વોકલ ફોર લોકલ અભિયાનના લીરેલીરા ઉડ્યા: વિનોબા ભાવે ગ્રાઉન્ડમાં 23 પૈકી ગણતરીના સ્ટોલ જ કાર્યરત હોવાનો વિડીયો વાયરલ
વીજ ચોરીના વિવાદ બાદ હવે આયોજન સામે સવાલો: પૂરતી જનજાગૃતિના અભાવે મેળામાં છવાયો સન્નાટો
- Advertisement -
ખાસ-ખબર ન્યૂઝ રાજકોટ
સ્થાનિક ઉદ્યોગોને પ્રોત્સાહન આપવા અને સ્વદેશી ચીજવસ્તુઓના વેચાણને વેગ આપવાના ઉમદા હેતુથી હળવદ નગરપાલિકા દ્વારા આયોજિત ’સ્વદેશી મેળો’ આયોજનના અભાવે ફિયાસ્કો સાબિત થઈ રહ્યો છે. હળવદના વિનોબા ભાવે ગ્રાઉન્ડ ખાતે ચાલી રહેલા આ મેળાનો એક વિડીયો સોશિયલ મીડિયામાં વાયરલ થયો છે, જેમાં મોટાભાગના સ્ટોલ બંધ હાલતમાં જોવા મળતા પાલિકાની આયોજન ક્ષમતા સામે અનેક પ્રશ્નચિહ્ન ઊભા થયા છે.
વિગતો મુજબ, ગત 8 માર્ચથી “હર ઘર સ્વદેશી, ઘર-ઘર સ્વદેશી” ના સૂત્ર સાથે શરૂ થયેલો આ મેળો 15 માર્ચ સુધી ચાલવાનો હતો. મેળામાં કુલ 23 સ્ટોલ ઊભા કરવામાં આવ્યા હતા, પરંતુ ગ્રાહકોની અવરજવર બિલકુલ ન હોવાથી હતાશ થયેલા અનેક સ્ટોલ સંચાલકોએ પોતાના સ્ટોલને તાળા મારી દીધા છે. સોશિયલ મીડિયામાં વાયરલ થયેલા વિડીયોમાં મેળાના મેદાનમાં શૂન્યાવકાશ જોવા મળી રહ્યો છે, જે દર્શાવે છે કે આ આયોજન માત્ર કાગળ પર જ મજબૂત હતું.
ઉલ્લેખનીય છે કે, આ મેળો શરૂઆતથી જ વિવાદોમાં રહ્યો છે. અગાઉ મેળામાં લંગરિયા નાખીને ગેરકાયદે વીજ જોડાણ મેળવવામાં આવ્યું હોવાનો વિડીયો વાયરલ થયો હતો, ત્યારે હવે પૂરતી પ્રસિદ્ધિ અને જનજાગૃતિના અભાવે આખો મેળો સુનો સાબિત થયો છે.
સ્થાનિકોમાં ચર્ચા છે કે સરકારી નાણાંનો વ્યય કરીને કરવામાં આવેલા આવા અણઘડ આયોજનથી ઉદ્યોગકારોને ફાયદો થવાને બદલે નુકસાન વેઠવાનો વારો આવ્યો છે. હવે આ નિષ્ફળતા અંગે નગરપાલિકા શું ખુલાસો કરે છે તે જોવાનું રહ્યું.
