મેલબોર્નમાં ભારતીય કોન્સ્યુલેટમાં તોડફોડ

ખાસ-ખબર ન્યૂઝ મેલબોર્ન, તા.12
ઓસ્ટ્રેલિયાના મેલબોર્નમાં ભારતીય કોન્સ્યુલેટમાં ફરી એકવાર તોડફોડ કરવામાં આવી છે. ગુરુવારે રાત્રે લગભગ 1:00 વાગ્યે દૂતાવાસના મેન ગેટ પર લાલ રંગના નિશાન જોવા મળ્યા.
આ ઘટના બાદ, કેનબેરા સ્થિત ભારતીય હાઈ કમિશને ઓસ્ટ્રેલિયન અધિકારીઓ સમક્ષ આ મુદ્દો ઉઠાવ્યો છે. આ દૂતાવાસ અગાઉ પણ આવી ઘટનાઓનો ભોગ બની ચૂક્યું છે. આંતરરાષ્ટ્રીય તણાવના સમયમાં પણ દિવાલો પર ઉશ્ર્કેરણીજનક સૂત્રો લખવામાં આવ્યા હતા.

વિક્ટોરિયા પોલીસના પ્રવક્તાએ જણાવ્યું હતું કે: “અમારું માનવું છે કે બુધવાર અને ગુરુવાર રાત્રિની વચ્ચે કોઈએ ઇમારતના મુખ્ય દરવાજા પર નિશાન બનાવ્યા હશે. આ ઘટનાની તપાસ હજુ પણ ચાલુ છે.”

પોલીસે હજુ સુધી કોઈ શંકાસ્પદ વ્યક્તિની ઓળખ થઈ છે કે નહીં તે જણાવ્યું નથી. તેમણે લોકોને અપીલ કરી છે કે જો કોઈને આ ઘટના અંગે કોઈ માહિતી હોય તો તેઓ આગળ આવે.
ભારતીય હાઈ કમિશને શુક્રવારે ડ પર જણાવ્યું હતું કે આ ઘટના ઓસ્ટ્રેલિયન અધિકારીઓ સાથે ઉઠાવવામાં આવી છે. તેમણે લખ્યું, ’મેલબોર્નમાં ભારતીય કોન્સ્યુલેટની દિવાલો પર બદમાશો દ્વારા કરવામાં આવેલી અપમાનજનક ટિપ્પણીઓ ઓસ્ટ્રેલિયન અધિકારીઓ સમક્ષ ઉઠાવવામાં આવી છે. દેશમાં ભારતીય રાજદ્વારી અને કોન્સ્યુલેટ ઇમારતો સાથે કર્મચારીઓની સલામતી સુનિશ્ર્ચિત કરવા માટે તમામ જરૂરી પગલાં લેવામાં આવી રહ્યા છે.