કાલથી સૌરાષ્ટ્ર યુનિ.માં પરીક્ષા: 5 જિલ્લાના 132 કેન્દ્ર પર

51,184 વિદ્યાર્થીઓ પરીક્ષા આપશે, બે સેશન્સમાં લેવાશે પરીક્ષા

બોર્ડની પરીક્ષા પૂર્ણ થયા બાદ હવે કોલેજોની પરીક્ષા શરૂ થઇ રહી છે. સૌરાષ્ટ્ર યુનિવર્સિટીમાં આવતીકાલે 5 એપ્રિલને બુધવારથી બીજા સત્રની પરીક્ષાનો પ્રારંભ થઇ રહ્યો છે. જેમાં 51 કોર્ષના 51,184 વિદ્યાર્થીઓ પરીક્ષા આપી રહ્યા છે આ માટે 132 કેન્દ્ર નક્કી કરવામાં આવ્યા છે. કુલ 51,184 વિદ્યાર્થીઓમાંથી 14 કોર્ષના 4,189 વિદ્યાર્થીઓના પેપર ઓનલાઈન મોકલવામાં આવશે. સૌરાષ્ટ્ર યુનિવર્સિટીમાં એક સાથે બબ્બે પેપર લીક થયા બાદ સત્તાધીશો સફાળા જાગ્યા હોય તેમ પેપરો ઓનલાઈન મોકલવાનું જાહેર કર્યુ હતું. જોકે તેનું સંપૂર્ણ અમલીકર હજુ સુધી થયું નથી જેથી થોડા પેપરો ઓનલાઈન તો મોટા ભાગના પેપરો ઓફ્લાઈન મોકલવામાં આવે છે. આવતીકાલથી શરુ થતી પરીક્ષાની વાત કરીએ તો તેમાં 14 કોર્ષના 4,189 જેટલા પેપરો કેન્દ્રો પર ઓનલાઈન મોકલવામાં આવશે. 5 જિલ્લામાં 132 કેન્દ્રો પરથી લેવાનારી પરીક્ષામાં 78 કેન્દ્રો પર જ ઓબ્ઝર્વરની નિમણુક કરાઈ છે. પરંતુ દરેક કેન્દ્રો પર સી.સી.ટી.વી. વેબસાઈટ પર લાઈવ નિહાળી શકાશે તે માટે આયોજન કરવામાં આવ્યું છે.

આ સાથે પરીક્ષામાં ટ્રેક એન્ડ ટ્રેસ સિસ્ટમનું અમલીકરણ કરવામાં આવ્યું છે. જેથી જે-તે કોલેજના પ્રશ્નપત્રોમાં પરીક્ષા આપતા વિદ્યાર્થીઓને અપાયેલા પેપરોમાં કોલેજનો કોડ હશે જેથી પેપર લીક થાય તો કઈ કોલેજમાંથી લીક થયું તે સરળતાથી જાણી શકાશે. ઉલ્લેખનીય છે કે બે સેશન્સમાં લેવાનાર પરીક્ષામાં પ્રથમ પરીક્ષા સવારે 10.30 થી 1 અને બીજી પરીક્ષા બપોરે 2.30 થી 5 વાગ્યા સુધી એમ બે સેશન્સમાં લેવામાં આવશે.