અયોધ્યામાં બનશે ભારતની સૌથી મોટી મસ્જિદ: મક્કાના ઈમામ નમાઝ અદા કરશે

-મસ્જિદનો પાયો રમઝાન પહેલા અયોધ્યામાં નાખવામાં આવશે

22 જાન્યુઆરી 2024ના રોજ અયોધ્યામાં રામ મંદિરનું ઉદ્ઘાટન થવાનું છે. આ દરમિયાન અયોધ્યામાં મસ્જિદનો શિલાન્યાસ કરવાના સમાચાર પણ સામે આવ્યા છે. રમઝાન પહેલા મસ્જિદનો પાયો નાખવામાં આવશે. અહીં પ્રથમ નમાઝ મક્કાના ઈમામ અબ્દુલ રહેમાન અલ સુદાઈસ અદા કરશે.

ભાજપના નેતા હાજી અરાફત શેખે શુક્રવારે આ માહિતી આપી હતી. હાજી અરાફાત શેખને મસ્જિદ વિકાસ સમિતિના અધ્યક્ષ બનાવવામાં આવ્યા છે. તેમણે કહ્યું કે, મસ્જિદનું નામ મોહમ્મદ બિન અબ્દુલ્લા – મોહમ્મદ પયગંબરના નામ પર રાખવામાં આવશે.

વિશ્વની સૌથી મોટી કુરાન મસ્જિદમાં રાખવામાં આવશે
અરાફત શેખે કહ્યું કે, અયોધ્યાથી લગભગ 25 કિમી દૂર બનાવવામાં આવનાર મસ્જિદ ભારતની સૌથી મોટી મસ્જિદ હશે. તેમાં 21 ફૂટ ઉંચી અને 36 ફૂટ પહોળી દુનિયાનું સૌથી મોટું કુરાન રાખવામાં આવશે, જે 18-18 ફૂટ ખુલશે.બાબર તીર અને ભાલા સાથે આવ્યો હતો, તે અમારો આઇડોલ નથી
સમિતિના અધ્યક્ષે કહ્યું – અમે બાબરમાં માનતા નથી, બાબર તીર, તલવાર અને ભાલા લઈને આપણા દેશમાં આવ્યો હતો. એટલા માટે તે આપણો આઈડોલ ન બની શકે. અમે ગરીબ નવાઝને માનનારા લોકો છીએ, અમે પયગમ્બરને માનનારા લોકો છીએ. સરકારે અમને 5 એકર જમીન આપી હતી, અમે થોડી જમીન ખરીદી છે. આ પ્રોજેક્ટ કુલ 11 એકર જમીન પર બનાવવામાં આવશે.

મસ્જિદમાં હોસ્પિટલ, પુસ્તકાલય, માછલી ઘર બનશે
મસ્જિદ પરિસરમાં કેન્સર હોસ્પિટલ બનાવવામાં આવશે, જ્યાં દરેક ધર્મ અને સંપ્રદાયના લોકોને મફત સારવાર આપવામાં આવશે. જેના કારણે દેશમાં પ્રેમનો સંદેશો ફેલાશે. શાળા, સંગ્રહાલય અને પુસ્તકાલય બનાવવામાં આવશે. અહીં વેજ કિચન બનાવવામાં આવશે, જે અહીં આવનારા લોકોને ફ્રી ફૂડ આપશે. અહીં એન્જિનિયરિંગ, મેડિકલ અને ડેન્ટલ જેવી પાંચ કોલેજો બનાવવામાં આવશે. દુબઈ કરતા પણ મોટું માછલીઘર ત્યાં બનાવવામાં આવશે.

અરાફત શેખે કહ્યું કે, ભારત ઋષિ-મુનિઓનો દેશ છે, સંતોનો દેશ છે. ગરીબ નવાઝ દેશ છે. ફેબ્રુઆરી પછી સારો દિવસ જોઈને અમારા પીર રમઝાન પહેલા પાયો નાખશે. આ માટે મુંબઈથી ઈંટો મોકલવામાં આવશે. જ્યારે આ પ્રોજેક્ટ પાંચ-છ વર્ષમાં તૈયાર થઈ જશે, તો અમે ઈમામ-એ-હરમને ત્યાં પહેલી નમાઝ માટે બોલાવીશું.

મસ્જિદનું સ્ટ્રક્ચર તાજમહેલ કરતાં વધુ સુંદર દેખાશે. મસ્જિદમાં મોટા ફુવારા લગાવવામાં આવશે, જે સાંજ પડતાં જ ચાલુ થઈ જશે. આ સાથે જ નમાઝ શરૂ થશે, આ નજારો જોવા માટે ભવ્ય હશે. અહીં દરેક ધર્મના લોકોને આવવા દેવામાં આવશે.