વિવાદીત થઈને પાછા ખેંચાઈ ગયેલાં નવાઝુદ્દીન સિદ્દીકીના પુસ્તકમાં છે શું?

એન ઓર્ડિનરી લાઈફનો એકસ્ટ્રા ઓર્ડિનરી વિવાદ

શાહનામા
– નરેશ શાહ

કશુંક ખાવા માટે કે સસ્તી બસ કે મુંબઈની લોકલ ટ્રેનની ટિકિટ માટેના સુદ્ઘાં મારી પાસે પૈસા નહોતા… બધી જ દિશાઓમાંથી હતાશા મને ઘેરી વળી હતી. તમામ ખૂણેથી હું રિજેકટ થઈ ગયો હતો. સ્ત્રીઓ મને તરછોડી ચૂકી હતી. કાસ્ટીંગ ડિરેકટર્સ મને નકારી ચૂક્યા હતા. પાયાની જરૂરિયાત જેવા ભોજનના પણ સાંસા રહેતાં, હરરોજ… 2005થી 2007 વચ્ચે હું(મુંબઈમાં) ઘરવિહોણો હતો… મારો સંઘર્ષ કદી પૂરી ન થનારી કાળરાત્રિ જેવો લાંબો, વિકરાળ અને અનંત લાગતો હતો. દૂર દૂર સુધી અજવાળાંનું નામોનિશાન મને કળાતું નહોતું.

આ શબ્દો માઉન્ટેન મેન દશરથ માંઝી અને સહાદત હસન મન્ટોનું પાત્ર ભજવી ચૂકેલાં અને બાલ ઠાકરેનું કિરદાર પણ ભજવી ચૂકેલાં ટેલેન્ટેડ એકટર નવાઝુદ્દીન સિદ્દીકી (જન્મ : 1974)ના છે. મૂળ એ ઉતરપ્રદેશના બુધાના ગામનો કિશાન પુત્ર. એ ગામ જેની ઓળખ ગેહું (ઘઉં), ગન્ના (શેરડી) અને ગન (હથિયાર) તરીકેની હતી. આવી તળપદી અને ખરબચડી મિટૃીનું ફરજંદ એવો નવાઝુદ્દીન સિદ્દીકી 2017માં તેની ફિલ્મો (અને ભારતીય સમાજને ખળભળાવી ગયેલી મી ટૂ મુવમેન્ટ પહેલાં) કરતાં પણ વધુ ચર્ચાસ્પદ પોતાના પુસ્તક એન ઓર્ડિનરી લાઈફથી થઈ ગયો હતો. તેની ઓર્ડિનરી લાઈફની એબનોર્મલ જેવી વાતોએ એકસ્ટ્રા ઓર્ડિનરી ભૂચાલ મચાવી દીધો હતો.

રૂની ગાંસડીમાં પડેલાં તિખારા પછી થતાં ભડકા બાદ કોઈનું ધ્યાન આકર્ષક આતશબાજી પર રહેતું હોતું નથી એવું જ દમદાર એકટર નવાઝુદ્દીન સિદ્દીકીની સ્મરણગાથા કહેતાં પુસ્તક એન ઓર્ડિનરી લાઈફ સાથે થયું. એક રિ-કેપ એ કોન્ટ્રોવર્સીનો થઈ જાય. સાન ફ્રાન્સીસકો બેઈઝડ ભારતીય પત્રકાર-લેખિકા રિતુપુર્ણા ચેટરજી સાથે મળીને લખાવેલાં અને લખેલાં પુસ્તકની રિલીઝ પહેલાંના પ્રમોશનને ધ્યાનમાં રાખીને (કદાચ) તેના અમુક અંશનો પ્રચાર-પ્રસાર કરવામાં આવ્યો. અંગે્રજી ભાષી પુસ્તકોમાં આ કોમન ટ્રેન્ડ છે. પુસ્તકની અમુક હાઈલાઈટસ જેવી વાત કે એકાદ ચેપ્ટરને સ્મૂધલી રિલીઝ કરવાનું યા થવા દેવાનું. એ વાંચીને જાગતી ઉત્કંઠાનો લાભ પછી એ પુસ્તકના વેચાણનો મળે તેવું એક નિર્દોષ ગણિત તેની પાછળ હોય છે પણ ક્યારેક એ આડું પણ ફાટે છે.

સેક્રેડ ગેમ્સના ગણેશ ગાયતુંડેના કેસમાં એવું જ બન્યું. નવાઝભાઈનું આ પુસ્તકમાં તેમના લગ્ન પહેલાંની રિલેશનશીપ વિશેનુંએક આખું ચેપ્ટર છે, પોતાની એક્સ ગર્લફ્રેન્ડની વાતો આલેખતાં રિલેશનશીપ્સ નામનાં એ ચેપ્ટરમાં કથિત ત્રણ ગર્લફ્રેન્ડ સાથેના ઈન્ટિમેન્ટ સંબંધોની વાત વિગતવાર કરવામાં આવી છે, એ પણ નામોલ્લેખ સાથે. તેની બસ્સો નવ પાનાંની સ્મરણ ગાથામાં આ ચેપ્ટર માત્ર સાત પાનાનું છે પણ તેણે સાત જન્મારા સુધી (નવાઝને) યાદ રહી જાય તેવી ચર્ચા જગાવી. ચર્ચા જગાવવાની બદલે આ ચેપ્ટરે એવો દવ (જંગલની આગ) લગાડયો કે આખરે નવાઝુદ્દીન સિદ્દીકીએ માફામાફી કરવી પડી. એટલું જ નહીં, પેંગ્વિન વાઈકીંગ જેવા આંતરરાષ્ટ્રીય પ્રકાશન હાઉસે પ્રસિદ્ઘ કરેલાં પોતાના પુસ્તક એન ઓર્ડિનરી લાઈફ પુસ્તકને પાછું પણ ખેંચી લેવામાં આવ્યું.

ઓફિશ્યિલી અત્યારે તે માર્કેટમાં અવેલેબલ નથી. બેશક, વિવાદનો ગરમ તાવિથો પૂંઠને દઝાડી ગયો અને ભૂલચુક લેવી-દેવીના ન્યાયે પુસ્તક પાછું ખેંચી લેવામાં આવ્યું(2017) એ પહેલાં જો કે, અમુક અઠંગ વાચકોના હાથમાં એ ઓનલાઈન વેચાણથી પહોંચી ગયું હતું.

નવાઝુદ્દીન સિદ્દીકીએ નેશનલ સ્કૂલ ઓફ ડ્રામાના દિવસો દરમિયાનની પોતાની પ્રથમ ગર્લફ્રેન્ડ સુનીતા (યાદ રહે નવાઝે આખા ચેપ્ટરમાં સુનીતાની અટક સાથેનું આખું નામ લખ્યું નથી )ને ગણાવીને લખ્યું છે કે, સુનીતા હેડ ફોલન મેડલી ઈન લીવ વીથ મી. એ વખતે નવાઝમીયાં મુંબઈમાં મીરાંરોડ વિસ્તારમાં રહેતા હતા.

આ જ ચેપ્ટરમાં નવાઝુદ્દીન સિદ્દીકીએ ન્યુર્યોકની એક ખુબસુરત વેઈટ્રેસ અને ન્યુ જર્સીની સુઝાનની વાત પણ લખી છે. નવાઝ માટે સુઝાન મુંબઈ આવીને પોતાનો વિઝા અપડેટ કરાવ્યાં કરીને રહેતી હતી. આ મિસ લવલી નામની ફિલ્મનું શૂટિંગ (2010માં, આ ફિલ્મ ગેંગ્સ ઓફ વાસેપુર સાથે 2012માં રિલીઝ થયેલી ) ચાલતું હતું. મીસ લવલીની હિરોઈન નિહારીકા સીંધ હતી. નવાઝમીયાંએ શૂટીંગના દિવસોમાં જ નિહારીકા સાથેનાં સંબંધને એવી રીતે દર્શાવ્યા છે કે જાણે, નિહારીકા અત્યંત વ્યાકૂળ (બેતાબ) હોય નવાઝુદ્દીન સિદ્દીકી માટે.

એ વખતે નવાઝ બેચલર હતો એટલે તેની રિલેશનશીપ્સ કે અફેર માટે દેખીતી રીતે આપણને વાંધો ન હોવો જોઈએ, પણ એવું આપણે સુનિતા અને નિહારીકા સીંધ માટે હરગિઝ ન કહી શકીએ. એન ઓર્ડિનરી લાઈફ પુસ્તકની આ વાતો જાહેરમાં આવી કે તરત સુનિતા અને નિહારીકા, બન્નેએ સોશ્યલ મિડિયા પર નવાઝને ઉધડો લીધો. એ વાજબી પણ હતું. સહમતિથી બંધાયેલાં સંબંધોને પણ તમે લાગતી વળગતી વ્યક્તિ (એ જીવીત અને સ્વસ્થ હોય ત્યારે તો ખાસ)ની જાણ બહાર પબ્લિકલી બોલો – ચર્ચો કે લખો એ સાચુકલા સ્ટેટમેન્ટ કરતાં તો સ્ટંટ જ વધુ લાગે. નિહારીકા સીંધે તો જાહેર ર્ક્યું કે એ (નવાઝ) મારા ઘેર વહેલી સવારના આવ્યો હતો અને તેણે મારી કોઈ ના-નુકરને સાંભળી નહોતી. આખરે મેં પણ…

નેશનલ સ્કૂલ ઓફ ડ્રામા વખતની ગર્લફ્રેન્ડ (બુદ્ઘા મર ગયા, એક ચાલીસ કી લાસ્ટ લોકલ, સંકેત સીટી, લેટેસ્ટ કેદારનાથમાં કામ કરનારી) અભિનેત્રી સુનિતા રાજવરે તો નવાઝુદ્દીન સિદ્દીકી પર બદનક્ષ્ાીનો દાવો ઠોક્વાના સ્ટેટમેન્ટ સાથે કહ્યું કે, નવાઝ તો સિમ્પથી સીકર (સીમ્પથી મેળવવા કરવાની વિકૃતિ ધરાવતો) છે

આફટર ઓલ, પોતાના રિલેશનશીપ્સની વાતોથી આવેલા રિએકશન પછી નવાઝુદ્દીન સિદ્દીકીને ભાન અને જ્ઞાન થયું કે કલમ ખોટી કચરાઈ ગઈ છે એટલે માફી માંગીને પુસ્તક પાછું ખેંચી લેવામાં જ શાણપણ છે.