ખાસ-ખબર ન્યૂઝ રાજકોટ
ગુજરાત સહિત દેશભરમાં ગણેશ મહોત્સવને લઈને લોકોમાં ઉત્સાહ જોવા મળી રહ્યો છે. ગણેશ મહોત્સવ દરમિયાન ગણપતિની પૂજાનું વિશેષ મહાત્મ્ય હોય છે ત્યારે રાજકોટમાં પણ સર્વેશ્ર્વર ચોક ખાતે ભવ્ય ગણપતિ મહોત્સવનું બેનમૂન આયોજન કરવામાં આવ્યું છે. તા. 7થી 17 દરમિયાન ભવ્ય આરતી, સાંસ્કૃતિક કાર્યક્રમો તેમજ વિવિધ કાર્યક્રમોની વણઝાર સર્વેશ્ર્વર ચોક ખાતે થશે. જેમાં મોટી સંખ્યામાં લોકો શ્રી ગણપતિના દર્શનાર્થે આવી ધન્યતા અનુભવશે.
- Advertisement -
રાજકોટ શહેર મધ્ય ડો. યાજ્ઞિક રોડ ઉપર આવેલા સર્વેશ્ર્વર ચોક ખાતે છેલ્લા આઠ વર્ષથી સર્વેશ્ર્વર ચોક ચેરિટેબલ ટ્રસ્ટ દ્વારા ગણપતિ મહોત્સવનું ભવ્ય આયોજન થાય છે જેમાં આ વર્ષે ગણેશ પંડાલ જોધપુર મારબલ ગોલ્ડન ઈફેક્ટ ઉપર આધારિત છે જે જોધપુરના માસ્ટર્સ દ્વારા બનાવવામાં આવેલી છે તથા ગણપતિ મહોત્સવની થીમ ગોલ્ડન મીરર આધારિત છે તેમજ જે રાજસ્થાનના કારીગરો દ્વારા બનાવવામાં આવેલી છે, જે સમગ્ર ડીઝાઈન ખોડલધામ ઈવેન્ટના અશોકભાઈ લુણાગરીયા દ્વારા તૈયાર કરવામાં આવેલી છે. આમ ગોલ્ડન મીરર થીમ પર આધારિત ગણપતિ મહોત્સવના દર્શન કરવા માટે રાજકોટની ધર્મપ્રેમી જનતા મોટી સંખ્યામાં ઉમટી પડશે.
સર્વેશ્ર્વર ચોક ચેરિટેબલ ટ્રસ્ટ દ્વારા ગણપતિ મહોત્સવમાં દરરોજ સવારે 8-30 કલાકે મંગળાઆરતી, સાંજે 7-45 કલાકે મહાઆરતી તથા રાત્રે 12-00 કલાકે શયનઆરતી કરવામાં આવે છે. દર વર્ષની જેમ આ વર્ષે પણ પ્રસાદ ઘર બનાવવામાં આવ્યું છે, જેમાં દરેક દિવસ દરેક ભાવિકોને અલગ અલગ પ્રસાદ આપવામાં આવે છે. દરેક દિવસે 25000થી 30000 ભાવિકો દર્શનનો લાભ લે છે તથા પોતાની માનતા પૂરી કરે છે. દર વર્ષની જેમ આ વર્ષે પણ સર્વેશ્ર્વર ચોક ચેરિટેબલ ટ્રસ્ટ દ્વારા રૂા. 50,00,000નો વિમો લેવામાં આવ્યો છે. તા. 7-9ના રોજ સવારે 8-15 કલાકે ગણેશ ચતુર્થીના દિવસે સ્થાપના કરવામાં આવશે તથા રાત્રે 9-00 કલાકે સત્યનારાયણ ભગવાનની કથા રાખવામાં આવેલી છે. તા. 12-9ના રોજ વૃદ્ધાશ્રમનો આરતી તથા જમણવાર રાખવામાં આવ્યો છે. તા. 13-9ના રોજ અનાથ બાળકોનો જમણવાર તથા તા. 15-9ના બ્લડ ડોનેશન કેમ્પ તથા સાંજે 5-00 કલાકે અન્નકૂટ દર્શન રાખવામાં આવેલા છે. તો રાજકોટની ધર્મપ્રેમી જનતાને સર્વેશ્ર્વર ચોક ચેરિટેબલ ટ્રસ્ટ દ્વારા આમંત્રણ પાઠવાયું છે.
ગણપતિ મહોત્સવ તા. 7-9થી તા. 17-9 સુધી ચાલશે તેમજ સરકારના નિયમો મુજબ 9 ફૂટની ઊંચાઈની ઈકો ફ્રેન્ડલી મૂર્તિ બનાવવામાં આવી છે તથા વિસર્જન તા. 17-9ના રોજ પોલીસ કમિશનરની સૂચના અનુસાર આજી ડેમની બાજુમાં કરવામાં આવશે. આ મહોત્સવને સફળ બનાવવા સર્વેશ્ર્વર ચોક ચેરિટેબલ ટ્રસ્ટના તમામ સભ્યો જહેમત ઉઠાવી રહ્યા છે.
