રાજકોટમાં લગ્નપ્રસંગમાં ચોરી કરતી કડિયા સાસી ગેંગ ઝડપાઇ

મધ્યપ્રદેશના કડિયા-સાસી ગામમાં આવી ચોરી શીખવતી સ્કૂલ ચાલે છે!

ખાસ-ખબર ન્યૂઝ રાજકોટ, તા.14

રાજકોટમાં છેલ્લા કેટલાક સમયથી લગ્ન પ્રસંગોમાંથી ચોરી થવાના બનાવો વધ્યા હોય આ અંગેની તપાસ ક્રાઇમ બ્રાન્ચને સોંપાઈ હતી. ક્રાઇમ બ્રાન્ચે રાજકોટમાં બનેલી આવી ત્રણ ઘટનાઓનો ભેદ ઉકેલી નાખ્યો છે.

તપાસ દરમિયાન ખઙનાં કડીયા ગામમાં આ પ્રકારની ચોરીની તાલીમ આપવા માટેની શાળા ચાલતી હોવાનો ચોંકાવનારો ખુલાસો થયો છે. આ ગેંગને ઝડપી લેવા પોલીસે ખઙનાં વિવિધ ગામોમાં કેમ્પ કરી, વેશપલટો કરી આરોપીઓ અંગે માહિતી મેળવી હતી. અને ગેંગ રાજકોટ આવતી હોવાની જાણ થતાં માલિયાસણ ખાતે વોચ ગોઠવી આ ગેંગને દબોચી લીધી હતી. હાલ પોલીસે આરોપીઓની સામે કાયદેસરની કાર્યવાહી હાથ ધરી છે.સમગ્ર મામલે ક્રાઇમ બ્રાન્ચનાં ડીસીપી પાર્થરાજસિંહ ગોહિલે જણાવ્યું હતું કે, ક્રાઇમ બ્રાન્ચે લગ્ન પ્રસંગમાંથી કિંમતી ઘરેણાની ચોરીનાં નેટવર્કનો પર્દાફાશ કર્યો છે. આ કામના આરોપીઓ મધ્યપ્રદેશનાં કડીયા-સાસી ગામના રહેવાસી છે. આ ગામમાં એક આખી શાળા ચાલે છે. જે શાળામાં લોકોની નજર ચૂકવીને કઈ રીતે ચોરી કરી શકાય તેની તાલીમ આપવામાં આવે છે. ત્યાંની ગેંગ દેશના જુદા જુદા રાજ્યોમાં ફેલાયેલી છે. હાલ પોલીસે પાંચ મુખ્ય આરોપીઓ તેમજ એક બાળકિશોરી સહિત 6 આરોપીઓને ઝડપી લેવામાં આવ્યા છે. સ્વીફ્ટ કાર અને સોના ચાંદીનાં ઘરેણાં સહિત કુલ રૂ. 21.44 લાખનો મુદ્દામાલ કબ્જે કરવામાં આવ્યો છે. આ ગેંગનો તેમના વિસ્તારમાં ખોફ હોવાથી સ્થાનિક પોલીસની ખાસ મદદ મળી નથી.

આ છતાં ક્રાઇમ બ્રાન્ચે બે મહિનાથી સતત વોચ ગોઠવીને આ ગેંગને ઝડપી પાડી છે. આરોપીઓ ફોરવ્હીલ ગાડીમાં કિશોર કે કિશોરી સાથે નીકળી અલગ અલગ રાજયોમાં મોટા શહેરમાં પાર્ટી પ્લોટમાં લગ્નનું આયોજન થયું હોય તેવી જગ્યાએથી થોડે દૂર ગાડી રાખતા હતા.

આ ગાડીમાં કિશોર કે કિશોરી તથા તેની સાથે એક ગાઇડ તરીકે હોય જે બન્નેને લગ્નને અનુરૂપ કપડાં પહેરાવી પાર્ટીપ્લોટમાં મોકલી લગ્નમાં માણસની નજર ચુકવી દાગીના ચોરી કરીને બહાર નીકળી જતા હતા. જો કોઈનું ધ્યાન પડી જાય તો તેની સાથે ગાઈડ તરીકે રહેલી વ્યક્તિ બાળકે ભૂલથી બેગ લીધી હોવાનું જણાવી બેગ પરત આપી દેતો હતો જો સફળ થાય તો નાસી જઇ બનાવની જગ્યાથી 100-200 કી.મી. દૂર જઇ અન્ય શહેરમાં ફરીથી બીજા ગુન્હાને અંજામ આપતા હતા. દરમિયાન રાતવાસો મોટાભાગે ગાડીમાં જ કરતા હતા.

રાજસ્થાન, MP અને ગુજરાતમાં 41 જેટલી ચોરી કર્યાની કબૂલાત
ક્રાઇમ બ્રાન્ચ દ્વારા ઝડપાયેલી ગેંગે રાજકોટ શહેરમાં બે ગ્રામ્ય વિસ્તારમાં 1 તેમજ અમદાવાદ ઉપરાંત મધ્યપ્રદેશ અને રાજસ્થાનમાં મળી 44 ચોરીને અંજામ આપ્યો હોવાનું ખુલ્યું છે.

રાજકોટમાં બે ગુનાના ભેદ ઉકેલાયા
પ્રથમ ફરિયાદ નવેમ્બર 2023માં નોંધાઈ હતી. જેમાં જામનગર રોડ પર આવેલા ધંટેશ્વરપાર્ક ખાતે લગ્નપ્રસંગમાંથી પર્સ ઉઠાવી સોના/ચાંદીના દાગીના સહિત કુલ રૂ.12 લાખની ચોરી થઈ હતી. ત્યારબાદ ફેબ્રુઆરી 2024માં નવા 150 ફુટ રિંગરોડ પર આવેલા અર્જુન પાર્ટીપ્લોટ ખાતેથી બેગની ઉઠાંતરી કરી સોના/ચાંદીના દાગીના તથા મોબાઇલ ફોન સહિત કુલ રૂ. 3.82 લાખની ચોરી થઈ હતી.

પકડાયેલા છ આરોપીના નામ અને સરનામા

– એસકુમાર ધરમસિંહ સીસોદીયા ઉ.વ. 45 ગુલખેડી (મધ્યપ્રદેશ)
– સોનુ ઉર્ફે દિપક ભેરૂસિંહ સીસોદીયા ઉ.વ.26 કડીયા – સાસી (મધ્યપ્રદેશ)
– વિવેક જયનારાયણ સીસોદીયા ઉ.વ.26 કડીયા – સાસી (મધ્યપ્રદેશ)
– રૂત્વીક ઉર્ફે કાલા મહેશ ઉર્ફે જીંગા સીસોદીયા ઉ.વ.18 કડીયા – સાસી (મધ્યપ્રદેશ)
– ગોમતી દિલીપસીંહ સીસોદીયા ઉ.વ.36 કડીયા – સાસી (મધ્યપ્રદેશ)
– એક બાળકિશોરી (18 વર્ષથી ઓછી વયની છોકરી)