હળવદના વોર્ડ નંબર 1 માં પ્રાથમિક સુવિધાઓના અભાવ સહિતની અનેક સમસ્યાઓ લઇને મહિલાઓ સોમવારે પાલિકાએ ધસી આવી હતી પરંતુ રજૂઆત સાંભળનાર કોઈ હાજર ન હોવાથી મહિલાઓમાં રોષ ફેલાયો હતો. હળવદ શહેરમાં આવેલા વોર્ડ નંબર 1 માં ગટરના ગંદા પાણી છેલ્લા ઘણા વર્ષોથી ઘરમાં ઘૂસી જતા હોય, પીવાનું પાણી ચોખ્ખું ન આવતું હોય, રસ્તાઓ બિસ્માર હોય અને સ્ટ્રીટ લાઇટ ચાલુ ન હોય તેવી અનેક સમસ્યાઓના ઉકેલની માંગ સાથે સોમવારે મહિલાઓ નગરપાલિકાએ ચીફ ઓફિસર તેમજ પ્રમુખને રજૂઆત કરવા દોડી ગઈ હતી પરંતુ રજૂઆત સાંભળનાર કોઈ હાજર હતું નહીં.
પ્રમુખ સાથે વાત કરતા જણાવ્યું હતું કે, હાલ તેઓ પાર્ટીના કામથી બહારગામ છે તેમજ ચીફ ઓફિસરે ફોન રિસિવ ન કરતા મહિલાઓ રોષે ભરાઇ હતી. આથી સમસ્યાઓથી થાકી ચૂકેલા રહીશો આમ આદમી પાર્ટીના નેતાઓને સાથે રાખી રજૂઆત કરવા દોડી ગયા હતા પરંતુ આ રજૂઆત માત્ર રજૂઆત જ રહી ગઈ હોય તેમ ગટરના ગંદા પાણી ઘરમાં ઘૂસી જવાની છેલ્લા ઘણા વર્ષોથી સમસ્યા છે પરંતુ કોઈ અમને સાંભળતું નથી તેવા આક્ષેપો મહિલાઓ દ્વારા કરવામાં આવ્યા હતા તેમજ વોર્ડના સભ્ય દ્વારા પોતાના વોર્ડમાં કોઈપણ જાતની કામગીરી ન કરવામાં આવતી હોવાના પણ આક્ષેપ કર્યા હતા.
