હાવડામાં રામનવમી હિંસા મામલે મમતા સરકાર એક્શનમાં: CID તપાસના આદેશ

CID ના સ્પેશિયલ ઓપરેશન ગ્રૂપ સહિત અનેક બ્રાન્ચ તપાસમાં સામેલ થશે

ખાસ-ખબર સંવાદદાતા
પશ્ચિમ બંગાળના હાવડામાં થયેલી હિંસા બાદથી રાજનીતિ પોતાના ચરમ પર પહોંચી છે. આ વચ્ચે હવે મોટા સમાચાર સામે આવ્યા છે કે, પશ્ર્ચિમ બંગાળના હાવડામાં રામનવમીના દિવસે થયેલી હિંસાની CID તપાસ કરશે. રાજ્ય સરકારે ઈઈંઉ તપાસનો આદેશ આપ્યો છે. વિસ્તારમાં પોલીસ પેટ્રોલિંગ વધારી દેવામાં આવ્યુ છે. CID ના સ્પેશિયલ ઓપરેશન ગ્રૂપ સહિત અનેક બ્રાન્ચ તપાસમાં સામેલ થશે. તેમાં ડીઆઈજી રેન્કના અધિકારીઓ હશે.

રાજ્યની પ્રમુખ વિપક્ષી પાર્ટી બીજેપીએ હિંસા મામલે મમતા સરકાર વિરુદ્ધ મોરચો ખોલી રાખ્યો છે. સીએમ મમતા બેનર્જી પર અનેક ગંભીર આરોપ લગાવ્યા છે. કેન્દ્રીય મહિલા અને બાળ વિકાસ મંત્રી સ્મૃતિ ઈરાનીએ મમતા બેનર્જી પર શોભાયાત્રા દરમિયાન પથ્થરમારો કરનારાઓને ક્લીનચીટ આપવાનો આરોપ લગાવ્યો છે. તેમણે કહ્યું કે, સવાલ એ છે કે, મમતા ક્યાં સુધી હિંદુ સમુદાય પર હુમલા કરતી રહેશે.

હાવડામાં હિંસાને લઈને ભાજપ મમતા સરકાર પર પ્રહારો કરી રહી છે. ભાજપના નેતા શુભેંદુ અધિકારીએ પણ હાવડા હિંસામાં વિદેશી ષડયંત્ર હોવાનું જણાવીને આ મામલે સીબીઆઈ તપાસની માંગ કરી હતી. તેમણે કહ્યું હતુ કે, બંગાળમાં કાયદો અને વ્યવસ્થા સંપૂર્ણપણે નિષ્ફળ ગઈ છે.