ મિટિંગમાં ઉસ્માનગની શેરસિયા દ્વારા ફૂલેત્રા સ્ટીલ પ્રોજેક્ટ દ્વારા ભવિષ્યમાં શું નુકશાન થશે તેની વિગતવાર માહિતી આપવામાં આવી હતી અને આવા પ્રોજેક્ટ કે જર્મન સ્ટીલ, ઈ. ટી. સ્ટીલ, એસ્સાર સ્ટીલ, ગેલેન્ટ સ્ટીલ, નેશનલ સ્ટીલ, કામઘેનુ સ્ટીલ બનાવતી કંપની અને તેની નજીકના ખેડૂતોને થયેલ નુકશાન વિશે સમજ આપી હતી. આવા પ્રોજેક્ટના કારણે આજુબાજુની વિસ્તારની જમીનો ચરિયાણ માટે પણ યોગ્ય રહેશે નહિ. આવા પ્રોજેક્ટો દ્વારા જે રીતે કોલસો વપરાશ કરવામાં આવે છે પણ તેને મળેલ પર્યાવરણીય મંજૂરીના નિયમોનું પાલન કરતાં નથી જેના કારણે આજુબાજુના વિસ્તારમાં કોલસાની ભૂકી ખેતીના પાકને નુકશાન કરશે અને આજુબાજુના લોકોના શ્ર્વાસમાં કોલસાની ભૂકી જશે તો ફેફસાના રોગોમાં વધારો થશે અને આ કોલસાની ભૂકી ચરિયાણ જમીનમાં પથરાશે અને તે કોલસાની ભૂકીવાળું ઘાસ પશુઓ ખાશે તો તેના આરોગ્ય પર પણ ખતરો ઉભો થશે, બીજા પણ ઘણા ઉદાહરણ સાથે ઘણી બધી માહિતી આપી હતી. આ મીટીંગમાં નક્કી કરવામાં આવ્યું છે કે તેને પંચાયત દ્વારા ગ્રામસભા ભરીને ઠરાવ કરીને નોટિસ આપવી અને કંપની દ્વારા કણકોટ ગામના ગૌચર પણ દબાણ કર્યું છે તેને પંચાયત ધારાની કલમ 105 મુજબ નોટિસ આપીને તોડી પાડવું અને ગુજરાત પ્રદુષણ નિયંત્રણ બોર્ડમાં એક ફરિયાદ થયેલ હતી અને બીજી ફરિયાદ કરવી જેવા નિર્ણયો લેવામાં આવ્યા હતા. ગુજરાત પ્રદુષણ નિયંત્રણ બોર્ડના બે અધિકારીઓ દ્વારા ગઈકાલે કણકોટ આવીને આજુબાજુના ખેડૂતોના કોથમી, રીંગણી, તુવેર, કપાસ, દૂધી, મરચાં જેવા ખેતીના પાકનું નિરીક્ષણ કરવામાં આવ્યું હતું અને ફોટો લેવામાં આવ્યા હતા, તેમજ ખેડૂતોએ બનાવેલ ખુલ્લી પાણીની કુંડી અને ટાંકાનું નિરીક્ષણ કરવામાં આવતા તેમાં કોલસાની ભૂકી જોવા મળેલ હતી અને ગામની માધ્યમિક સ્કૂલની પણ મુલાકાત લીધી હતી.
