જિલ્લા પંચાયતના નવા સભાખંડનું ઉદ્ઘાટન કરીને તેમાં જ યોજાઈ સામાન્ય સભા
ખાસ-ખબર સંવાદદાતા
છેલ્લા બે વર્ષથી અટકેલા જીલ્લા પંચાયતના નવા સભાખંડનું ઉદઘાટન કરીને ગઈકાલે તેમાં જ મોરબી જિલ્લા પંચાયતની સામાન્ય સભા યોજાઈ હતી. આ સામાન્ય સભામાં 6 કરોડ 80 લાખ 41 હજારના 222 કામોને મંજુરી આપવામાં આવી હતી અને 15 મા નાણાપંચના કામો ઝડપથી પુરા થાય તેવા પ્રયાસો કરવામાં આવનાર હોવાનું જીલ્લા વિકાસ અધિકારીએ જણાવ્યું હતું.
- Advertisement -
મોરબી જિલ્લા પંચાયતના નવા સભાખંડ ખાતે યોજાયેલ ખાસ સામાન્ય સભામાં જુદા જુદા એન્જડામાં રેતી રોયલ્ટી, 15મા નાણાંપંચના કામો સહિતના તમામ એન્જડાને બહાલી આપવામાં આવી હતી. જિલ્લા વિકાસ અધિકારી ડી.ડી. જાડેજા દ્વારા તેમના આવ્યા બાદ કામોમાં પ્રગતિ આવી હોવાની જાણકારી આપવામાં આવી હતી તેમજ તેઓએ જણાવ્યું હતું કે, 15મા નાણાંપંચ સહિતના કામો પેન્ડિંગ હોય તેવા તમામ કામો ઝડપથી પુરા કરવાના પ્રયાસો હાથ ધરાશે.
હાલ છેલ્લા ત્રણ મહિનામાં 7 કરોડ રૂપિયાના કામો પૂર્ણ કરવામાં આવ્યા છે અને આગામી સમયમાં પણ વધુ વિકાસના કામો કરાશે અને જિલ્લામાં જે નડતરરૂપ દબાણો હોય તેને દૂર કરવામાં આવશે. આ સામાન્ય સભામાં રૂ. 5.50 કરોડના ખર્ચે 190 જેટલા સૈદ્ધાંતિક કામો, રૂ. 66.91 લાખના ખર્ચે 16 હેતુફેરના કામો તેમજ રૂ. 63.50 લાખના ખર્ચે 16 વહીવટી કામોને મંજૂર કરવામાં આવ્યા હતા. આ સામાન્ય સભામાં જિલ્લા પંચાયત પ્રમુખ ચંદુભાઈ શિહોરા, જિલ્લા વિકાસ અધિકારી ડી. ડી. જાડેજા, જિલ્લા પંચાયતના ઉપપ્રમુખ જાનકીબેન કૈલા, નાયબ જીલ્લા વિકાસ અધિકારી ઇલાબેન ગોહિલ, ઇસીતાબેન મેર સહિતના અધિકારીઓ અને સભ્યો ઉપસ્થિત રહ્યા હતા.
