ખાસ-ખબર ન્યૂઝ સુરેન્દ્રનગર, તા.19
ધ્રાંગધ્રા નગરપાલિકા દ્વારા આયોજિત લોકમેળામાં રાઈડ્સ માટેના પ્લોટની હરાજીએ નવો રેકોર્ડ બનાવ્યો છે. પાલિકાને પ્રથમ દિવસે જ રાઈડ્સ, ઠંડા પીણા અને રમકડાના સ્ટોલની હરાજીમાંથી 1 કરોડ 62 લાખ 48 હજારની આવક થઈ છે.
ઝાલાવાડના સુપ્રસિદ્ધ મેળા તરીકે જાણીતા આ લોકમેળાનું આયોજન 15થી 18 ઓગસ્ટ 2025 દરમિયાન કરવામાં આવ્યું છે. રાઈડ્સ માટે 51 પ્લોટની હરાજી કરવામાં આવી હતી. પ્લોટોની કિંમત 5 લાખથી લઈને 15.51 લાખ સુધીની બોલી લાગી હતી.
- Advertisement -
આ વર્ષે વધુ રાઈડ્સના વેપારીઓએ હરાજી પ્રક્રિયામાં ભાગ લીધો હતો. હરાજી દરમિયાન કોઈ અનિચ્છનીય ઘટના ન બને તે માટે પૂરતો પોલીસ બંદોબસ્ત ગોઠવવામાં આવ્યો હતો. પાલિકાએ વધુ આવકના કારણે મેળામાં વધુ સારી સુવિધાઓ પૂરી પાડવાની ખાતરી આપી છે.
હરાજી પ્રક્રિયા નગરપાલિકા પ્રમુખ કુલદીપસિંહ ઝાલા અને ચીફ ઓફિસર મંટીલકુમાર પટેલની અધ્યક્ષતામાં યોજાઈ હતી. આ પ્રસંગે ઉપપ્રમુખ હિરેનભાઈ કાનાબાર, કારોબારી ચેરમેન, મેળા કમિટીના ચેરમેન અને અન્ય સુધરાઈ સભ્યો હાજર રહ્યા હતા.
