લોકોને બીજા લગ્નમાં વધુ રસ: 29 વર્ષની ઉંમરે શરૂ થાય છે જીવનસાથીની શોધ

જીવનસાથી મેટ્રિમોનિયલ પ્લેટફોર્મના રિપોર્ટ અનુસાર

પહેલાં કરિયર-નોકરી પછી લગ્નને મહત્વ, આર્થિક મજબૂતી અને પરસ્પર સમજણને પ્રાથમિકતા

બીજા લગ્નમાં 43% વધારો, જાતિ કરતાં સ્વભાવને વધુ મહત્વ

ખાસ-ખબર ન્યૂઝ નવી દિલ્હી

ભારતમાં લગ્ન હવે માત્ર પરંપરાગત વિધિ ન રહ્યા, પરંતુ વિચારપૂર્વક લેવામાં આવતો જીવનનો મહત્વપૂર્ણ નિર્ણય બની ગયો છે. તાજેતરમાં જીવનસાથી મેટ્રિમોનિયલ પ્લેટફોર્મ દ્વારા જાહેર કરાયેલા રિપોર્ટ મુજબ, ભારતીય યુવાનોમાં લગ્નની સરેરાશ ઉંમર 27 વર્ષથી વધીને 29 વર્ષ થઈ ગઈ છે. રિપોર્ટ અનુસાર, છેલ્લા દાયકામાં લગ્ન અંગે લોકોના વિચારોમાં નોંધપાત્ર ફેરફાર આવ્યો છે. હવે યુવાનો માટે લગ્ન કરતાં પહેલાં કરિયર બનાવવું, આર્થિક રીતે મજબૂત બનવું અને માનસિક રીતે તૈયાર થવું વધુ મહત્વપૂર્ણ બની ગયું છે. દસ વર્ષ પહેલાં જ્યાં 27 વર્ષની ઉંમરે લગ્ન સામાન્ય માનવામાં આવતા હતા, ત્યાં હવે અડધાથી વધુ સિંગલ્સ 29 વર્ષની ઉંમર પછી જ જીવનસાથીની શોધ શરૂ કરે છે. અગાઉ 18 વર્ષના થતાં જ માતા-પિતા લગ્નની તૈયારી શરૂ કરતા, પરંતુ હવે યુવાનો પોતે યોગ્ય સમય નક્કી કરે છે. આ ફેરફાર દર્શાવે છે કે લગ્ન હવે ઉતાવળનો નિર્ણય નહીં, પરંતુ પરિપક્વતા અને જવાબદારી સાથે લેવાતું પગલું બની ગયું છે. આ સમગ્ર પરિબળો દર્શાવે છે કે ભારતીય સમાજમાં લગ્ન પ્રત્યેનો દૃષ્ટિકોણ ઝડપી ગતિએ બદલાઈ રહ્યો છે. કરિયર, આત્મનિર્ભરતા અને પરસ્પર સમજણને પ્રાથમિકતા આપતા યુવાનો હવે લગ્નને જીવનનો અનિવાર્ય તબક્કો નહીં, પરંતુ યોગ્ય સમય પર લેવાતો વિચારપૂર્ણ નિર્ણય તરીકે જોઈ રહ્યા છે.

રિમેરેજ પ્રત્યે વધતી સ્વીકાર્યતા

રિપોર્ટમાં વધુ એક મહત્વપૂર્ણ ખુલાસો થયો છે કે બીજા લગ્ન એટલે કે રિમેરેજના કેસોમાં 43 ટકાનો વધારો નોંધાયો છે. વર્ષ 2016માં જ્યાં 11 ટકા લોકો બીજા લગ્નની શોધમાં હતા, ત્યાં 2025માં આ આંકડો વધીને 16 ટકા થયો છે. આજે દર છ સફળ લગ્નમાંથી એક બીજા લગ્નનો હોય છે. અગાઉ લગ્ન તૂટવું સમાજમાં અપ્રિય માનવામાં આવતું, પરંતુ હવે લોકો આ બાબતને વધુ પ્રૌઢતા સાથે સ્વીકારી રહ્યા છે. વિશેષ વાત એ છે કે છૂટાછેડા લીધેલા પ્રોફાઇલમાં રસ દાખવનારાઓમાં 15 ટકા એવા લોકો છે જેમણે ક્યારેય લગ્ન કર્યા નથી. આ દર્શાવે છે કે રિમેરેજ અંગેનો સામાજિક મિથ્યાભ્રમ હવે ઓસરી રહ્યો છે.

જાતિ કરતાં સમજણને પ્રાથમિકતા

લગ્ન માટે જાતિને આવશ્યક માનનારાઓની સંખ્યા પણ નોંધપાત્ર રીતે ઘટી છે. 2016માં 91 ટકા લોકો જાતિને જરૂરી ગણતા હતા, જ્યારે 2025 સુધીમાં આ આંકડો ઘટીને 54 ટકા રહ્યો છે. મેટ્રો શહેરોમાં તો આ પ્રમાણ વધુ ઘટીને આશરે 49 ટકા જ રહ્યું છે. હવે આશરે 90 ટકા લોકો માટે જીવનસાથીનો સ્વભાવ અને પરસ્પર સમજણ ઉંમર કે કમાણી કરતાં વધુ મહત્વપૂર્ણ બની ગયા છે.

સ્વતંત્ર નિર્ણય, છતાં પરિવારની ભૂમિકા યથાવત

રિપોર્ટ મુજબ, હવે 77 ટકા લોકો પોતાની મેટ્રિમોની પ્રોફાઇલ જાતે બનાવે અને સંભાળે છે, જ્યારે અગાઉ આ આંકડો 67 ટકા હતો. પરિવાર દ્વારા સંચાલિત પ્રોફાઇલ હવે ઘટીને 23 ટકા જ રહી છે. તેમ છતાં, 69 ટકા લોકો માને છે કે માતા-પિતાની હાજરી આ પ્રક્રિયાને સરળ બનાવે છે. એટલે કે લગ્ન હવે વધુ સ્વ-ચાલિત બની રહ્યા છે, પરંતુ પરિવારની ભૂમિકા હજુ પણ મહત્વપૂર્ણ છે.