ખાસ-ખબર ન્યૂઝ રાજકોટ, તા.26
ઉનાળાની શરૂઆત થતાં જ લોકો આખા વર્ષના મસાલા ભરતા હોય છે. ગૃહિણીઓ મરચું, હળદર, ધાણાજીરું દળાવવા મસાલા માર્કેટ પહોંચે છે અને આખા વર્ષના મસાલા ભરે છે. પરંતુ આ વર્ષે મસાલા માર્કેટમાં દર વર્ષ જેટલી તેજી નથી દેખાઈ રહી. મસાલાના ભાવમાં ધરખમ વધારો થયો હોવાથી માર્કેટમાં સનકારો છવાઈ ગયો છે. મરચાના ભાવ ગતવર્ષ કરતા અધધ 100%નો વધારો જોવા મળે છે.
- Advertisement -
રાજકોટના નાના મવા રોડ, 80 ફૂટ રોડ, 150 ફૂટ રોડ, પેડક રોડ, કુવાડવા રોડ, નાણાવટી ચોક સહિતની અનેક જગ્યાઓ પર મસાલા માર્કેટ ભરાય છે. જો કે ગત વર્ષની સરખામણીએ આ વર્ષે મસાલાના ભાવમાં વધારો જોવા મળી રહ્યો છે. આ વર્ષે તમામ જાતના મરચાના ભાવમાં વધારો
થયો છે.
ગૃહિણીઓ દર વર્ષે મસાલા માર્કેટમાંથી મસાલાની ખરીદી કરી આખા વર્ષના મસાલા દળાવીને ભરતી હોય છે. પરંતુ આ વર્ષે તમામ જાતના મરચાના ભાવ આ વર્ષે ડબલ થઈ ગયા છે. કમોસમી વરસાદ અને ભેજ વાળા વાતાવરણના કારણે આ વર્ષે મરચાનું ઉત્પાદન ઓછું થયું છે. જેથી મરચાના અને અન્ય મસાલાના ભાવમાં ધરખમ વધારો થયો છે.
મરચાની સાથે સાથે જીરું અને હળદરના ભાવમાં પણ મોટા પ્રમાણમાં વધારો જોવા મળી રહ્યો છે. કમોસમી વરસાદ અને ભેજવાળા વાતાવરણના કારણે જીરાનું ઉત્પાદન ઓછું થયું છે જેને લઇને જીરાના ભાવ આસમાને છે. ગત વર્ષે જીરું 250 થી લઈને 330 રૂપિયા કિલો મળતું હતું. જે આ વર્ષે 350 થી લઈને 450 રૂપિયે કિલો મળી રહ્યું છે. તો હળદરના ભાવમાં પણ 20% જેટલો ભાવ વધારો થયો છે.
- Advertisement -
મસાલાના ભાવમાં મોટા વધારાને કારણે આ વખતે ગૃહિણીઓએ ગત વર્ષ કરતાં અડધા જ મસાલાની ખરીદી કરી છે. જેમકે દરવર્ષે 5 કિલો મરચું ભરતા હોય તો આ વર્ષે 3 કિલો મરચું ભરીને જ ગૃહિણીઓએ સંતોષ માનવો પડ્યો છે. ખાસકરીને મરચાના ભાવમાં ડબલ થતાં ગૃહિણીઓનું બજેટ ખોરવાયું છે. ખાસ કરીને મધ્યમ વર્ગના લોકોને આ મોંઘવારીને લઈને ભારે મુશ્કેલી પડી રહી છે. તો મસાલાના ભાવમાં અસહ્ય ભાવવધારાને લઈને વેપારીઓને પણ મુશ્કેલી પડી રહી છે અને ગતવર્ષ કરતા ઘરાકી પણ ખૂબ ઓછી જોવા મળી રહી છે અને મસાલા માર્કેટ ખાલી જોવા મળી રહ્યું છે.
લાલ મરચાં સહિત અન્ય મસાલામાં અસહ્ય ભાવ વધારો, ગૃહિણીઓની આંખમાં લાવી રહ્યા છે પાણી
