ગુજરાતમાં હવામાન વિભાગની આગાહી મુજબ મેઘમહેર જોવા મળી છે. છેલ્લા 24 કલાકમાં ગુજરાતના 188 તાલુકાઓમાં વરસાદ વરસ્યો, સૌથી વધુ ધંધુકામાં પોણા પાંચ ઇંચ વરસાદ નોંધાયો.
- Advertisement -
ગુજરાતમાં વરસાદનો બીજો રાઉન્ડ શરૂ થઈ ગયો છે. રાજ્યમાં મોટાભાગના વિસ્તારોમાં હળવોથી ભારે વરસાદ વરસી રહ્યો છે. હવામાન વિભાગની આગાહી મુજબ રાજ્યના વાતાવરણમાં ફરી પલટો આવ્યો છે. છેલ્લા 24 કલાકમાં ગુજરાતના 188 તાલુકાઓમાં વરસાદ નોંધાયો છે. જેમાં સૌથી વધારે વરસાદ ધંધુકામાં નોંધાયો છે. ધંધુકામાં મેઘરાજાએ ધડબડાટી બોલાવતા ચારેકોર પાણી-પાણી કરી નાખ્યું છે.
ધંધુકામાં નોંધાયો સૌથી વધારે વરસાદ
ધંધુકામાં છેલ્લા 24 કલાકમાં પોણા પાંચ ઇંચ વરસાદ નોંધાયો છે. જ્યારે પોરબંદરમાં સાડા ચાર ઇંચ વરસાદ ખાબક્યો છે. આ સાથે જ જામનગર અને દાંતિવાડામાં 4 ઇંચ વરસાદ, સુરતના પલસાણા, વલસાડના પાલડી અને પોરબંદરના રાણાવાવમાં સાડા ત્રણ ઇંચ વરસાદ નોંધાયો છે. તો જોડિયા અને ધોલેરામાં 3 ઇંચ વરસાદ, ડીસા, સુત્રાપાડા અને ધરમપુરમાં 3 ઇંચ વરસાદ બોટાદમાં પોણા ત્રણ ઇંચ વરસાદ પડ્યો છે. છેલ્લા 24 કલાકમાં 168 તાલુકામાં 3 ઈંચથી ઓછો વરસાદ નોંધાયો છે.
અમદાવાદમાં ભારે વરસાદથી ઠેર ઠેર ભરાયા પાણી
અમદાવાદમાં પણ ગઈકાલે સાંજે 6.30 વાગ્યા પછી વરસાદ શરૂ થયો હતો. અમદાવાદમાં ભારે વરસાદને કારણે ઠેર-ઠેર પાણી ભરાયા હતા. કાલુપુરથી દરિયાપુર જવાના રસ્તે ટ્રાફિક જામ સર્જાયો હતો. કાલુપુરથી દરિયાપુર જવાના રસ્તે અંદાજે 1 કિલોમીટર સુધીનો ટ્રાફિક જામ થયો હતો. ટ્રાફિક વધતા લોકોની મુશ્કેલીઓ વધી હતી. વરસાદના કારણે વાસણા બેરેજના 6 દરવાજા ખોલવામાં આવ્યા હતા. વરસાદને લઈ સાબરમતી નદીમાં પાણીની આવક થતાં 14 હજાર ક્યૂસેક પાણી નદીમાંથી આગળ છોડવામાં આવ્યું હતું.
- Advertisement -
ભાવનગરમાં 1 કલાકમાં દોઢ ઇંચથી વધુ વરસાદ
ભાવનગર શહેરમાં સાબેલાધાર વરસાદ વરસ્યો હતો. શહેરમાં 1 કલાકમાં દોઢ ઇંચથી વધુ વરસાદ વરસ્યો હતો. વરસાદના કારણે ઠેર ઠેર પાણી ભરાયા હતા. પાણી ભરાતા વાહનચાલકોને હાલાકી વેઠવાનો વારો આવ્યો હતો. બોટાદના ગઢડા તાલુકાના પડવદર ગામે ધોધમાર વરસાદ વરસતા નદી-નાળામાં પાણીની આવક થઈ હતી. પડવદર ગામે બપોર બાદ મુશળધાર વરસાદ વરસ્યો હતો. ગામની શેરીઓમાં વરસાદી પાણી વહેતા થયા હતા.
જામકંડોરણાના ગ્રામ્ય વિસ્તારોમાં ભારે વરસાદ
જામકંડોરણા તાલુકામાં ગતરોજ અતિભારે વરસાદ વરસ્યો હતો. જામકંડોરણાના ખજૂરાહ, બાલાપર, ધકાપર ગામમાં વરસાદ વરસતા ઉતાવળી નદીમાં ઘોડાપુર આવ્યું છે. ખજૂરાહ ગામમાં જવાના રસ્તા પર નદીના પાણી ફરી વળ્યા છે. ખજૂરાહ જવાના પુલ ઉપર પાણી ફરી વળતા ગ્રામજનો મુશ્કેલીમાં મુકાયા છે.
