અમેરિકામાં સદીનું સૌથી ભયાનક ચક્રવાત ઈડાલિયા ત્રાટક્યું, ચારેકોર તબાહીના દૃશ્યો

ખાસ-ખબર સંવાદદાતા
અમેરિકામાં આવેલા ચક્રવાતી તોફાન ઈડાલિયાએ કહેર મચાવ્યો છે. અમેરિકાના ચાર રાજ્યોમાં આ તોફાનથી ભારે તારાજી સર્જાઈ છે. સૌથી વધુ ફ્લોરિડા પ્રભાવિત થયું છે. બુધવારે ફ્લોરિડાના બિગ બેન્ડમાં લેન્ડફોલ કર્યા પછી, ઇડાલિયા વાવાઝોડાને કારણે બે લોકોના મોત થયા છે. ફ્લોરિડા બાદ આ તોફાન જ્યોર્જિયા, નોર્થ કેરોલિના અને સાઉથ કેરોલિના તરફ આગળ વધ્યું છે. જેના કારણે જ્યોર્જિયા અને ફ્લોરિડામાં લગભગ 4.5 લાખ લોકોના ઘરોમાં વીજળી નથી. ઇડાલિયા વાવાઝોડાને કારણે લગભગ 900 ફ્લાઇટ્સ રદ કરવામાં આવી છે.

લેન્ડફોલ સમયે, ચક્રવાત કેટેગરી 4 થી કેટેગરી 3માં ખસી ગયું હતું. જેના કારણે પવનની ઝડપ 200 કિમી પ્રતિ કલાક નોંધાયો હતો. હવામાન વિભાગના અધિકારીઓના જણાવ્યા અનુસાર ઈડાલિયા ફ્લોરિડાના 100 વર્ષના ઈતિહાસમાં સૌથી ખરાબ તોફાન છે. વાવાઝોડાને જોતા ચારેય રાજ્યોમાં ઈમરજન્સી લાદી દેવામાં આવી છે. અમેરિકામાં સૌથી મોટું ’વાવાઝોડું’ વર્ષ 1896માં આવ્યું હતું.

આ પહેલા બિગ બેન્ડમાં 1896માં આટલું મોટું ચક્રવાત ’સીડર કીઝ’ આવ્યું હતું. જેમાં 70 લોકોના મોત થયા હતા. તે ખૂબ જ શક્તિશાળી અને વિનાશક તોફાન હતું. આ પછી, 2016 માં હરિકેન હર્મિઓન બિગ બેન્ડ સાથે ત્રાટક્યું. નુકસાન ઓછું થયું હતું, પરંતુ એક વ્યક્તિએ જીવ ગુમાવ્યો હતો. બિગ બેન્ડના સ્થાનિક મેયરે કહ્યું છે કે તેનો પરિવાર પેઢીઓથી ત્યાં રહે છે, પરંતુ તેણે અહીં આવું ભયાનક તોફાન ક્યારેય જોયું નથી.