રાજકોટ મનપામાં આપનું વિરોધ પ્રદર્શન
ખાસ-ખબર ન્યૂઝ રાજકોટ
ભાજપશાસિત રાજકોટ મહાપાલિકામાં આજે વાર્ષિક અંદાજપત્ર કરતાં પણ વધુ ચર્ચા મેયરના પ્રયાગરાજ પ્રવાસની રહી હતી. શહેરનાં મહિલા મેયર નયનાબેન પેઢડિયા મ્યુનિસિપલ કોર્પોરેશન દ્વારા તેમને ફાળવાયેલી સત્તાવાર ઈનોવા કારમાં પોતોના પતિ, ભાજપના અન્ય મહિલા અગ્રણી અને સાથી કોર્પોરેટર વગેરેને લઈને કુંભસ્નાન કરવા ગયેલાં છે, જ્યાં ખાસ તો મેયરની કાર પર કપડાં સૂકવાયાં હોય એવી તસવીરો બહાર આવતાં પદની ગરિમા ઓઝપાયાનો ગણગણાટ શહેરભરમાં પ્રવર્તી ગયો હતો. મેયર નયનાબેન પેઢડિયા તેમને હોદ્દાની રૂએ ફાળવાયેલી ૠઉં-3 ૠઅ 2020 નંબરવાળી ઈનોવા કાર લઈને તા. 6થી 12 સુધી પ્રયાગરાજ પ્રવાસે ગયાં છે, જેમાં તેમની સાથે તેમના પતિ વિનોદ પેઢડિયા, ભાજપ મહિલા મોરચાનાં પ્રમુખ કિરણબેન માકડિયા, મેયરના જ વોર્ડના અન્ય કોર્પોરેટર કંકુબેન ઉઘરેજિયા તથા અન્ય મહિલાઓ મળી કુલ 7 વ્યક્તિ સામેલ છે.
- Advertisement -
આ ઘટનાના ઘેરા પ્રત્યાઘાત પડયા છે. આજ રોજ રાજકોટ મહાનગર પાલિકા ખાતે આમ આદમી પાર્ટી દ્વારા મેયરનો ઉગ્ર વિરોધ કરવામાં આવ્યો હતો. મેયર નયનાબેન પેઢડિયાના પ્રયાગરાજ ખાતે સરકારી ગાડી સાથેના પ્રવાસે ચો તરફ વિરોધનો સુર જોવા મળ્યો છે. આમ આદમી પાર્ટીએ ગંભીર આરોપો લગાવતા કહ્યું કે; મેયર પ્રજાના ટેક્સના પૈસે ધામધૂમ કરી રહ્યા છે. સાથે જ આવતા દિવસોમાં મેયર રાજીનામું આપે તેવી માંગ પણ આમ આદમી પાર્ટી દ્વારા કરવામાં આવી છે. રાજકોટ આપના કાર્યકરોએ રાજકોટ મહાપાલિકા ખાતે ગાડીમાં કપડાં સુકાવી પોતાનો વિરોધ નોંધાવ્યો હતો.
તેમજ મહાપાલિકાને તાળાબંધી પણ કરવામાં આવી હતી.
