દિલ્હી લાલ કિલ્લામાં સોના-હીરાથી જડિત 1 કરોડના કળશની ચોરી થઈ

વિગતો મુજબ લાલ કિલ્લા સંકુલમાં જૈન ધર્મના વિશાળ ધાર્મિક કાર્યક્રમનું આયોજન કરવામાં આવ્યું હતું. આ કાર્યક્રમ દરમિયાન સ્ટેજ પર 760 ગ્રામ સોનાનો કળશ, જેમાં 150 ગ્રામ હીરા, માણેક અને પન્ના જડેલા હતા, દર્શન માટે મુકવામાં આવ્યો હતો. આ કળશનું મૂલ્ય અંદાજે ₹1 કરોડ જેટલું હોવાનું માનવામાં આવે છે. પરંતુ મંગળવારે ભીડ વચ્ચે આ કળશ ગુમ થઈ ગયો. લોકોને પહેલા એવું લાગ્યું કે, કદાચ કોઇએ પૂજા માટે હટાવ્યો હશે, પરંતુ બાદમાં જ્યારે તપાસ શરૂ થઈ ત્યારે તેની ચોરીની આશંકા સામે આવી.

CCTV કેમેરામાં કેદ થયો શંકાસ્પદ વ્યકિત

આ ધાર્મિક વિધિમાં ઉદ્યોગપતિ સુધીર જૈન દરરોજ પૂજા માટે આ અમૂલ્ય કળશ લાવતા હતા. મંગળવારે યોજાયેલા કાર્યક્રમમાં ઘણા પ્રખ્યાત રાજકારણીઓ જેમ કે લોકસભાના અધ્યક્ષ ઓમ બિરલા પણ હાજર રહ્યા હતા. આવી વિશિષ્ટ હાજરી વચ્ચે પણ સ્ટેજ પરથી કળશ ગાયબ થઈ જવો સુરક્ષા વ્યવસ્થાઓ પર મોટી સવાલ ઉઠાવે છે.

9 સપ્ટેમ્બર સુધી ચાલશે ધાર્મિક કાર્યક્રમ

જૈન સમુદાયની આ વિધિ લાલ કિલ્લા ખાતે ચાલી રહી છે અને તે 9 સપ્ટેમ્બર સુધી ચાલુ રહેશે. મહત્વનું છે કે, આ કેસમાં હવે પોલીસે CCTV ફૂટેજના આધારે તપાસ ઝડપી કરી છે અને ટૂંક સમયમાં આરોપીની ધરપકડ કરવામાં આવશે એવી સંભાવના છે. દિલ્હી પોલીસ અને CISFએ હવે લાલ કિલ્લાની અંદર વધુ સક્રિયતા બતાવી છે અને આવતા દિવસોમાં સુરક્ષા વધારવાની જાહેરાત પણ થઈ શકે છે.