રાજકોટમાં 10 વર્ષથી સામ્રાજ્ય ખડકી ગુનાઓ આચરતા પેંડા ગેંગના 3 સગા ભાઈ સહિત 17 આરોપી સામે ગુજસીટોક

હત્યા, દુષ્કર્મ, આર્મ્સ એક્ટ, હત્યાની કોશિષ સહિત 108 ગંભીર ગુનામાં સંડોવણી: જેલમાં બંધ 11 આરોપીનો ટ્રાન્સફર વોરંટથી કબ્જો લેવાશે : બેની શોધખોળ : મિલ્કતો ટાંચમાં લેવાશે

મુરઘા ગેંગ સામે પણ ગુજસીટોક હેઠળ કડક કાર્યવાહી કરવા તરફ પોલીસનું પ્રયાણ
ખાસ-ખબર ન્યૂઝ રાજકોટ

રાજકોટમાં દસ વર્ષથી સામ્રાજગ ખડકી કાયદો-વ્યવસ્થાની ઐસી તૈસી કરી બેફામ ગુનાખોરી આચરતી પેંડા ગેંગ સામે અંતે રાજકોટ પોલીસે લાલ આંખ કરી છે મંગળા રોડ ઉપર ભડાકા કર્યા બાદ પોલીસ એક્શન મોડમાં આવી હોય તેમ આ ગેંગને હવે ડામી દેવાના ઇરાદે પોલીસે ગુજસીટોકનું હથિયાર તૈયાર કર્યું હતું અને રવિવારે પેંડા ગેંગના 3 સગા ભાઈ સહીત 17 આરોપીઓ સામે ગુજસીટોક હેઠળ ગુનો નોંધી ધોરણસરની કાર્યવાહી હાથ ધરી છે ઉપરોક્ત 17 આરોપીઓ સામે હત્યા, હત્યાની કોશિષ, દુષ્કર્મ, આર્મ્સ એક્ટ, રાયોટીંગ સહીત 108 જેટલા ગંભીર ગુનાઓ નોંધાઈ ચુક્યા છે 17 પૈકી 11 આરોપીઓ જેલમાં બંધ હોય તેનો ટ્રાન્સફર વોરંટથી કબ્જો લેવામાં આવશે જયારે બે શખ્સો ફરાર હોય તેની શોધખોળ હાથ ધરી છે આ ઉપરાંત મુરઘા ગેંગ સામે પણ ગુજસીટોક હેઠળ કાર્યવાહી કરવા તરફ પોલીસે પ્રયાણ કર્યું છે ઉપરોક્ત ગુનામાં આરોપીઓની મિલ્કત પણ ટાંચમાં લેવાશે.

રાજકોટ શહેર ક્રાઇમ ડીસીપી જગદીશ બાંગરવાએ વિગતો આપતા જણાવ્યું હતું કે, રાજકોટ શહેરના મંગળા રોડ પર પેંડા ગેંગ અને મુરઘા ગેંગ વચ્ચે સામસામે થયેલ ફાયરિંગ કેસ બાદ પોલીસ કમિશનર બ્રજેશ ઝા, એડિશનલ પોલીસ કમિશનર મહેન્દ્ર બગડિયા દ્વારા કડક કાર્યવાહી કરવા આપેલી સૂચના અન્વયે રાજકોટ શહેર ક્રાઇમ બ્રાન્ચ પીઆઇ મેહુલ ગોંડલીયા, એમ.એલ.ડામોર, ચિરાગ જાદવ, તથા પીએસઆઈ સી.બી.જાડેજા તથા એએસઆઈ ભરતભાઈ વનાણી, અશોકભાઈ કલાલ, રણજીતસિંહ પઢારીયા તથા પ્રતિકસિંહ રાઠોડ, ગિરિરાજસિંહ જાડેજા, પોપટભાઈ ગમારા, પ્રશાંત ચુડાસમા દ્વારા પેંડા ગેંગના 17 આરોપીઓ વિરુદ્ધ ગુજસીટોક હેઠળ ગુનો નોંધી કાર્યવાહી હાથ ધરવામાં આવી છે. ગુજસીટોકની તપાસ એસીપી ક્રાઇમ ભરત બસિયા ચલાવી રહ્યા છે. હાલ આ ગુનામાં પોલીસે કુલ 4 આરોપીઓ દિનેશ ઉર્ફે બચ્ચું ઉર્ફે મોટી ટિકિટ અરવિંદભાઈ ગોહેલ, જીજ્ઞેશ ઉર્ફે બાવકો ઉર્ફે નાની ટિકિટ અરવિંદભાઈ ગોહેલ, ચિરાગ ઉર્ફે બકાલી રાજેશભાઈ મકવાણા વિરુધ્ધ અને ચંદ્રેશ ઉર્ફે ચંદો બાબુભાઇ ગોહેલની ધરપકડ કરી છે જયારે 11 આરોપીઓ જેલમાં બંધ હોવાથી ટ્રાન્સફર વોરંટથી કબ્જો લઇ ધરપકડ કરવામાં આવશે અને અન્ય 2 આરોપી ફરાર હોય જેથી તેને ઝડપી પાડવા તપાસ તજવીજ ચાલુ છે આરોપીઓની મિલ્કત પણ ટાંચમાં લેવાશે તેવું અધિકારીએ જણાવ્યું હતું.

ક્યાં આરોપી સામે કેટલા ગુના
દિનેશ ઉર્ફે બચ્ચું ઉર્ફે મોટી ટિકિટ અરવિંદભાઈ ગોહેલ : ધમકી, મારામારી સહીત 10 ગુના
જીજ્ઞેશ ઉર્ફે બાવકો ઉર્ફે નાની ટિકિટ અરવિંદભાઈ ગોહેલ : મારામારી, ધમકી સહીત 9 ગુના
ચિરાગ ઉર્ફે બકાલી રાજેશભાઈ મકવાણા : હત્યાની કોશિષ, આર્મ્સ એક્ટ સહીત 8 ગુના
ચંદ્રેશ ઉર્ફે ચંદો બાબુભાઇ ગોહેલ : મારામારીના 3 ગુના
રણજિત ઉર્ફે કાનો ટિકિટ અરવિંદભાઈ ગોહેલ : દુષ્કર્મ, હત્યાની કોશિશ, એનડીપીએસ સહીત 10 ગુના
હિતેન્દ્રસિંહ ઉર્ફે હક્કોડી ભૂપતસિંહ જાડેજા : દુષ્કર્મ, એનડીપીએસ, આર્મ્સ સહીત 7 ગુના
પરીક્ષિત ઉર્ફે પરેશ ઉર્ફે પરિયો રાજુભાઈ બળદા : હત્યાની કોશિષ, રાયોટીંગ, આર્મ્સ સહીત 7 ગુના
રાજપાલસિંહ ઉર્ફે રાજો સુધીરસિંહ જાડેજા : હત્યા, રાયોટીંગ, આર્મ્સ એક્ટ સહીત 11 ગુના
હર્ષદીપસિંહ સાત્યકિસિંહ ઝાલા : હથિયાર, રાયોટીંગ, ધમકી
સહીત 7 ગુના
જીજ્ઞેશ ઉર્ફે ભયલુ દિનેશભાઇ રાબા : રાયોટીંગ, હથિયાર, મારામારી સહીત 11 ગુના
પરિમલ ઉર્ફે પરિયો ત્રિભોવનભાઇ સોલંકી : હથિયાર, ધમકી
સહીત 4 ગુના
દિનેશ ઉર્ફે કાંચો સંજયભાઈ ટમટા : ફાયરિંગ, મારામારી, રાયોટીંગ સહીત 8 ગુના
જૈવિક ઉર્ફે મોન્ટુ દિલીપભાઈ રોજાસરા : હત્યા, ફાયરિંગ સહીત 4 ગુના
કમલેશ વજુભાઇ મેતા : ફાયરિંગ, ધમકી સહીત 3 ગુના
સંજયસિંહ ઉર્ફે ચિન્ટુ મહેન્દ્રસિંહ ઉર્ફે જગતસિંહ ઝાલા : હથિયાર-મારામારી સહીત 6 ગુના

2015થી 2025 સુધીમાં એક વર્ષ ખાલી જવા દીધું નથી
પેંડા ગેંગ દ્વારા 2015થી ગુનાખોરી આચરવાનું શરુ કરવામાં આવ્યું હતું હાલ 2025નું વર્ષ ચાલી રહ્યું છે આ 11 વર્ષમાં એકપણ વર્ષ એવું નથી કે જે ખાલી ગયું હતું લગભગ દરેક વર્ષમાં ઉપરોક્ત ટોળકીએ કોઈને કોઈ ગુનો આચરીને પોલીસને પડકાર ફેંક્યો હતો 2016માં પોલીસમેનની હત્યા સહિતના ગંભીર ગુનાઓને અંજામ આપી ચુક્યા છે.

રાજકોટમા ક્રાઇમ રેઈટ ઊંચો લઇ જવામાં આ ટોળકીનો સિંહ ફાળો
11 વર્ષમાં હત્યા, હત્યાની કોશિષ, દુષ્કર્મ, હથિયાર, બળજબરીથી પૈસા કાઢી લેવા, મારામારી, માદક પદાર્થોનું વેચાણ કરવું, ગમે તેના ઘરમાં ઘુસી તોડફોડ કરવી, હથિયારો સાથે ધસી જઈ ભયનું વાતાવરણ ઉભું કરવું સહીત 108 જેટલા ગુના ઉપરોક્ત ટોળકી વિરુદ્ધ નોંધાઈ ચુક્યા છે આમ વાત કરીએ તો રાજકોટમાં ગુનાખોરીનો ગ્રાફ ઊંચો લઇ જવામાં આ ટોળકીનો સિંહફાળો રહ્યો છે.