પોક્સો ઍક્ટના ગુનામાં સજાનો હુકમ સસ્પેન્ડ કરી આરોપીને જામીન પર મુક્ત કરતી ગુજરાત હાઈકોર્ટ

ખાસ-ખબર ન્યૂઝ રાજકોટ

રાજકોટ શહેરના ભક્તિનગર વિસ્તારમાં રહેતા આ કામના ફરિયાદીએ પોતાની 16 વર્ષની સગીર વયની પુત્રીને લલચાવી ફોસલાવી લગ્ન કરવાની લાલચ આપી બદકામ કરવાના ઈરાદે અપહરણ થયા અંગેની ફરિયાદ રાજકોટના ભક્તિનગર પોલીસ સ્ટેશનમાં નોંધાવેલી હતી, જે કામે આ કામના આરોપી વિશાલ ચનાભાઈ પરમારની રાજકોટના ભક્તિનગર પોલીસ દ્વારા તા. 27-4-2025ના રોજ ધરપકડ કરવામાં આવી હતી, જે કેસ ચાલી જતાં રાજકોટ પોક્સો અદાલતે આ કામના આરોપીને ઉપરોક્ત ગુનાના કામ સબબ 20 વર્ષની કેદની સજાનો હુકમ ફરમાવેલો હતો.

આ કેસની ટૂંકમાં હકીકત એવી છે કે આ કામમાં ભક્તિનગર વિસ્તારમાં રહેતા એવા ભોગ બનનારના પિતાએ ગત તા. 27-4-2022ના રોજ પોલીસ સ્ટેશનમાં પોતાની 16 વર્ષની સગીર વયની પુત્રીને લગ્ન કરવાની લાલચ આપી બદકામ કરવાના ઈરાદે અપહરણ કરી જવા અંગેની ફરિયાદ આપી હતી, જેના અનુસંધાને પોલીસ દ્વારા તપાસ કરતા સગીરાને જામનગર રોડ પર રહેતાં આ કામના આરોપી વિશાલ ચનાભાઈ પરમાર સાથે પ્રેમસંબંધ હોય જેથી આરોપી સગીરાને સ્કૂલેથી પોતાની સાથે પોતાના મિત્રના ઘેર લઈ ગયા હતા ત્યાં ભોગ બનનારની સાથે આ કામના આરોપીએ અવારનવાર શરીર સંબંધ બાંધેલની હકીકત તપાસમાં ખુલવા પામેલી, જેથી આરોપીની ધરપકડ કરીને રાજકોટ સ્પે. પોક્સો કોર્ટના જજ સમક્ષ રજૂ કરતાં આરોપી વિરૂદ્ધ આઈ.પી.સી.ની કલમ 376(2)(એન) તેમજ પોક્સો એક્ટની કલમ 4, 6, 12, 17નો ઉમેરો કરવામાં આવેલો અને ભોગ બનનાર અને આરોપીનું મેડિકલ સેમ્પલ લઈ તેને ફોરેન્સિક સાયન્સ લેબોરેટરી ખાતે પરિક્ષણ માટે મોકલવામાં આવેલું અને આરોપીને રાજકોટ પોક્સો કોર્ટના જજે ન્યાયિક હીરાસતમાં મોકલવાનો હુકમ ફરમાવેલો હતો, જે કેસ ચાલી જતાં આ કામમાં ફરિયાદ પક્ષ તરફથી કુલ 10 સાહેદોને તપાસવામાં આવેલા હતા તેમજ 19 ડોક્યુમેન્ટરી પુરાવાઓ રજૂ કરવામાં આવેલા. આ કામમાં અતિમહત્ત્વના ગણાતા સાહેદ એટલે કે ભોગ બનનારની કોર્ટ સમક્ષની જુબાની આપેલી તેમજ આ કામે ભોગ બનનારના મેડિકલ તપાસણીના અંતે લેવામાં આવેલા નમૂનાઓના પરિક્ષણ રિપોર્ટ પરથી પણ બનાવને સમર્થન મળેલું, જેથી પોક્સો અદાલતએ તા. 30-1-2025ના રોજ આરોપીને તકસીરવાન ઠરાવી 20 વર્ષની કેદની સજાનો હુકમ ફરમાવેલો. જેની સામે આરોપીએ નામદાર ગુજરાત હાઈકોર્ટમાં અપીલ ફાઈલ કરેલી. જેમાં ભોગ બનનારને આરોપી સાથે પ્રેમસંબંધ હોય અને પરિવારજનો તેની વિરૂદ્ધમાં હોય તેમજ હાથ પરનો કેસ પ્રેમસંબંધનો હોય તેવું અવલોકન નામદાર ગુજરાત હાઈકોર્ટની ડીવીઝન બેન્ચે કરી આરોપી સામે પોક્સોના ગુનામાં થયેલી 20 વર્ષની કેદની સજાનો હુકમ સસ્પેન્ડ કરી તાત્કાલિક અસરથી આરોપીને જામીન મુક્ત કરવાનો હુકમ ફરમાવેલો હતો.

આ કામમાં આરોપી વતી એડવોકેટ જીજ્ઞેશ એમ. સભાડ, રણજીત બી. મકવાણા, યોગેશ એ. જાદવ તથા મદદગારીમાં અભય ચાવડા, વિશાલ રોજાસરા, વિક્રમ કિહલા તેમજ ગુજરાત હાઈકોર્ટમાં એડવોકેટ મેહુલ એસ. પાડલીયા રોકાયેલા હતા.