હવે મતદાન પુર્વેના 48 કલાકમાં મત-અપીલનું ટ્વિટ નહીં થઇ શકે: ત્રિપુરા ચૂંટણીમાં ભાજપ-કોંગ્રેસ-ડાબેરીપક્ષને નોટીસ

– આચારસંહિતાનો ભંગ ગણાશે: સોશ્યલ મીડીયા મુદે પ્રથમ વખત ચૂંટણી પંચની કાર્યવાહી

દેશમાં ધારાસભા-લોકસભા સહિતની ચૂંટણીઓ સમયે મતદાન પુર્વેના 48 કલાકના સાયલન્સ પીરીયડમાં થતા આડકતરા પ્રચારમાં પ્રથમ વખત ચૂંટણી પંચે ભાજપ-કોંગ્રેસ તથા માર્કસવાદી સામ્યવાદી પક્ષનો નોટીસ પાઠવી મતદાનના દિને મતદારોને તેમની તરફેણમાં મતદાન કરવા અથવા શાસકને ફરી ચુંટવા કે પરાજીત કરવાની અપીલ કરતા ટવીટ બદલ નોટીસ ફટકારી છે.

ગઈકાલે ત્રિપુરામાં ધારાસભા ચૂંટણીના દીને થયેલા ટવીટ બદલ આ નોટીસ અપાઈ છે. ચૂંટણીપંચના એક સિનીયર અધિકારીના જણાવ્યા મુજબ આગામી તા.27ના રોજ મેઘાલય અને નાગાલેન્ડની ધારાસભા ચૂંટણી માટે મતદાન યોજાવાનું છે તેમાં હવે આ પ્રકારે આચાર સંહિતાનો ભંગ થાય નહી તે માટે આ પ્રકારે ચેતવણી પણ આપવામાં આવી છે અને અમો સ્પષ્ટ સંદેશ પાઠવવા માંગીએ છીએ કે 48 કલાકનો જે સાયલન્સ પીરીયડ છે તેમાં આ પ્રકારે કોઈ પ્રચાર થવો જોઈએ નહી અને છતા તેનો ભંગ થશે તો નિયમ મુજબ પગલા લેવાશે.

પંચે આ નોટીસનો જવાબ આપવા પણ 24 કલાકનો સમય અપાયો છે તે પ્રથમ વખત બન્યું છે કે ચૂંટણીપંચે સાયલન્સ પીરીયડમાં સોશ્યલ મીડીયા મારફત થતા પ્રચારમાં નોટીસ પાઠવી છે. આ અગાઉ મુખ્ય ચૂંટણી કમિશ્નર રાજીવકુમારે સોશ્યલ મીડીયાએ જે ફેક-ન્યુઝનો મારો જે ચૂંટણી સમયે થાય છે તેની સામે પણ ચિંતા વ્યક્ત કરી હતી.

તેઓએ જણાવ્યું કે, ગત વર્ષે યોજાનારી ચૂંટણીમાં ગોવામાં આ પ્રકારે 29, ગુજરાતમાં પાંચ, હિમાચલ પ્રદેશમાં આઠ અને પંજાબમાં ત્રણ ફરિયાદો સોશ્યલ મીડીયામાં ફેક પ્રચાર સંબંધી મળી હતી. જેમાં ફેસબુક, ટવીટર અને યુ-ટયુબનો મોટા પ્રમાણમાં ઉપયોગ થયો હતો.

સોશ્યલ મીડીયા માટે ચૂંટણીપંચની કોઈ ચોકકસ આચારસંહિતા નથી પણ રાજકીય પક્ષો અને આ મીડીયા સ્વૈચ્છીક રીતે પોતે આ પ્રકારની આચાર સંહિતા જાળવે. આ પ્લેટફોર્મનો ઉપયોગ કરે તેવું ઈચ્છનીય છે. ત્રિપુરાની ચૂંટણીમાં ભાજપ તરફથી સલામત, ઉજજવળ ભવિષ્ય માટે ભાજપને મત આપતા ટવીટ થયા હતા. આ પ્રકારે ડાબેરી પક્ષો અને કોંગ્રેસ પક્ષે ભાજપને પરાજીત કરવાના ટવીટ કર્યા હતા.