રાજકોટની બજારોમાં હોળી-ધૂળેટીની રંગબેરંગી રોનક

આવ્યો રંગ-ઉમંગનો પર્વ હોળી-ધૂળેટી

રંગ-ઉમંગનો પર્વ હોળી અને ધૂળેટીનો તહેવાર આવી ચૂક્યો છે, હોળી-ધૂળેટીના પર્વ નિમિત્તે રાજકોટ શહેરની બજારોમાં ધાણી-ખજૂર-મમરા, સીંગ-ચણા તેમજ શૂકનવંતા હાયડાનું વેચાણ થઈ રહ્યું છે. રંગોનો તહેવાર ધૂળેટીનું પર્વ જેમ-જેમ નજીક આવી રહ્યું તેમ-તેમ બજારોમાં રંગબેરંગી રંગોની રોનક ફેલાય રહી છે. ધૂળેટીના દિવસે રંગો અને પીચકારીનું મહત્વ હોવાથી બજારો અવનવા રંગો અને આકર્ષક પીચકારીઓથી છલકાઈ ગઈ છે.

જેમાં હનુમાનજીની ગદાવાળી પીચકારી, પોકીમોન પીચકારી ઉપરાંત બંદૂકો અને મોટી ટેંકવાળી પીચકારી બજારોમાં જોવા મળી રહી છે. બાળકો માટે અલગ-અલગ કાર્ટુન કેરેક્ટરવાળી પિચકારી, કલર, ફૂગ્ગા વગેરેની અઢળક વેરાયટીથી રાજકોટની સદર બજાર, ધર્મેન્દ્ર રોડ, ગુંદાવાડીની બજારો ઉભરાઈ ગઈ છે. મોટેરાઓ માટે આ વખતે બજારમાં અવનવા રંગો આવ્યા છે. ખાસ તો ચામડી અને શરીરને કોઈ નુકશાન ન થાય તે માટે હર્બલ કલરની ભારે ડિમાન્ડ છે. હોળી-ધૂળેટી નિમિતે ઘણા રિસોર્ટ-હોટેલમાં સ્પેશીયલ હોલી સેલિબ્રેશન પણ રાખવામાં આવ્યું છે. હોળી-ધૂળેટીને લઈ રાજકોટ સહિત સમગ્ર સૌરાષ્ટ્રનાં લોકોમાં અનેરો ઉત્સાહ-ઉમંગ જોવા મળી રહ્યો છે.