ભારત ત્રીજીવાર બન્યું ઝ20 વર્લ્ડ કપ ચેમ્પિયન

સતત બીજીવાર ટાઇટલ જીતનાર ભારત વિશ્ર્વની પ્રથમ ટીમ

ફાઇનલમાં ભારતે ન્યૂઝીલેન્ડને 96 રનથી હરાવ્યું: 2007, 2024 અને 2026 એમ ત્રણ વખત ટાઈટલ જીતનાર ભારત પ્રથમ દેશ બન્યો

ખાસ-ખબર ન્યૂઝ અમદાવાદ

અમદાવાદના નરેન્દ્ર મોદી સ્ટેડિયમ ખાતે રમાયેલી ઝ-20 વર્લ્ડ કપ 2026ની ફાઈનલમાં ભારતે ન્યુઝીલેન્ડને 96 રને હરાવી સતત બીજી અને કુલ ત્રીજી વખત વિશ્વ વિજેતા બની ઈતિહાસ રચ્યો છે. ટોસ હારીને પ્રથમ બેટિંગ કરતા ભારતે નિર્ધારિત 20 ઓવરમાં 5 વિકેટે 255 રનનો વિશાળ સ્કોર ખડક્યો હતો. જેના જવાબમાં ન્યુઝીલેન્ડની ટીમ 19 ઓવરમાં 159 રને ઓલઆઉટ થઈ ગઈ હતી. આ ઐતિહાસિક વિજય બદલ ભારતીય ટીમને ₹27 કરોડનું ઈનામ મળશે.
ભારત તરફથી પ્લેયર ઓફ ધ મેચ અને પ્લેયર ઓફ ધ ટુર્નામેન્ટ સંજુ સેમસને માત્ર 46 બોલમાં 5 ચોગ્ગા અને 8 છગ્ગા સાથે 89 રનની આક્રમક ઈનિંગ રમી હતી. ઓપનર અભિષેક શર્માએ ફાઈનલની સૌથી ઝડપી ફિફ્ટી (18 બોલમાં) ફટકારી કુલ 52 રનનું યોગદાન આપ્યું હતું, જ્યારે ઈશાન કિશને 54 રન ફટકાર્યા હતા. અંતિમ ઓવરમાં શિવમ દૂબેએ 24 રન ઝૂડી સ્કોરને 255 સુધી પહોંચાડ્યો હતો.
256 રનના લક્ષ્યનો પીછો કરવા ઉતરેલી ન્યુઝીલેન્ડની ટીમ ભારતીય બોલરો સામે લાચાર જણાઈ હતી. જસપ્રીત બુમરાહે 4 અને અક્ષર પટેલે 3 મહત્વની વિકેટો ઝડપી કિવી બેટરોને પેવેલિયન ભેગા કર્યા હતા. ન્યુઝીલેન્ડ તરફથી સેઈફર્ટે સર્વાધિક 52 રન કર્યા હતા, પરંતુ મિડલ ઓર્ડરના ધબડકાને કારણે ટીમ 159 રનમાં સમેટાઈ ગઈ હતી.