દરરોજ કચેરી દ્વારા 300થી વધુ દાખલા કાઢી આપવામાં આવતા હોવાનો દાવો
ખાસ-ખબર ન્યૂઝ રાજકોટ
- Advertisement -
રાજકોટનું બહુમાળી ભવનના જાતિ અને આવકનો દાખલો કઢાવવા માટે 300થી વધુ વિદ્યાર્થીઓ અને વાલીઓની લાંબી લાઈન લાગી. વહેલી સવારે સાત વાગ્યાથી વિદ્યાર્થીઓ અને વાલીઓ લાઈનમાં ઉભા રહે છે. ત્યારે માંડ બપોરે વારો આવે છે. એડમિશનની પ્રક્રિયા ચાલતી હોવાથી દાખલો કઢાવવા આવતા અરજદારોને હાલાકી પડી રહી છે.
રાજકોટમાં બહુમાળી ભવનમાં સવારના 7 વાગ્યાથી જ જાતિના દાખલા કઢાવવા માટે લાંબી લાઈનો લાગી છે. ધોરણ 10-12નું પરિણામ આવ્યા બાદ આવક અને જાતિના સર્ટીફિકેટ લેવા માટે લોકોને કલાકો લાઈનમાં ઉભા રહેવુ પડે છે અને ભારે હાલાકી પડી રહી છે. બહુમાળી ભવન ખાતે ધોમધખતા તાપ વચ્ચે પણ વિદ્યાર્થીઓ અને વાલીઓ ક્રિમીલેયર અને આવકના દાખલા માટે લાંબી કતારોમાં ઉભા રહેવા મજબુર બન્યા છે.
દાખલા કઢાવવા માટેની ત્રણ ત્રણ બારીઓ હોવા છતા લાંબી કતારો લાગે છે. દરરોજ 300થી વધુ દાખલા કાઢી આપવામાં આવતો હોવાનો કચેરી દ્વારા દાવો કરવામાં આવી રહ્યો છે. ધોરણ 10 અને 12ના પરિણામ આવ્યા બાદ વિદ્યાર્થીઓને આગળના અભ્યાસ માટે એડમિશન મેળવવા ફોર્મ ભરવામાં આવકના તેમજ જાતિના પ્રમાણપત્રની જરૂર પડતી હોય છે. વિદ્યાર્થીઓએ નિયત સમય મર્યાદામાં ફોર્મ ભરવાનુ હોવાથી દાખલા કઢાવવા માટે લાંબી કતારો લાગી રહી છે. વહેલી સવારથી જ સેન્ટર પર મોટી સંખ્યામાં લોકો દાખલા કઢાવવા માટે લાઈનમાં ઉભા રહી જાય છે. ત્યારે તંત્ર દ્વારા પણ વધુ માણસો રાખી દાખલા કાઢી આપવાની પ્રક્રિયા ઝડપી બનાવવી જોઈએ. જેથી વિદ્યાર્થીઓને સમયસર દાખલા પણ રહે અને તેમને મુશ્કેલીનો સામનો પણ ન કરવો પડે. આ માત્ર રાજકોટની સ્થિતિ નથી, અમદાવાદ, સુરતમાં પણ આ જ સ્થિતિ જોવા મળી રહી છે, આવક, જાતિ, ક્રિમીલેયલ સર્ટીફિકેટ માટે રોજ સવારથી કચેરીઓમાં લાંબી લાઈનો લાગી રહી છે અને લોકો કલાકો સુધી તપ ધરે ત્યારે તેમને દાખલા મળી રહ્યા છે.
