રાજકોટમાં પ્રદેશ પ્રમુખની રેલી પહેલાં PMના ફોટો પર શાહી ફેંકાઈ

રાજકોટના બહુમાળી ચોક નજીક આવારા તત્વોએ સ્વાગતના બેનર પર શાહી ફેંકતા મામલો ગરમાયો

મનપાની ટીમ દ્વારા તાત્કાલિક બેનર હટાવી લેવાયું: પોલીસે કહ્યું- આ બાબતે હજી કોઈ ફરિયાદ મળી નથી
ખાસ-ખબર ન્યૂઝ રાજકોટ

ગુજરાત ભાજપના પ્રદેશ પ્રમુખ આજે રાજકોટની મુલાકાતે આવી રહ્યા છે. જગદીશ વિશ્ર્વકર્માના સ્વાગત માટે બેનરો લગાવવામાં આવ્યા છે. ત્યારે બહુમાળી ચોક નજીક એક બેનરમાં ઙખ મોદીના ફોટો પર કોઈ અજાણ્યા શખ્સોએ શાહી ફેંકી હતી. આ બાબત ધ્યાનમાં આવતા મહાનગરપાલિકા દ્વારા તાત્કાલીક બેનર દૂર કરી દેવામાં આવ્યું હતું. જ્યારે પોલીસે કહ્યું હતું કે, આ બાબતે હજી સુધી કોઈ ફરિયાદ મળી નથી. ફરિયાદ મળશે તો કાર્યવાહી કરવામાં આવશે.

પ્રાપ્ત વિગત મુજબ આજે ભાજપના નવનિયુક્ત પ્રદેશ અધ્યક્ષ જગદીશ વિશ્ર્વકર્મા રાજકોટની મુલાકાતે આવી રહ્યા છે. તેઓ રેસકોર્સ ખાતે કાર્યકર્તાઓનું સંબોધન કરવાના છે. જેને લઈને ગ્રીનલેન્ડ ચોકડીથી રેસકોર્સ સુધી તેમના સ્વાગત માટેના વિશાળ બેનરો લગાવવામાં આવ્યા છે. જેમાં બહુમાળી ચોક નજીક લગાવવામાં આવેલા એક બેનરમાં વડાપ્રધાન મોદીના ફોટામાં મોઢા ઉપર અજાણ્યા શખ્સોએ કાળી શાહી લગાવી છે. આ ઘટનાને લઈને રાજકારણ ગરમાયુ છે. જો કે બહુમાળી ચોક નજીક જગદીશ વિશ્ર્વકર્માના સ્વાગત માટે લગાવાયેલા બેનરમાં ઙખ મોદીની તસવીર પર શાહી ફેકાઈ હોવાનું ધ્યાન પર આવતા મનપાની ટીમ દ્વારા તાત્કાલીક ઘટનાસ્થળે પહોંચી બેનરને દૂર કરી દીધું હતું. રાજકોટ પ્રદ્યુમનનગર પોલીસ સ્ટેશન પીઆઇ વી.આર.વસાવાએ જણાવ્યું હતું કે, હાલમાં તત્કાલ અસરથી આ બોર્ડ જે તે જવાબદાર વ્યક્તિ દ્વારા હટાવડાવી દેવામાં આવ્યું છે. કોઈ ફરિયાદ મળી નથી. જો આ મામલે કોઈ પોલીસ ફરિયાદ કરવામાં આવશે તો ફરિયાદ નોંધી કાર્યવાહી હાથ ધરવામાં આવશે.

વિશ્ર્વકર્માના સ્વાગત માટે 20 હજારથી વધુ આગેવાનો અને કાર્યકરો ઉપસ્થિત રહેશે
જગદીશ વિશ્ર્વકર્મા ખાસ વિમાન મારફત રાજકોટ હિરાસર એરપોર્ટ પહોંચશે જયાં રાજકોટ મહાનગર-જિલ્લા તથા મોરબી જિલ્લા ભાજપના આગેવાનો સ્વાગત કરશે બાદમાં એરપોર્ટથી ગ્રીનલેન્ડ ચોક સુધી રાજકોટ-મોરબી જિલ્લાના કાર્યકર્તાઓ કાર-રેલીથી પ્રદેશ પ્રમુખનું નેતૃત્વ કરશે અને આ રેલી ગ્રીનલેન્ડ ચોક પહોંચ્યા બાદ રાજકોટ શહેર યુવા ભાજપ દ્વારા 1000 જેટલા બાઈક સાથે પ્રદેશ પ્રમુખને આવકારી તેઓને બાઈક રેલીના આગેવાનીમાં રેસકોર્ષ સુધી લઈ આવશે જ્યાંથી સીધા સભા સ્થળે પહોંચશે. રાજકોટ શહેર ભાજપ દ્વારા પ્રદેશ પ્રમુખને આવકાર આપવા માટે ખાસ કાર્યક્રમ યોજવામાં આવ્યો છે અને તેમાં 20 હજારથી વધુ આગેવાનો અને કાર્યકરો ઉપસ્થિત રહે તેવી શકયતા સેવાઈ રહી છે. રાજકોટના રેસકોર્સ મેદાન ખાતે સાંજે 5:30 વાગ્યાથી સભા યોજવામાં આવનાર છે. પ્રદેશ પ્રમુખ તરીકે તેઓ પ્રથમ વખત રાજકોટ આવી રહ્યા છે અને તેમના સત્કાર માટે રાજકોટ શહેર જિલ્લા અને મોરબી જિલ્લાના કાર્યકરો ઉપસ્થિત રહેશે.