મોરબી જિલ્લામાં 15 ઓગસ્ટથી એક મહિના સુધી 5000 થી વધુ ટ્રક થંભી જશે

ખાસ-ખબર સંવાદદાતા
મોરબી સિરામિક એસોસિયેશન દ્વારા પ્રથમવાર એક મહિનાનું વેકેશન રાખવાની જાહેરાત કરવામાં આવી છે અને આગામી 10 ઓગસ્ટથી ફેકટરીઓ શટ ડાઉન થશે જેના પગલે એક તરફ સિરામિક સાથે જોડાયેલ બીજા આનુસંગિક ઉદ્યોગ અને વ્યવસાયને પણ અસર થાય તેવી સંભાવના છે જયારે ફેકટરીઓ બંધ થવાથી દરરોજ મોરબીના અલગ અલગ ફેક્ટરીમાં લોડ અનલોડ થતા 5000 થી પણ વધુ ટ્રકમાં માલ લોડ અનલોડ થવાનું પણ બંધ થઈ જશે જેના કારણે ટ્રાન્સપોર્ટ ઉધોગ પણ બંધ રાખવો પડે તેમ છે જેથી મોરબી જીલ્લા ટ્રાન્સપોર્ટ એસોશીએશન દ્વારા આગામી 15 ઓગસ્ટથી 15 સપ્ટેમ્બર એમ એક મહિના સુધી આંશિક રીતે વેકેશન રાખવાનો નિર્ણય લેવામાં આવ્યો છે. મોરબી ટ્રક ટ્રાન્સપોર્ટ ઉદ્યોગ મોટાભાગે સીરામીક ઉધોગ ઉપર જ નિર્ભર હોવાથી સીરામીકની વિપરીત અસરથી ટ્રક ટ્રાન્સપોર્ટને પણ અસર થાય છે ત્યારે મોરબી સીરામીક એસોસિએશન દ્વારા 10 ઓગસ્ટથી એક મહિનો સુધી સીરામીક ફેકટરીઓ બંધ રાખવાની જાહેરાત કરવામાં આવી છે જેથી મોરબી ટ્રક ટ્રાન્સપોર્ટ એસોસિયેશન દ્વારા પણ એક મહિનો વેકેશન રાખવાની જાહેરાત કરવામાં આવી છે. મોરબી જીલ્લા ટ્રક ટ્રાન્સપોર્ટ એસોસિયેશનના પ્રમુખ પ્રભાતભાઈના જણાવ્યા મુજબ હાલ સિરામિક, પેપર મિલ તેમજ અન્ય આનુસંગિક ઉદ્યોગમાં દરરોજ 6000 થી વધુ ટ્રક લોડ અનલોડ થાય છે પરંતુ સિરામિક ફેક્ટરી બંધ રહેવાથી મોટાભાગના ટ્રાન્સપોર્ટને અસર થશે જોકે પેપર મિલ, નોનવુડન, પ્લાયવુડ ફેક્ટરી તેમજ પોલી પ્લાસ્ટ સહિતની ફેક્ટરી ચાલુ રહેશે. આ ઉપરાંત મોરબીથી અલગ અલગ જીલ્લામાં પાર્સલ લઈને જતા ટ્રક પણ ચાલુ રહેતા હોય છે જેથી આ ઉધોગમાં પણ માલના પરીવહનને અસર ન થાય તે માટે સંપૂર્ણ પણે બંધ રાખવાના બદલે આંશિક રીતે એક મહિના સુધી સ્વૈચ્છિક ટ્રાન્સપોર્ટ ઉદ્યોગ બંધ રાખવાનો નિર્ણય લેવાયો છે.