ઓસ્ટ્રેલિયાથી આવેલી પરિણીતાના મોહમાં જીવ ગુમાવ્યો
ખાસ-ખબર ન્યૂઝ જૂનાગઢ, તા.5
- Advertisement -
જૂનાગઢ શહેરના રાયજીબાગ વિસ્તારમાં એક પરિણીત યુવકે એકતરફી પ્રેમમાં પાગલ થઈને પોતાની જાતને આગ ચાંપી આત્મહત્યા કરી લેતા સમગ્ર જૂનાગઢમાં ચકચાર મચી ગઈ છે. ઓસ્ટ્રેલિયાથી વતન આવેલી એક પરિણીત યુવતીના પ્રેમમાં અંધ બનેલા કાપડના વેપારીએ આ આત્મઘાતી પગલું ભર્યું હતું.
મળતી માહિતી મુજબ, રાયજીબાગ ગેઈટ પાસે આવેલા કોમ્પ્લેક્સમાં કાપડની દુકાન ધરાવતો યુવક જબીર કાદરી ગુલામનબી કાદરી છેલ્લા કેટલાક સમયથી એક પરિણીતાના એકતરફી પ્રેમમાં હતો. આ યુવતી હાલ ઓસ્ટ્રેલિયામાં રહે છે અને થોડા સમય માટે જૂનાગઢ વતન આવી હતી. ગતરોજ આ યુવક યુવતીના રહેણાંક વિસ્તાર પાસે પહોંચ્યો હતો અને ત્યાં પોતાના શરીર પર જ્વલનશીલ પદાર્થ છાંટી અગ્નિસ્નાન કરી લીધું હતું. ગંભીર રીતે દાઝી ગયેલા હાલતમાં યુવકને તાત્કાલિક હોસ્પિટલ ખસેડવામાં આવ્યો હતો, જ્યાં ટૂંકી સારવાર બાદ તેનું મોત નીપજ્યું છે. મૃતક યુવક પોતે પરિણીત હતો અને તેને બે સંતાનો પણ છે. પોલીસની પ્રાથમિક તપાસમાં બહાર આવ્યું છે કે, યુવક અને તે યુવતી વચ્ચે છેલ્લા 14 વર્ષથી પરિચય હતો. યુવક યુવતીના પ્રેમમાં એટલો પાગલ હતો કે અગાઉ પણ તેણે ગળાફાંસો ખાઈને જીવન ટૂંકાવવાનો પ્રયાસ કર્યો હતો. આ ઘટનાની જાણ થતા જ પોલીસ કાફલો ઘટનાસ્થળે દોડી ગયો હતો. પોલીસે સીસીટીવી ફૂટેજ કબજે કર્યા છે અને અકસ્માતે મોતનો ગુનો નોંધી વધુ તપાસ હાથ ધરી છે. આ બનેલ બનાવ મામલે હોસ્પિટલ ખાતે લોકોના ટોળા એકત્ર થયા હતા અને પરિવાર જનોએ મૃતદેહ સ્વીકારવાનો ઇન્કાર કર્યો અને પરણિતા અને તેના પતિ વિરુદ્ધ ગુનો દાખલ કરવાની માંગ કરી હતી ત્યાર બાદ પોલીસની દરમિયાન ગિરી બાદ મામલો થાળે પડ્યો હતો જોકે હજુ અદિશામાં પોલીસ વધુ તપાસ સાથે કાર્યવાહી હાથધરી છે.
