મનપાની રૂટીન થઇ ગયેલી કામગીરી: માર્ગો પરથી ફરી દબાણો દૂર કરાયા

ખાલી જગ્યાઓ પર દબાણો ખડકી દેનાર લોકો સામે તંત્રએ લાલ આંખ કરવી જરૂરી, દબાણ હટાવ્યા બાદ ફરી દબાણ ન થાય તે માટે તંત્રએ વ્યવસ્થા કરવી જોઇએ

ખાસ-ખબર સંવાદદાતા

રાજકોટ મહાનગરપાલિકાની દબાણ હટાવ શાખા દ્વારા તા. 20થી 25 સુધી શહેરમાં જુદી-જુદી જગ્યાએ જાહેર માર્ગો પર દબાણરૂપ એવા રેંકડી-કેબિન, અન્ય ચીજવસ્તુઓ, શાકભાજી-ફળ જપ્તી તેમજ પશુઓને આપવામાં આવતું લીલુ, બોર્ડ-બેનરો વગેરે જપ્ત કરવાની કામગીરી કરવામાં આવી હતી.

તંત્ર દ્વારા લોકોને નડતરરૂપ દબાણોને દૂર કરાયા બાદ ફરી ખાલી જગ્યાઓ પર દબાણો ખડકી દેનાર લોકો સામે તંત્રએ લાલ આંખ કરવી જરૂરી, દબાણ હટાવ્યા બાદ ફરી દબાણ ન થાય તે માટે તંત્રએ વ્યવસ્થા કરવી જોઇએ.
રસ્તા પર નડતર 16 રેંકડી-કેબિનો મવડી મેઈન રોડ, નાણાંવટી ચોક, ગાયત્રીનગર મેઈન રોડ, જ્યુબેલી રોડ, બાપુનગર ગાર્ડન, જંકશન રોડ, મોચીનગર, રવિરત્ન પાર્ક, પુષ્કરધામ મેઈન રોડ, સેટેલાઈટ રોડ પરથી જપ્ત કરવામાં આવી હતી. જુદી જુદી અન્ય 40 પરચુરણ ચીજવસ્તુઓ જપ્ત કરવામાં આવી હતી જે પટેલ ક્ધયા છાત્રાલય, યુનિવર્સિટી રોડ, જ્યોતિનગર, જ્યુબેલી માર્કેટ, બાપા સીતારામ ચોક, નંદનવન, પુષ્કરધામ પરથી જપ્ત કરવામાં આવી હતી. 215 કિ.ગ્રા. શાકભાજી ફળો કે જે જ્યુબેલી માર્કેટ, રેલનગર, જંકશન રોડ પર ઉપયોગમાં લઈ શકાય તેમ ન હતા તેને જપ્ત કરવામાં આવ્યા હતા તેમજ રૂા. 42,180 વહિવટી ચાર્જ મવડી જકાત નાકા, રામનાથપરા, ભાવનગર રોડ, બાપા સીતારામ ચોક, સહકાર મેઈન રોડ, સંત કબીર રોડ, રવિરત્ન રોડ, અમીન રોડ પરથી વસુલ કરવામાં આવ્યો હતો. રૂા. 1,63,394 મંડપ ચાર્જ જે કાલાવાડ રોડ, 150 ફૂટ રોડ, નાણાંવટી ચોક, જંકશન રોડ, ગોંડલ રોડ, સંત કબીર રોડ, મોરબી રોડમાંથી વસુલ કરવામાં આવ્યો હતો અને 212 બોર્ડ-બેનરો જે કોટેચા ચોક, કુવાડવા રોડ, ભક્તિનગર સર્કલ, યાજ્ઞિક રોડ પરથી જપ્ત કરવામાં આવ્યા હતા.