ઓઈલ ટેન્કરો અને ભોંયરાઓ દ્વારા પ્રવેશતા પરદેશીઓ; દલાલો લાખો રૂપિયા પડાવતા હોવાનો ખુલાસો
અમેરિકા દેશ જ એવો છે કે ત્યાં જનાર દરેકેદરેક વ્યક્તિને ત્યાં જ રહી જવાની પ્રબળ ઈચ્છા જાગે છે. જો તમારે અમેરિકામાં કાયમ રહેવું હોય તો ઈમિગ્રન્ટ વિઝા મેળવવાની જરૂરિયાત રહે છે. ઈમિગ્રન્ટ વિઝા મેળવવા માટે તમારી લાયકાત યોગ્ય હોવી જોઈએ. તમારા પતિ યા પત્ની, માતા યા પિતા, ભાઈ યા બહેન અમેરિકન સિટિઝન હોવા જોઈએ. પતિ યા પત્ની ગ્રીનકાર્ડધારક હોય તો પણ ચાલે. પણ આ સર્વે તમારા લાભ માટે ઈમિગ્રન્ટ વિઝાનું પિટિશન દાખલ કરવા અને જરૂર પડે તો તમને અમેરિકામાં આર્થિક સહાય કરવા રાજી હોવા જોઈએ. અમેરિકા જવા ઈચ્છતા બધી જ વ્યક્તિઓ માટે આ શક્ય નથી હોતું. આ ઉપરાંત ઈમિગ્રન્ટ વિઝા એક વર્ષમાં અમુક સંખ્યામાં જ આપવામાં આવે છે. આ સર્વે કારણોસર અનેકો અમેરિકામાં ગેરકાયદેસર વસવાટ કરે છે. હજારો પરદેશીઓ એ દેશમાં ઘૂસણખોરી કરવાના પ્રયાસો કરે છે.
બિઝનેસ યા ટૂરિસ્ટ વિઝા, જે નોન-ઈમિગ્રન્ટ શ્રેણીના વિઝા છે અને જેની સંજ્ઞા ‘બી-1/બી-2’ છે, એ વિઝા ઉપર અમેરિકામાં પ્રવેશતાં ઈમિગ્રેશન ઓફિસરોને તમને ત્યાં છ મહિના રહેવા દેવાની પરવાનગી આપવાની છૂટ હોય છે. જો એવી કોઈ મુસીબત આવી પડે, એવા કોઈ કારણો હોય જેના લીધે તમને આપવામાં આવેલા સમય કરતાં તમારે વધારે સમય અમેરિકામાં રહેવાની જરૂરત આવી પડે તો તમે અરજી કરીને તમારો રહેવાનો સમય એકંદરે બધું મળીને એક વર્ષ સુધી લંબાવી શકો છો. એક વર્ષ બાદ તમે બી-1/બી-2 વિઝા ઉપર વધુ સમય અમેરિકામાં રહી નથી શકતા. અનેક પરદેશીઓ બી-1/બી-2 વિઝા અથવા તો અન્ય પ્રકારના નોન-ઈમિગ્રન્ટ વિઝા મેળવીને અમેરિકામાં પ્રવેશે છે. એમને ત્યાં રહેવા માટે જેટલો સમય આપવામાં આવ્યો હોય એ પૂરો થતાં તેઓ અમેરિકા છોડીને સ્વદેશ પાછા ચાલ્યા નથી જતા. તેઓ ત્યાં જ ગેરકાયદેસર રહી જાય છે. ઘૂસણખોરીનો આ સૌથી મોટો અને સહેલો પ્રકાર છે.
અનેકો જૂઠાણાં આચરીને, બનાવટી સર્ટિફિકેટો રજૂ કરીને, ખોટું બોલીને, છેતરપિંડી આચરીને અમેરિકામાં પ્રવેશે છે અને પછી ત્યાં ગેરકાયદેસર રહી જાય છે. જેઓ આવું કરી નથી શકતા તેઓ કેનેડામાંથી બોર્ડર ક્રોસ કરીને અમેરિકામાં ઘૂસવાનો પ્રયત્ન કરે છે. કડકડતી ઠંડીમાં, હાડ થીંજાવી નાખે એવા વાતાવરણમાં, ઘૂંટણ સુધી બરફમાં પગ ખૂંચી જાય એવા બરફીલા રસ્તામાં ચાલીને લોકો અમેરિકામાં ઘૂસણખોરી કરવાના પ્રયત્નો આદરે છે. મેક્સિકોની સરહદ ઉપરથી પણ અનેકો પગપાળા ચાલીને, ભોંયરાઓ ખોદીને, ઓઈલ ટેન્કરોમાં છુપાઈને અમેરિકામાં ઘૂસવાના પ્રયત્નો આદરે છે. આમાંના થોડા ઘણા સફળ થાય છે. તો અનેકોના જીવ પણ જાય છે. ઘૂસણખોરીના કામમાં મદદ કરનાર ટોળકીઓ આવી વ્યક્તિઓ પાસેથી લાખો રૂપિયા પડાવે છે.
અનેકો અમેરિકન સિટિઝનો યા તો ગ્રીનકાર્ડધારકો જોડે લગ્ન કરીને અમેરિકામાં પ્રવેશીને ગ્રીનકાર્ડ મેળવે છે. ત્યાર બાદ જે અમેરિકન વ્યક્તિ જોડે એમણે લગ્ન કર્યા હોય એમનાથી તેઓ ડિવોર્સ લઈને છૂટા પડી જાય છે. આવી ઘૂસણખોરીને અટકાવવા અમેરિકાએ ‘ધ મેરેજ ફ્રોડ એમેન્ડમેન્ટ એક્ટ’ ખાસ ઘડ્યો છે. તેમ છતાં પરદેશીઓ આવા બનાવટી લગ્નો કરતા ખચકાતા નથી.
અનેક પરદેશી સ્ત્રીઓ ગર્ભવતી થતાં જ્યારે એમનો ગર્ભ ફક્ત ત્રણ-ચાર મહિનાનો હોય ત્યારે બી-1બી-2 વિઝા ઉપર અમેરિકામાં ફરવા જવું છે એવું જણાવીને પ્રવેશે છે. પછી એમનાં બાળકને અમેરિકાની ધરતી ઉપર જન્મ આપે છે, જેથી અમેરિકાના ચૌદમાં બંધારણમાં જે સુધારો કરવામાં આવ્યો છે એનો લાભ એમના બાળકને મળે અને તેેઓ જન્મતાંની સાથે જ અમેરિકન સિટિઝન બની જાય. આ ‘બર્થ સિટિઝનશિપ’ને 20 જાન્યુઆરી, 2025ના દિવસે એક એક્ઝિક્યુટિવ ઓર્ડર દ્વારા બંધ કરવામાં આવી હતી, પણ અમેરિકાની કોર્ટોએ એ બંધના એક્ઝિક્યુટિવ ઓર્ડરને સ્થગિત કર્યો છે અને મામલો હવે કોર્ટમાં છે. હજારો-લાખો માતાઓએ આ બર્થ સિટિઝનશિપનો ગેરલાભ ઉઠાવ્યો છે.
અનેકો એમના સંતાનોને એમના સગાવહાલાઓ યા મિત્રો, જેમના લાભ માટે ઈમિગ્રન્ટ વિઝાના પિટિશનો દાખલ થયા હોય એમને દત્તક આપે છે, જેથી એમની જોડે જોડે એમણે દત્તક લીધેલાં બાળકને પણ અમેરિકાનું ગ્રીનકાર્ડ પ્રાપ્ત થાય છે.
અનેકો યેનકેન પ્રકારેણ મેક્સિકો યા કેનેડાની સરહદ ઓળંગીને અમેરિકામાં પ્રવેશે છે અને પછી અસાઈલમની માગણી કરે છે. એમના દેશવાસીઓ પ્રત્યે, દેશના રાજકર્તાઓ પ્રત્યે, પોલીસો માટે, ધર્મગુરુઓ માટે જૂઠાણાં આચરે છે. આ સર્વે અમને હેરાન કરે છે, અમારો જીવ જોખમમાં છે એવું ખોટેખોટું જણાવે છે અને અમેરિકામાં રહેવા માટે અસાઈલમની અરજી કરે છે. આ પણ ઘૂસણખોરીનો એક પ્રકાર જ છે. જે રોજના સેંકડો લોકો આચરે છે.
અમેરિકાના ઈમિગ્રેશનના કાયદાઓ હેઠળ કાયદેસર અમેરિકામાં આવવાના અનેક રસ્તાઓ છે. પણ એ સર્વે માટે યોગ્ય લાયકાતો હોવી જોઈએ. ઉપરાંત કાયદેસર અપાતાં ઈમિગ્રન્ટ વિઝા વાર્ષિક સંખ્યાની મર્યાદાથી સીમિત હોય છે. જ્યારે અમેરિકામાં એ સંખ્યા કરતાં અનેકગણા લોકો પ્રવેશવા ઈચ્છતા હોય છે. જો કાયદેસર અમેરિકામાં પ્રવેશવું હોય તો પુષ્કળ વાટ જોવી પડે છે. ખર્ચો પણ ખૂબ થાય છે.
આથી જ અનેકો કાયદેસર અમેરિકામાં પ્રવેશવાને લાયક હોવા છતાં ઘૂસણખોરીના ઉપલા માર્ગો અપનાવે છે.
અમેરિકા આજે વિશ્ર્વનો સૌથી આગળ પડતો દેશ છે. ત્યાંની યુનિવર્સિટીઓ વિશ્ર્વમાં સર્વે શ્રેષ્ઠ ગણાય છે. સિલિકોન વેલી તો કમ્પ્યુટર ઉદ્યોગ માટે જગજાહેર છે. અમેરિકામાં પગારનું ધોરણ ખૂબ ઊંચું છે અને વ્યાપારની પુષ્કળ તકો છે.
આથી વિશ્ર્વના લોકો અમેરિકામાં તરફ આકર્ષાય છે અને જેઓ કાયદેસર અમેરિકામાં જઈ શકે એમ ન હોય તેઓ ઘૂસણખોરીના ઉપલા માર્ગો અપનાવે છે. પણ જો તમારે અમેરિકામાં જવું હોય, તમારું અમેરિકન સ્વપ્નું સાકાર કરવું હોય તો ઘૂસણખોરી એ સાચો રસ્તો નથી. તમે જાણકારી પ્રાપ્ત કરો અને કાયદેસર જ અમેરિકામાં જાવ તો જ તમને એ દેશમાં પ્રાપ્ત થતા લાભો મળી શકશે.
