મોરેશિયસ દેશમાં 22 જાન્યુઆરીએ તમામ કર્મચારીઓને બપોરે 2થી 4 કલાક દરમિયાન અપાશે છુટ્ટી, મોરેશિયસમાં 70 ટકાથી વધુ લોકો ભારતીય મૂળના
અયોધ્યામાં રામ મંદિરના અભિષેક સમારોહની તૈયારીઓ પૂરજોશમાં ચાલી રહી છે. આ દરમિયાન ભારતના મિત્ર દેશ મોરેશિયસે શુક્રવારે એક મોટી જાહેરાત કરી હતી કે, 22 જાન્યુઆરીએ બે કલાકનો વિરામ રહેશે. મોરેશિયસ સરકારે જાહેરાત કરી હતી કે, હિંદુ ધર્મને અનુસરતા સરકારી કર્મચારીઓને આ બ્રેક આપવામાં આવશે. હિન્દુ સામાજિક-સાંસ્કૃતિક સંગઠનોએ આ માટે સરકારને વિનંતી કરી હતી. તાજેતરમાં મોરેશિયસ સનાતન ધર્મ મંદિર ફેડરેશને દેશના વડાપ્રધાન પ્રવિંદ કુમાર જગન્નાથને પત્ર લખ્યો હતો. ફેડરેશને પત્રમાં લખ્યું હતું કે, રામ મંદિર પ્રાણ પ્રતિષ્ઠા સમારોહનો દિવસ હિન્દુ ધર્મ માટે ખૂબ જ ખાસ છે. આવી સ્થિતિમાં 22 જાન્યુઆરીએ સમારોહનું પ્રસારણ જોવા અને ધાર્મિક વિધિઓ કરવા માટે બે કલાકનો વિરામ આપવો જોઈએ.
- Advertisement -
મોરેશિયસ સરકારે શું કહ્યું?
એક સરકારી નિવેદનમાં કહેવામાં આવ્યું છે કે, કેબિનેટ ભારતમાં અયોધ્યામાં રામ મંદિરના ઉદ્ઘાટનને કારણે હિંદુ જાહેર અધિકારીઓને બપોરે 2 વાગ્યાથી બે કલાકની વિશેષ રજા આપવા માટે સંમત થયા છે.આ સંદર્ભમા આ એક ઐતિહાસિક ઘટના છે કારણ કે તે ભગવાન રામના અયોધ્યા પરત ફરવાનું ચિહ્નિત કરે છે.
રામ મંદિરમાં ભગવાન રામલલાની મૂર્તિના અભિષેક સમારોહમાં વડાપ્રધાન નરેન્દ્ર મોદી અને ઉત્તર પ્રદેશના મુખ્યમંત્રી યોગી આદિત્યનાથ સહિત હજારો લોકો ભાગ લેશે, જેમાં મોટી સંખ્યામાં સંતો અને ઋષિઓ હાજર રહેશે. વિવિધ ક્ષેત્રની મોટી હસ્તીઓને આ કાર્યક્રમમાં હાજરી આપવા આમંત્રણ આપવામાં આવ્યું છે. જોકે કોંગ્રેસની ટોચની નેતાગીરીએ આ કાર્યક્રમમાં હાજરી આપવાનો ઈન્કાર કરી દીધો છે.
