મોરબી મેડિકલ કોલેજમાં થયેલ અસહ્ય ફી વધારાથી વાલીઓ-વિદ્યાર્થીઓમાં ચિંતાનું મોજુ

GMERS સંચાલિત મેડિકલ કોલેજમાં કરવામાં આવેલ ફી વધારો પરત ખેંચવા ધારાસભ્યને રજૂઆત

ખાસ-ખબર સંવાદદાતા
હાલ મેડિકલ અભ્યાસ કરવા માટેની ફી ના ધોરણોમાં ખુબ જ અસમાનતા જોવા મળે છે. સરકારી મેડિકલ કોલેજમાં અભ્યાસ કરતા અને જીએમઈઆરએસ મેડિકલ કોલેજમાં અભ્યાસ કરતા વિદ્યાર્થીઓની ટકાવારીમાં માત્ર થોડા પોઈન્ટનો જ તફાવત હોય છે છતાં વિદ્યાર્થીઓને મસમોટી ફી ભરવી પડે છે એમાંય વળી હમણાં જ જીએમઈઆરએસ 13 મેડિકલ કોલેજોની સરકારી કવોટાની 67 ટકા એટલે કે 5.50 લાખ જ્યારે મેનેજમેન્ટ કોટાની 88 ટકા એટલે કે 17 લાખનો અચાનક જ અસહ્ય ફી વધારો કરવામાં આવ્યો છે જેના કારણે બાળકોનું ડોક્ટર બનવાનું સપનું માત્ર સપનું રહી જશે કારણ કે ટૂંક સમયમાં એટલી મોટી રકમની વ્યવસ્થા કરવી એ કોઈપણ વાલી માટે જે મધ્યમ વર્ગ છે એમના માટે અશક્ય છે.

અચાનક ફી વધારાને કારણે ગુજરાતના બે હજારથી વધારે મધ્યમ વર્ગના વિદ્યાર્થીઓ ડોકટર બનવાનું પોતાનું સપનું સાકાર નહીં કરી શકે માટે આ અસહ્ય ફી વધારાને અટકાવીને હજારો વિદ્યાર્થીઓનું ભાવી સુનિશ્ચિત કરવા ઘણાં બધાં વાલીઓ અને વિદ્યાર્થીઓએ ટંકારા પડધરીના ધારાસભ્ય દુર્લભજીભાઈ દેથરીયાને ગુજરાતના મુખ્યમંત્રીને અંગત ભલામણ કરવા આવેદન આપ્યું હતું. દુર્લભજીભાઈ દેથરીયાએ વિદ્યાર્થીઓ અને વાલીઓને વ્યવસ્થિત રીતે સાંભળ્યા હતા અને વિદ્યાર્થીઓના હિતમાં નિર્ણય આવે એ બાબતે પૂરતા પ્રયત્ન કરવાની ખાતરી આપી હતી.