ઓમર એજાઝે બનાવ્યા 13000 મહિલાના અશ્ર્લીલ વિડીયો, 2 વર્ષની બાળકીઓને પણ ન બક્ષી: અમેરિકામાં ભારતીય મૂળના ડૉક્ટરની ધરપકડ

ખાસ-ખબર ન્યૂઝ નવી દિલ્હી, તા.22

અમેરિકામાં પોલીસે ઓમર એજાઝ નામના ભારતીય ડોક્ટરની ધરપકડ કરી છે. આરોપ છે કે 40 વર્ષનો ડોક્ટર સારવાર માટે આવતી મહિલાઓનું બેભાન અવસ્થામાં યૌન શોષણ કરતો હતો અને છુપાયેલા કેમેરા લગાવીને તેમના નગ્ન ફોટા અને અશ્ર્લીલ વિડીયો પણ લેતો હતો.અહેવાલો અનુસાર, તપાસ દરમિયાન પોલીસને ઓમર એજાઝની એક હાર્ડ ડ્રાઈવમાંથી 13,000થી વધુ વિડીયો મળી આવ્યા હતા. આ સિવાય 15 અન્ય ઉપકરણો પણ જપ્ત કરવામાં આવ્યા હતા. પોલીસ તેમની તપાસ કરી રહી છે. અત્યાર સુધી એવું બહાર આવ્યું છે કે ઓમરે 2 વર્ષની નાની છોકરીઓનો વિડીયો રેકોર્ડ કર્યો હતો.

એવું કહેવામાં આવી રહ્યું છે કે આ મામલો ત્યારે પ્રકાશમાં આવ્યો જ્યારે એજાઝની પત્નીએ ઓમર એજાઝ દ્વારા રેકોર્ડ કરાયેલ ચિંતાજનક સામગ્રી કાયદા અમલીકરણ એજન્સીઓને પ્રદાન કરી. તેમને જોયા બાદ જ પોલીસે વોરંટ જારી કરીને ઓમર એજાઝની ધરપકડ કરી હતી. હવે આ મામલે વધુ તપાસ ચાલી રહી છે. યુએસ પોલીસ શેરિફ માઈક બાઉચાર્ડનું કહેવું છે કે 40 વર્ષીય ઓમર એજાઝ કયા કયા ગુનાઓમાં સંડોવાયેલો છે તે જાણવામાં મહિનાઓ લાગી જશે, પરંતુ પોલીસ તેની તપાસ કરી રહી છે.નોંધનીય છે કે ઓમર એજાઝ 2011માં બેંગલુરુથી વર્કિંગ વિઝા પર અમેરિકા આવ્યો હતો. તે પછી તેણે અમેરિકામાં ઘણી જગ્યાએ કામ કર્યું. એજાઝે સ્વિમિંગ ક્લબના ચેન્જિંગ રૂમમાં બાળકો અને તેમની માતાના ઘણા વિડીયો રેકોર્ડ કર્યા. એટલું જ નહીં, તે હોસ્પિટલના રૂમમાં દર્દીઓ સાથે મારપીટ પણ કરતો હતો અને હવે તે એક કંપની સાથે ભાગીદારીમાં ફિઝિશિયન તરીકે કામ કરતો હતો અને સારવારના નામે અલગ-અલગ હોસ્પિટલમાં જતો હતો.