ટંકારાના ધારાસભ્ય વિરૂદ્ધ હાઈકોર્ટમાં રીટ કરીને લલિત કગથરાએ પડકાર ફેંકયો

સોગંદનામામાં અનેક વિગતો છુપાવ્યા સહિત ક્ષતિ ભરેલું સોગંદનામું હોવાનો આરોપ
ખાસ-ખબર સંવાદદાતા
ગુજરાત વિધાનસભાની ચુંટણીના પરિણામો બાદ ટંકારા પડધરી બેઠક પરથી ચૂંટણી હારેલા કોંગ્રેસના ઉમેદવાર લલિત કગથરાએ હાઈકોર્ટમાં ઈલેક્શન પિટિશન કરીને ભાજપના વિજેતા ઉમેદવાર દુર્લભજી દેથરીયાએ સોગંદનામામાં અનેક ક્ષતિઓ રાખવાની સાથે ચૂંટણીપંચ સમક્ષ અનેક વિગતો છુપાવી હોવાનો આરોપ લગાવ્યો છે.
ટંકારા પડધરી વિધાનસભા બેઠકના પૂર્વ ધારાસભ્ય લલિત કગથરાએ નામદાર ગુજરાત હાઈકોર્ટમાં રિપ્રેઝન્ટેશન ઓફ ધ પીપલ એક્ટ-1951 હેઠળ અરજી કરેલી છે. આ અરજીમાં રિટર્નિંગ ઓફિસર સહિત ચુંટણી પંચને પક્ષકાર બનાવવામાં આવ્યા છે. લલિત કગથરાએ કરેલી અરજીમાં જણાવ્યું છે કે, ટંકારા બેઠક પરથી વિજેતા ઉમેદવારના ફોર્મ સાથે જોડાયેલા સોગંદનામામાં અનેક ભૂલો હતી. તેના શિક્ષણ અંગે કોઈ સ્પષ્ટતા કરેલી નથી, તેમની મિલકત અંગે યોગ્ય માહિતી આપી નથી, તેની પાસે કાર હોવા છતાં તે દર્શાવી નથી અને તેના ફોર્મમાં અનેક ખાના બાકી હતા. આ પ્રકારની અનેક ભુલો હોવા છતાં, રિટર્નિંગ ઓફિસરે તેના ફોર્મને રદ કર્યુ ન હતુ. આ ઉપરાંત આ અંગે રિટર્નિંગ ઓફિસરને રજૂઆત પણ કરાયેલી હતી છતાં રજુઆતમાં પરત્વે ધ્યાન આપવામાં આવ્યું ન હોવાનો આરોપ આ રિટ પીટીશનમાં કરવામાં આવ્યો છે.