ખાણ ખનીજ ખાતાની તપાસ દરમિયાન જમીનમાલિકનો વિરોધ, સરકારી ફરજમાં રૂકાવટ બદલ FIR
જંગલ ખાતાની પરમિશનનો ઢાળ લઈ દરિયાકાંઠેથી રેતી ચોરીના ગોરખધંધાનો પર્દાફાશ – તપાસ સમયે જમીનમાલિકે મશીનરી ખસેડવા ઇન્કાર કર્યો, સરકારી ફરજમાં રૂકાવટ બદલ ફરિયાદ નોંધાઈ
- Advertisement -
ખાસ-ખબર ન્યૂઝ પોરબંદર, તા.9
પોરબંદરના કાંટેલા ગામે દરિયાકાંઠાના વિસ્તારમાં જંગલ ખાતાની મંજૂરીથી ગાંડા બાવળ કાપવાનું કામ ચાલી રહ્યું હોવાનું બતાવી રેતીની બેધડક ચોરી કરવામાં આવતી હોવાનો ચોંકાવનારો ખુલાસો થયો છે. ખાણ ખનીજ વિભાગના દરોડા દરમ્યાન કામગીરીમાં રૂકાવટ કરનાર જમીનમાલિક સંજય દવે (જોશી) સામે હવે પોલીસ ફરિયાદ નોંધાઈ છે.
તાલાલાના ગુંદરણ ગામના અને હાલ પોરબંદર ખાણ ખનીજ કચેરીમાં રોયલ્ટી ઇન્સ્પેક્ટર તરીકે ફરજ બજાવતા અંકુર જગદીશ ભાદરકાની ફરિયાદ મુજબ, તા. 26મી મેના રોજ તેઓ, રોયલ્ટી ઇન્સ્પેક્ટર રાજ પરમાર અને સિક્યુરિટી ગાર્ડ દિનેશ સાદિયા સાથે મળીને કાંટેલા ગામે દરિયાકાંઠે તપાસ કરવા ગયા હતા. ત્યાં તપાસ દરમિયાન એક ટ્રકમાં અંદાજે 10 મેટ્રીક ટન દરિયાઈ ખારી રેતી ભરી જોવા મળી હતી. નજીકમાં વધુ છ ટ્રક અને એક ઉંઈઇ મશીન પણ હાજર હતા. જ્યારે સ્થળ પર હાજર ડ્રાઈવર અને મશીનરીના માલિકોએ ખાત્રીપૂર્વક જણાવ્યું હતું કે ખોદકામની મંજૂરી મેળવી છે અને જમીન સંજય દવેની માલિકીની છે. ખાણ ખનીજ ખાતાની વધુ પુછપરછ દરમિયાન સંજય દવે (જોશી) સ્થળ પર પહોંચ્યા અને તપાસ અટકાવવાનો પ્રયાસ કર્યો. સંજય દવે દ્વારા એ જણાવ્યું કે તેઓ ખેત સુધારણા માટે જમીનમાંથી માટી ખનન કરી રહ્યા છે, પણ સ્થળ પર માટીનો જથ્થો જોવા મળ્યો નહીં. બાદમાં દવે એ દલીલ આપી કે તેમને વન વિભાગ પાસેથી ગાંડા બાવળ કાપવાની પરમિશન છે. તેથી રોયલ્ટી વિભાગે શંકાસ્પદ રીતે ચાલતી રેતી ચોરી અટકાવવાનું નક્કી કરતાં સંજય દવે એ તેમના માલિકી હક્કની દલીલ આપી મશીનરી સીઝ કરવા દેવા માટે સ્પષ્ટ ઈન્કાર કર્યો. આખરે તા. 27મી મેના રોજ ફરીથી ટીમ સ્થળે પહોંચી ત્યારે તમામ મશીનરી યથાવત મળી આવી. ત્યારબાદ ભુસ્તરશાસ્ત્રી કિરણ પરમાર દ્વારા નિયમસર મશીનરી સીઝ કરવાની કાર્યવાહી હાથ ધરવા જતા સંજય દવે એ ફરી વિરોધ નોંધાવ્યો. અંતે સરકારી અધિકારીઓની ફરજમાં રૂકાવટ કરવા બદલ સંજય દવે સામે કાયદેસર પગલા લેવામાં આવ્યા છે અને મિયાણી મરીન પોલીસ સ્ટેશનમાં ગુનો નોંધાયો છે. જેની વધુ તપાસ મિયાણી મરીન પી.આઈ એમ.ડી.વાળાએ શરૂ કરી છે.
