ખાસ-ખબર સંવાદદાતા
મોરબી જીલ્લો જાણે માદક પદાર્થોનું હબ બન્યો હોય તેમ છાશવારે ગાંજાનો જથ્થો ઝડપાય રહ્યો છે.
હજુ એક સપ્તાહ પહેલા વાંકાનેરમાંથી ગાંજાનો મોટો જથ્થો ઝડપાયો હતો ત્યાં ફરી હળવદ શહેરમાંથી ગાંજાના જથ્થા સાથે એસઓજી ટીમે એક શખ્સને દબોચી લીધો છે.
મોરબી એસઓજી ટીમ પેટ્રોલિંગમાં હતી ત્યારે બાતમી મળી હતી કે હળવદ શહેરના કુંભારપરા વિસ્તારમાં રહેતો શખ્સ વાલાભાઈ પોપટભાઈ બાંભવા માદક પદાર્થના જથ્થા સાથે ફરી રહ્યો છે જે બાતમીને આધારે મોરબી એસઓજી ટીમે વોચ ગોઠવીને શહેરના કુંભારપરા, ખોડીયાર માતાજીના મંદિર પાસેથી નીકળતી બ્રેઝા કાર નંબર જીજે 36 એસી 7782 ને રોકીને ચેક કરી હતી જે કારમાંથી રૂ. 2800 ની કિંમતનો 280 ગ્રામ ગાંજાનો જથ્થો મળી આવ્યો હતો જેથી પોલીસે ગાંજાના જથ્થા સહિત રોકડા રૂપિયા 750, એક મોબાઈલ અને બ્રેઝા કાર મળી કુલ રૂ. 10,08,550 નો મુદ્દામાલ કબ્જે કરીને આરોપી વિરુદ્ધ એનડીપીએસ એક્ટ અન્વયે ધોરણસરની કાર્યવાહી હાથ ધરી હતી.
