રાજકોટના સ્પેશિયલ હોમ ફોર બોયઝમાં છ બાળ આરોપીઓની જબરી ધમાલ

પરિવાર સાથે વાત કરવાની ના પાડતા એસઆરપી મેન ઉપર હુમલો

સીસીટીવી, લાઇટ, પંખામાં કરી તોડફોડ : એ ડિવિઝન પોલીસમાં નોંધતો ગુનો
ખાસ-ખબર ન્યૂઝ રાજકોટ

રાજકોટમાં ભક્તિનગર સ્ટેશન રોડ પર આવેલ ઝોનલ ઓબ્ઝર્વેશન હોમ બાળ અદાલતમાં ફોનમાં વાત કરવા મામલે છ બાળ આરોપીએ તોડફોડ કર્યા બાદ ધોકા-પાઈપથી એસઆરપી જવાન પર હુમલો કરતાં અંગે એ. ડિવિઝન પોલીસે ફરજમાં રૂકાવટ સહિતની કલમ હેઠળ ગુનો નોંધી તપાસ હાથ ધરી હતી.

રાજકોટમાં પાળ રોડ પર સંસ્કાર સોસાયટીમાં રહેતાં અને પાંચ વર્ષથી ઝોનલ ઓબ્ઝર્વેશન હોમ બાળ અદાલતમાં કોન્ટ્રાક્ટ બેઈઝ પર કાઉન્સેલર તરીકે નોકરી કરતાં સાગરભાઈ દિલીપભાઈ શુકલા ઉ.34એ એ ડિવિઝન પોલીસ સ્ટેશનમાં છ બાળ આરોપી સામે નોંધાવેલ ફરીયાદમાં જણાવ્યું હતું કે, છ મહીનાથી વધારાના ઓફીસર ઈન્ચાર્જ તરીકે ફરજ બજાવે છે ગઈકાલે જાહેર રજા હોય જેથી રાત્રીના સરકારી ગાર્ડ તરીકે ફરજ નીભાવતા રમણીકભાઈ લીંડીયાનો ફોન આવેલ અને જણાવેલ કે, સગીર બાળકો એસ.આર.પી. જવાન સાથે ઝઘડો કરી તેને મારકૂટ કરે છે. તેવુ જણાવતા તેઓ તુરંત પહોંચ્યા હતા અને ગેઈટની અંદર જોતાં સામાન વેર વીખેર જોવા મળેલ હતો ગાર્ડ રમણીકભાઈને બનાવ બાબતે પુછપરછ કરતા તેને જણાવેલ કે, બુધવારનો દિવસ હોય જેથી આપડે ત્યા પ્રાઈવેટ ગાર્ડ તરીકે ફરજ બજાવતા ટીડાભાઈ બાંભવા બાળકોને તેના વાલી સાથે ઓફીસના લેન્ડ લાઈન ફોનમાં વાતચીત કરાવતા હતા

તે દરમ્યાન રાત્રીના એક સગીર તેના વાલી સાથે ફોનમા વાતચીત કરતો હોય પરંતુ ફોનમા વાતચીત કરાવવાનો સમય પુર્ણ થતા ટીડાભાઈ બાંભવાએ તેને ફોન મુકવાનુ કહેલ પરંતુ તેમ છતા તેને ફોનમા વાતચીત ચાલુ રાખતા તેને ફોન મુકવાનુ જણાવેલ પરંતુ તેને ફોન મુકેલ નહી જેથી તેની પાસેથી ફોન લઈ લેતાં તે ઓફીસમાથી બહાર નીકળી અન્ય સગીરોને બોલાવી લાવ્યો હતો અને સાથે મળી છએ સગીરોએ કલાસ રૂમમા જઈ જીમના સાધનો ત્યા પડેલ હોય તેમાથી ડંબલ લઈ કલાસ રૂમમા રહેલ બેંચમા નુક્શાન કર્યું હતું બાદમાં ગાળો બોલી સંસ્થામા લાગેલા 6 સી.સી.ટી.વી. કેમેરા, 10 પંખા, 5 ખુરશીઓ, ટયુબલાઈટમા કચરા પોતા કરવાના પાઈપ તથા પ્લાસ્ટીક જેવા પાઈપ વડે તોડફોડ કરી 30 હજારનું નુકશાની કર્યું હતું. તોડફોડનો અવાજ આવતા ત્યા ગાર્ડ તરીકે રાત્રીના એસઆરપીના હથીયારી પોલીસ કોન્સ્ટેબલ અરવીંદસિહ જાડેજા હાજર હતા તે ત્યા લોબીમા આવી ગયેલ અને છએય સગીરોને સમજાવવા જતા છએય સગીરોએ એસઆરપી જવાન પર હુમલો કર્યો હતો એસઆરપી મેનને કચરા પોતા કરવાના પાઈપ અને પ્લાસ્ટીકનાપાઈપ વડે માર મારવા લાગેલ હતાં અને બાદમાં બાળ આરોપી અંદર ચાલ્યાં ગયેલ હતાં બનાવ અંગેની ફરીયાદ પરથી એ. ડિવિઝન પોલીસે બીએનએસ એક્ટ 121(1), 189(2), 191(2), 190, 324(4) સહિતની કલમ હેઠળ ગુનો નોંધી પીએસઆઈ એમ.કે.મોવલિયા અને સ્ટાફે તપાસ હાથ ધરી હતી.