હવે લેહમાં Gen-Z ભડક્યા, ભાજપ કાર્યાલયને ફૂંકી માર્યું

ખાસ-ખબર ન્યૂઝ નવી દિલ્હી

કેન્દ્ર શાસિત પ્રદેશ લદાખમાં વિદ્યાર્થીઓ અને પોલીસ વચ્ચે બુધવારે અથડામણ સર્જાઈ હતી. લદાખને પૂર્ણ રાજ્યનો દરજ્જો આપવા અને બંધારણની છઠ્ઠી અનુસૂચિમાં સામેલ કરવાની માગ સાથે પર્યાવરણવિદ્ સોનમ વાંગચુક ભૂખ હડતાળ કરી રહ્યા છે. સોનમ વાંગચુકના સમર્થનમાં મોટી સંખ્યામાં વિદ્યાર્થીઓ માર્ગો પર ઊતરી આવ્યા હતા. આ દરમિયાન દેખાવકારોની પોલીસ સાથે પણ અથડામણ થઈ હતી. પોલીસ પર પથ્થરમારો કરી દેવામાં આવ્યો હતો. સીઆરપીએફનું વાહનને આગચંપી કરાઈ હતી. આ દરમિયાન દેખાવકારોએ ભાજપના કાર્યાલયની સામે પણ દેખાવ કર્યા હતા અને ત્યાં પણ આગચંપી કરાઈ હતી. દેખાવકારોએ અનેક વાહનોને આગચંપી કરી હતી. સાથે જ અન્ય જાહેર સંપત્તિઓને પણ ફૂંકી મારી હતી. પોલીસ એક તરફ ભીડને વેરવિખેર કરવા માટે ટીયરગેસનો મારો ચલાવી રહી છે ત્યારે લાઠીચાર્જની પણ નોબત આવી હતી. જોકે દેખાવકારોએ પણ સામે પોલીસ પર પથ્થરમારો કરીને મુશ્ર્કેલી વધારી હતી.

વાંગચુકે ધરણાં પૂરા કર્યા, યુવાનોને હિંસા બંધ કરવાની અપીલ કરી
હિંસા પછી, સોનમ વાંગચુકે કહ્યું, ‘આ લદ્દાખ માટે દુ:ખદ દિવસ છે. અમે પાંચ વર્ષથી શાંતિના માર્ગ પર ચાલી રહ્યા છીએ. અમે ધરણાં પર બેઠાં, ભૂખ હડતાલ કરી, લેહથી દિલ્હી સુધી ચાલીને ગયા. આજે આપણે શાંતિનો સંદેશ નિષ્ફળ જતા જોઈ રહ્યા છીએ. હિંસા, ગોળીબાર અને આગચંપી થઈ રહી છે. હું લદ્દાખની યુવા પેઢીને આ બંધ કરવાની અપીલ કરું છું. આ લદ્દાખ મુદ્દાને સમર્થન નથી. આ ફક્ત પરિસ્થિતિને વધુ ખરાબ કરશે. હું વહીવટીતંત્રને ગોળીબાર બંધ કરવાની અપીલ કરું છું. અમે અમારી ભૂખ હડતાલ તોડી રહ્યા છીએ અને વિરોધ બંધ કરી રહ્યા છીએ. અમે ઈચ્છીએ છીએ કે વહીવટીતંત્ર નરમ પડે. યુવાનોએ પણ હિંસા બંધ કરવી જોઈએ, અમે લદ્દાખ અને દેશમાં અસ્થિરતા નથી ઇચ્છતા.’

શું છે માગણી?
સોનમ વાંગચુકની આગેવાનીમાં લદાખની એપેક્સ બોડી લદાખ માટે રાજ્યનો દરજ્જો માગી રહી છે. સોનામ વાંગચુક તેના માટે છેલ્લા 15 દિવસથી ભૂખ હડતાળ કરી રહ્યા છે. આજે લદાખમા બંધ વચ્ચે મોટી સંખ્યામાં લોકો લેહમાં એકઠા થયા હતા. જોકે હાલ સ્થિતિ કાબૂમાં લેવાઈ હોવાના દાવા કરાઈ રહ્યા છે.
શું છે મુખ્ય ચાર માંગણી?
1) લદાખને પૂર્ણ રાજ્યનો દરજ્જો આપો
2) લદાખને બંધારણની છઠ્ઠી અનુસૂચિમાં સામેલ કરો
3) લદાખ માટે બે લોકસભા બેઠકોની માંગ કરાઈ
4) લદાખના આદિવાસીઓને આદિવાસી દરજ્જો આપો

લદ્દાખને પૂર્ણ રાજ્યનો દરજ્જો આપવાની માગ સાથે વિદ્યાર્થીઓનું પ્રદર્શન: ઠેર-ઠેર આગચંપી

વિરોધ કરી રહેલા યુવાનોએCRPFની ગાડીને ફૂંકી મારી હતી