આફ્રિકાના સૌથી વધુ વસ્તી ધરાવતા દેશમાં ખ્રિસ્તી અને મુસ્લિમો વચ્ચે વિભાજન વધી રહ્યુ છે
હુમલાખોરોએ સાંજે હુમલો કર્યો, બાર કલાક પછી બીજા દિવસે સવારે સલામતી દળોનું આગમન
- Advertisement -
હુમલાખોરોએ હત્યા કરેલા તમામ લોકો ખ્રિસ્તી હતા
ખાસ-ખબર સંવાદદાતા
નાઇજીરિયાના નોર્થ-સેન્ટ્રલ સ્ટેટમાં આવેલા અંતરિયાળ ગામડામાં બંદૂકધારીઓએ બે દિવસ કરેલા હુમલામાં 140થી વધુ ગ્રામીણોના મોત થયા છે. આ સામૂહિક હત્યાકાંડ માટે પશ્ર્ચિમી આફ્રિકન દેશમાં ખેડૂત કટોકટીને જવાબદાર માનવામાં આવે છે. હુમલાખોરોએ 17 વિવિધ સમુદાયોને નિશાન બનાવ્યા હતા. તેઓએ કોઈપણ પ્રકારની ઉશ્ર્કેરણી વગર હુમલો કર્યો હતો. સ્થાનિક સરકારી અધિકારીએ જણાવ્યું હતું કે અમે અત્યાર સુધીમાં 15ના અંતિમ સંસ્કાર કર્યા છે. બોક્કોસમાં અમે હજી પણ લાશોની ગણતરી કરી રહ્યા છીએ તે જોતાં સોથી નીચો આંકડો હોય તેવી જરા પણ સંભાવના નથી. બીજા ગ્રામીણ વિસ્તારમાં મરેલા લોકોની તો હજી સુધી જાણકારી લેવાની બાકી છે.
એમ્નેસ્ટી ઇન્ટરનેશનલ નાઇજીરિયા ઓફિસે જણાવ્યું હતું કે ખ્રિસ્તી પ્રભુત્વવાળા બોક્કોસ અને બાર્કિન લાડીના સ્થાનિક સરકારના વિસ્તારમાં 140ના મોત તો નિશ્ર્ચિત મનાય છે. સ્થાનિક અધિકારીઓને ડર છે કે બંદૂકધારીઓએ જે રીતે બે દિવસ સુધી હિંસા કરી અને હજી પણ જે પ્રકારની બેહિસાબ મૃતદેહો છે તે જોતાં આ આંકડો નોંધપાત્ર પ્રમાણમાં ઊંચો જઈ શકે છે. કેટલાક સ્થાનિકોએ જણાવ્યુ હતું કે સુરક્ષા એજન્સીઓ આવી તેના પહેલા 12 કલાકથી પણ વધુ સમય સુધી તેઓએ હિંસા આચરી હતી. સાંજે છ વાગ્યાથી આ હિંસક હુમલાનો પ્રારંભ થયો હતો, પરંતુ સુરક્ષા દળ બીજા દિવસે સવારે સાત વાગે અમારે ત્યાં આવ્યા હતા, એમ બોક્કોસના યુવા નેતાએ જણાવ્યું હતું.મ્બોમમ્બારુ ગામમાં મારા ભાઈ સહિત કમસેકમ 27 માર્યા ગયા છે, એમ તેણે જણાવ્યું હતું. આ હુમલાની જવાબદારી લેવા માટે કોઈ તૈયાર નથી. તેઓ આ હુમલા માટે સ્થાનિક કબીલા ફુલાની ટ્રાઇબને જવાબદાર ઠેરવે છે. તેમના પર સમગ્ર ઉત્તરપશ્ર્ચિમ અને મધ્ય પ્રાંતમાં હત્યાઓ કરવાનો આરોપ છે. આફ્રિકાના સૌથી વધુ વસ્તીવાળા દેશમાં ખ્રિસ્તીઓ અને મુસ્લિમો વચ્ચે વિભાજન વધી રહ્યું છે.આના લીધે આગામી સમયમાં અહીં સ્થિતિ વધુ કથળી શકે છે.