મોરબી જિલ્લા કક્ષાના પ્રજાસત્તાક પર્વની ઉજવણી હળવદ ખાતે કરાશે

વિવિધ વિભાગના ટેબ્લો, સાંસ્કૃતિક કાર્યક્રમો અને પરેડ આકર્ષણ જમાવશે

26 જાન્યુઆરીની ઉજવણીની તૈયારીના ભાગરૂપે કલેક્ટરના અધ્યક્ષસ્થાને બેઠક યોજાઈ

ખાસ-ખબર સંવાદદાતા
મોરબી જિલ્લામાં પ્રજાસતાક પર્વની ઉજવણીના ભાગરૂપે કલેક્ટર કચેરીના સભાખંડ ખાતે ઉજવણીની પૂર્વ તૈયારી માટે જીલ્લા કલેક્ટર જી.ટી.પંડ્યાના અધ્યક્ષસ્થાને બેઠક યોજાઈ હતી.
આ વર્ષે 26મી જાન્યુઆરીના રાષ્ટ્રીય તહેવારની મોરબી જિલ્લા કક્ષાની ઉજવણી માર્કેટિંગ યાર્ડ-હળવદ ખાતે થનાર છે જેના પૂર્વ આયોજન માટે બેઠકનું આયોજન કરવામાં આવ્યું હતું. આ બેઠકમાં કલેક્ટરે માસ્ક અને સેનેટાઇઝરની વ્યવસ્થા, સાંસ્કૃતિક કાર્યક્રમો, સલામતી અને સુરક્ષા, ધ્વજ અને ધ્વજ પોલ, પરેડ, સ્ટેજ, બેઠક વ્યવસ્થા, મંડપ અને લાઈટિંગ, ટેબ્લો અને શુશોભન, પ્રોટોકોલ, ડાયસ વ્યવસ્થા, પીવાનું પાણી અને સ્વચ્છતા તેમજ મહાનુભાવો માટે સ્પીચના મુદ્દા વગેરે બાબતો અંગે સબંધિત વિભાગો સાથે ચર્ચા કરી જરૂરી સૂચનાઓ આપી હતી. મોરબી જિલ્લામાં પ્રજાસત્તાક પર્વની રંગે ચંગે ઉજવણી કરવામાં આવનાર છે. હળવદ માર્કેટિંગ યાર્ડ ખાતે યોજાનાર જિલ્લા કક્ષાના કાર્યક્રમમાં પીજીવીસીએલ, વાસ્મો, આત્મા અને પ્રાકૃતિક ખેતી, ડિઝાસ્ટર, વન વિભાગ તેમજ વિવિધ વિભાગના ટેબ્લો આકર્ષણ જમાવશે. આ ઉપરાંત પોલીસ, એનસીસી, એનએસએસ, ફાયર તેમજ ફોરેસ્ટના જવાનો પરેડ યોજશે. આ ઉપરાંત સમગ્ર જિલ્લામાં સ્વચ્છતા અભિયાન સહિત વિવિધ કાર્યક્રમોનું આયોજન કરવામાં આવનાર છે. આ બેઠકમાં જિલ્લા વિકાસ અધિકારી, નિવાસી અધિક કલેકટર, હળવદ પ્રાંત અધિકારી સહિત સંબંધિત વિભાગના અધિકારી/કર્મચારીઓ ઉપસ્થિત રહ્યા હતા.