સૌરાષ્ટ્ર-કચ્છમાં ભારે વરસાદ શરૂ

અમદાવાદમાં વહેલી સવારથી ઝાપટાં, માંડવી-જામનગરમાં મેઘરાજાની તોફાની બેટિંગ, 24 કલાકમાં 61 તાલુકામાં દોઢ ઈંચ સુધી વરસાદ

રાજકોટમાં સવારથી વાદળછાયા વાતાવરણ વચ્ચે ધીમી ધારે વરસાદ: પોરબંદરમાં ભારે પવન સાથે વરસાદ શરૂ: આજે સૌરાષ્ટ્ર-કચ્છમાં ભારેથી અતિભારે વરસાદની આગાહી

ખાસ-ખબર સંવાદદાતા
બિપરજોય વાવાઝોડું આજે સાંજે ગુજરાતના દરિયાકાંઠે ટકરાશે, જેની અસર ગુજરાતભરમાં જોવા મળી રહી છે. આજે સવારથી જ અમદાવાદમાં કાળાં ડિબાંગ વાદળો છવાયાં છે તેમજ વરસાદી ઝાપટાં પણ શરૂ થયાં છે. શહેરના બોપલ, એસજી હાઇવે, નવાવાડજ સહિતના વિસ્તારોમાં સવારથી વરસાદી ઝાપટાં વરસી રહ્યાં છે. બીજી તરફ, કચ્છના માંડવીમાં તોફાની પવન સાથે સવારથી જ ધોધમાર વરસાદ શરૂ થયો છે,આથી રસ્તાઓ પર પાણી ફરી વળ્યાં છે.

ગુજરાતમાં છેલ્લા 24 કલાકમાં 61 તાલુકામાં દોઢ ઈંચ સુધી વરસાદ નોંધાયો છે. ખાસ કરીને આજે સૌરાષ્ટ્ર-કચ્છમાં ભારેથી અતિભારે વરસાદ પડશે. જામનગરના દરિયાકિનારે ભારે પવનની સાથે ધોધમાર વરસાદ પડી રહ્યો છે. દરિયાકિનારે ડરામણાં દૃશ્ર્યો જોવા મળી રહ્યાં છે. પોરબંદરમાં આજે વહેલી સવારથી ભારે પવન સાથે ધીમી ધારે વરસાદ શરૂ થયો છે, આથી રસ્તાઓ પાણી પાણી થઈ ગયા છે તેમજ પવનની ગતિ વધુ હોવાથી રસ્તા પર પસાર થતા વાહનચાલકોને ભારે મુશ્ર્કેલીનો સામનો કરવો પડી રહ્યો છે તેમજ ભુજમાં પણ સવારથી ધોધમાર વરસાદ પડી રહ્યો છે, આથી રસ્તાઓ પર પાણી ભરાઈ ગયા છે.

24 કલાકના વરસાદની વાત કરીએ તો અંજારમાં 30 મિમી, ભુજમાં 33 મિમી, માંડવીમાં 15 મિમી, મુંદ્રામાં 15 મિમી, નખત્રાણામાં 13 મિમી, રાપરમાં 16 મિમી, અબડાસામાં 11 મિમી, દાંતામાં 10 મિમી, ભચાઉમાં 9 મિમી સુધીનો વરસાદ નોંધાયો છે. આ સિવાય રાજકોટમાં પણ આજે સવારથી ધીમી ધારે વરસાદ પડી રહ્યો છે. ગુજરાતમાં જખૌ બંદર પાસે આ વાવાઝોડું ટકરાવાનું છે. 16 અને 17 જૂનના રોજ રાજ્યમાં ભારે વરસાદની આગાહી કરવામાં આવી છે.