ખાખરેચી ગામે લુખ્ખા તત્વોએ સ્મશાનના ખાટલામાં તોડફોડ કરીને તાંડવ મચાવ્યો

ખાસ-ખબર સંવાદદાતા
માળીયા મિંયાણા તાલુકાના ખાખરેચી ગામે રોડ ટચ નવ નાલા પાસે આવેલા સ્મશાનમાં રાત્રીના કોઈ અજાણ્યા લુખ્ખા તત્વોએ ચોરીના ઈરાદે લોખંડના ઘણ હથોડા લઈને સ્મશાન ભુમિ અંદર તાંડવ મચાવીને સ્મશાનમાં અગ્નિદાહ આપવાના લોખંડના ખાટલા તોડી તોડફોડ કરતા ગ્રામજનોમાં રોષ ભભૂકી ઉઠ્યો છે. ખાખરેચી નવ નાલા પાસે આવેલા સ્મશાનમાં વર્ષોથી એક ખાટલો હોય તાજેતરમાં બે નવા ખાટલા મુકી ડાઘુઓને ચોમાસામાં ગારા કીચડમાં ન જવું પડે જેથી આરસીસી તળીયુ બનાવી સ્મશાન અંદર સારી સુવિધાઓ ઉપલબ્ધ કરવામાં આવી હતી પરંતુ લુખ્ખા તત્વોઓએ સ્મશાનને નિશાન બનાવીને સ્મશાન અંદર ત્રણમાંથી એક ખાટલાને તોડીને વેરવિખેર કરી નાખતા વહેલી સવારે આ બનાવ ગ્રામજનોની નજરે પડતા મોટી સંખ્યામાં ગ્રામજનો દોડી ગયા હતા જ્યાંથી લોખંડના ખાટલાને તોડવા માટે હથોડા, પાના પકડ વગેરે હથિયારો મળી આવ્યા હતા. આ કૃત્યને ગ્રામજનોએ સખ્ત શબ્દોમાં વખોડી કાઢી ગ્રામજનોની લાગણીને ઠેસ પહોંચાડનાર અસામાજિક તત્ત્વોને પકડીને કાયદાના કડક પાઠ ભણાવવા માળીયા પોલીસ મથકે ખાખરેચી ગ્રામ પંચાયત દ્વારા લેખીત અરજી કરવામાં આવી છે.