થર્ટી ફર્સ્ટને લઈને મોરબી જિલ્લા પોલીસનો માસ્ટર પ્લાન

હોટેલ, ધાબા, ગેસ્ટ હાઉસ અને ફાર્મ હાઉસ સહિત અંતરિયાળ વિસ્તારોમાં ચેકિંગ હાથ ધરાશે

ચેકપોસ્ટ ઉપર સઘન વાહન ચેકીંગ કરી બ્રેથએનેલાઇઝર ઈક્યુટમેન્ટ દ્વારા ડ્રંક એન્ડ ડ્રાઈવના કેસો કરાશે
છેલ્લા એક અઠવાડિયામાં દારૂના 112 કેસો શોધી કાઢીને 35.16 લાખનો મુદ્દામાલ કબ્જે
ખાસ-ખબર સંવાદદાતા
આગામી 31 ડિસેમ્બરના રોજ નવા વર્ષની ઉજવણી થનાર હોય જે અનુસંધાને મોરબી જિલ્લામાં કાયદો અને વ્યવસ્થાની પરિસ્થિતી જળવાઇ રહે અને કોઇ અનિચ્છનિય બનાવ ન બને તે માટે મોરબી જીલ્લા પોલીસે માસ્ટર પ્લાન તૈયાર કર્યો છે જેમાં પ્રોહિબિશનના કેસો શોધવા સહિત ચેકપોસ્ટ ઉપર વાહનચેકીંગ અને હોટેલ, ફાર્મ હાઉસોમાં પોલીસ દ્વારા ચેકીંગ હાથ ધરવામાં આવશે. આગામી 31 ડિસેમ્બર અનુસંધાને છેલ્લા પાંચ દિવસોમાં મોરબી પોલીસ દ્વારા પ્રોહીબીશનના કેસ, અસરગ્રસ્ત એરીયામાં ડે-નાઇટ કોમ્બીંગ અને ફૂટ પેટ્રોલીંગ કરવામાં આવ્યું છે તેમજ 31 ડિસેમ્બર અનુસંધાને મોરબી જિલ્લા પોલીસ અધિક્ષક રાહુલ ત્રિપાઠી દ્વારા છેલ્લા અઠવાડીયા દરમિયાન પ્રોહીબિશનના વધુમાં વધુ કેસો કરવા સ્પેશીયલ ડ્રાઇવનું આયોજન કરેલ હોય જેમાં પ્રોહીબિશન ધારા તળે 112 કેસો શોધી કાઢી રૂ. 35,16,670 નો મુદામાલ કબ્જે કરી કુલ 111 આરોપી વિરુદ્ધ કાયદેસરની કાર્યવાહી કરવામાં આવી છે.

આ ઉપરાંત 31 ડિસેમ્બર સુધી પ્રોહીબીશન તથા ડ્રગ્સ અનુસંધાનેની આ કાર્યવાહી ચાલુ રાખવામાં આવનાર છે તેમજ મોરબી જિલ્લામાં પ્રવેશતા રસ્તાઓ ઉપર 10 થી વધુ આંતર જીલ્લા ચેકપોસ્ટ કાર્યરત કરવામાં આવેલ છે જે તમામ ચેકપોસ્ટ ઉપર સઘન અને કડક વાહન ચેકીંગ કરી બ્રેથએનેલાઇઝર ઇક્યુટમેન્ટ દ્વારા ડ્રંક એન્ડ ડ્રાઇવના કેસો કરવાની કાર્યવાહી કરવામાં આવનાર છે.

31 ડિસેમ્બર અનુસંધાને પોલીસની અલગ અલગ ટીમો બનાવી હોટલ, ધાબા, ગેસ્ટ હાઉસ, ફાર્મ હાઉસ તથા અંતરીયાળ વિસ્તારમાં આવેલ વાડીઓ, ખેતરો કે અવાવરૂ જગ્યાઓ ખાતે સઘન ચેકીંગ કરી કોઇ પણ અનઅધિકૃત કૃત્ય જણાય આવ્યે કાયદેસરની કાર્યવાહી હાથ ધરવામાં આવશે તેમજ આગામી દિવસોમાં તહેવારની ઉજ્જવણી શાંતિપૂર્ણ રીતે થાય તે માટે જિલ્લામાં 2 ક્યુઆરટી, એલસીબી અને એસઓજીની અલગ અલગ મહતમ માણસોની ટીમો બનાવી સેન્સેટીવ એરીયામાં રાઉન્ડ ધ કલોક પેટ્રોલીંગ કરવામાં આવશે.

કોઈ કેફી દ્રવ્યનું સેવન કરતું હોય કે હેરાનગતિ કરતું હોય તો પોલીસનો સંપર્ક કરો: SP
મોરબી જિલ્લા પોલીસ વડા રાહુલ ત્રિપાઠી દ્વારા જાહેર જનતાને અપીલ કરવામાં આવી છે કે, આગામી 31 ડિસેમ્બરની ઉજવણી તમામ પ્રજાજનો શાંતિપુર્વક અને ટ્રાફીકને અડચણરૂપ ન થાય તે રીતે તેમજ મોડી રાત્રીના સમયે લાઉડ સ્પીકરનો ઉપયોગ ન કરવા અપીલ છે. આપની આજુબાજુમાં કોઇ કેફી દ્રવ્યનું સેવન, વેચાણ કે હેરાફેરી થતી હોય તો તુરંત પોલીસ કંટ્રોલરૂમનો અથવા નજીકના પોલીસ સ્ટેશનનો સંપર્ક સાધવો. આજુબાજુના એરીયામાં કોઇ અસામાજીક તત્વો કોઈપણ જાતની હેરાનગતી કે ટોળાશાહી કરતા હોય સુલેહ શાંતિનો ભંગ કરવાની તૈયારી કરતા હોય તો તુરંત જ પોલીસ કંટ્રોલરૂમનો અથવા નજીકના પોલીસ સ્ટેશનનો સંપર્ક સાધવો. માહીતી આપનારનું નામ ગુપ્ત રાખવામાં આવશે.