વીરબાઇ મહિલા કોલેજની બન્ને વિદ્યાર્થિનીએ કરેલી ફરિયાદના અઢીમાસ બાદ પગલાં લેવાયા
18 વર્ષથી પ્રોફેસર ફરજ બજાવે છે ભૂતકાળમાં પણ પ્રોફેસરે કળા કરી હશે?
- Advertisement -
હવે પ્રોફેસર સામે ફરિયાદ નોંધવા ટ્રસ્ટ કરશે કાર્યવાહી
સૌરાષ્ટ્ર યુનિવર્સિટીમાં જાતીય સતામણીના ત્રણ કિસ્સામાં ત્રણેય અધ્યાપકોને ફરજ મુકતા કરાયા હતા ત્યારે યુનિવર્સિટી સંલગ્ન વીરબાઇ મહિલા સાયન્સ કોલેજમાં બે વિદ્યાર્થિનીએ કરેલી જાતીય સતામણીની ફરિયાદમાં પ્રોફેસર દોષિત ઠર્યા છે અને તેથી તેમને સસ્પેન્ડ કરાયા હવે પોલીસ ફરિયાદ નોંધાશે.
પ્રાપ્ત માહિતી મુજબ કાલાવડ રોડ પરની વીરબાઇમા મહિલા સાયન્સ કોલેજના એસોસીએટ પ્રોફેસર એવા ઝૂલોજીના ડો.સંજય તેરૈયા સામે સેક્ધડ યર બી.એસસી.માં અભ્યાસ કરતી વિદ્યાર્થિનીએ 16-9-2022ના જાતીય સતામણીની ફરિયાદ કરી હતી. ત્યારબાદ તે જ કોલેજની ત્રીજા વર્ષની વિદ્યાર્થિનીમાં પણ હિંમત આવી અને તેણે ગત 12-10-2022ના અધ્યાપક સામે પ્રિન્સીપાલ સમક્ષ અરજી કરી. અરજી આવતાની સાથે જ કોલેજ પ્રિન્સિપાલે હીનાબેન શાહ, ભાવનાબેન ખોયાણી અને જયશ્રીબેન રાણપરા ઉપરાંત સિનિયર અધ્યાપક એ.પી.ગૌસ્વામીની તપાસ સમિતિ રચી. જેનો રિપોર્ટ સબમીટ થઇ ગયો છે અને તેમાં તે અધ્યાપક દોષિત ઠર્યા છે.
- Advertisement -
પ્રિન્સિપાલ કલ્પેશ ગણાત્રાએ જણાવ્યું કે 1971ના વર્ષમાં સ્થાપિત આ કોલેજમાં ડો.તેરૈયા 2004થી એટલે કે 18 વર્ષથી ભણાવે છે. જો કે આટલા વર્ષોમાં પ્રથમ વખત તેમની સામે જાતીય સતામણીની ફરિયાદ આવી. પ્રોફેસર દોષિત ઠરતા તેમને તાત્કાલિક અસરથી સસપેન્ડ કરાયા છે અને તેનો રીપોર્ટ સૌરાષ્ટ્ર યુનિવર્સિટીને મોકલી આપ્યો છે. યુનિવર્સિટીના કુલપતિ ડો.ગિરીશ ભીમાણીએ કહ્યું કે કોલેજ તરફથી બંધ કવરમાં રીપોર્ટ મળ્યો છે. કોલેજે કરેલી સસ્પેન્શનની પ્રક્રિયાને અનુમોદન આપીશું. ગ્રાન્ટેડ કોલેજ છે ત્યારે યુનિવર્સિટી હવે શિક્ષણ વિભાગને જાણ કરશે તેવું જાણવા મળે છે.
બંને વિદ્યાર્થિનીને વિશ્ર્વાસમાં લઇ પોલીસ ફરિયાદ કરાશે
મહિલા કોલેજમાં દીકરી સાથે જાતીય સતામણીની ઘટના ન જ થવી જોઇએ. જેથી અમે બે વિદ્યાર્થિનીની ફરિયાદ બાદ તાત્કાલિક તપાસ સમિતિ રચી અને સમિતિના રીપોર્ટમાં અધ્યાપક તેરૈયા દોષિત ઠરતા તેમને સસ્પેન્ડ કરાયા છે. કારણદર્શક નોટિસ પણ અપાઇ છે અને હવે બંને દીકરીઓને વિશ્વાસમાં લઇ પોલીસ ફરિયાદ કરવામાં આવશે તેમ વીરબાઇ કોલેજના ટ્રસ્ટી પુરુષોત્તમ પીપળીયાએ કહ્યું.
