નામચીન શખસ દેશી તમંચા સાથે ઝડપાયો

SOGનો આજી ડેમ પાસે બાતમી આધારે દરોડો

ખાસ-ખબર ન્યૂઝ રાજકોટ

આગામી લોકસભા ચૂંટણીને ધ્યાને રાખી પોલીસ તંત્ર દ્વારા શહેરભરમાં સઘન પેટ્રોલિંગ કરવામાં આવી રહ્યું છે દરમિયાન છેલ્લા અગિયાર દિવસમાં અલગ અલગ છ વિસ્તારોમાંથી નામચીન ગુનેગારોને ગેરકાયદેસર પિસ્ટલ, તમંચો, જીવતા કારતૂસ સાથે પકડી પાડ્યા છે ગત રાત્રે વધુ એક રીઢા ગુનેગારને તમંચા સાથે એસઓજીએ ઝડપી લીધો છે.

એસઓજી પીઆઇ જે એમ કૈલાના માર્ગદર્શન હેઠળ પેટ્રોલિંગમાં રહેલ પીએસઆઇ ડી.પી.ગોહેલ, સહિતના સ્ટાફને મંગળવારે પેટ્રોલિંગ દરમિયાન બાતમી મળી હતી કે અગાઉ ચોરી, પ્રોહિબિશન, મનીલેન્ડ એક્ટ સહિત નવ ગુનામાં સંડોવાયેલો કોઠારિયા રોડ આનંદનગર વિસ્તારનો સમીર ઉર્ફે સલીમ ઉર્ફે સલીયો આમદ જુણેજા નામનો ગુનેગાર આજી ડેમ ચોકડીથી આગળ આઇટીઆઇ કોલેજ સામે નાસ્તાની લારીએ ગેરકાયદેસર હથિયાર સાથે ઊભો છે આ બાતમી આધારે દરોડો પાડતા સમીર ઉર્ફે સલીમ મળી આવતા તેને સકંજામાં લઈ જડતી લેતા પેન્ટના નેફામાંથી દેશી બનાવટનો તમંચો મળી આવ્યો હતો. સલીમે ક્યાંથી, કોની પાસેથી હથિયાર લીધું તે સહિતના મુદે પોલીસે વિશેષ તપાસ હાથ ધરી છે.