ભારતમાં દર પાંચ વરસે હીટ વેવના બળબળતા દિવસો આવશે

આંતરરાષ્ટ્રીય સ્તરે થયેલા સંશોધનાત્મક અભ્યાસમાં રેડ સિગ્નલ : ઉદ્યોગો, કારખાનાં, વાહનોમાંથી ફેંકાતા હાનિકારક ધુમાડા પર નિયંત્રણ જરૂરી

ખાસ-ખબર સંવાદદાતા
આંતરરાષ્ટ્રીય સ્તરે થયેલા સંશોધનાત્મક અભ્યાસની વિગતો દ્વારા જાણવા મળે છે કે ભારત સહિત સમગ્ર દુનિયામાં મોટા ઉદ્યોગો,કારખાનાં અને વાહનોમાંથી ફેંકાતા હાનીકારક વાયુઓ પર નિયંત્રણ નહીં મૂકાય ત્યાં સુધી હીટ વેવ જેવી ચિંતાજનક પરિસ્થિતિ સર્જાશે.

વર્લ્ડ વેધર એટ્રીબ્યુશન ગૂ્રપ અંતર્ગત 29 નિષ્ણાત હવામાનશાસ્ત્રીઓએ આ સંશોધનાત્મક અભ્યાસ માટે ક્લાઇમેટ ચેન્જ વિશેની માહિતી અને કમ્પ્યુટર સિમ્યુલેશન(કમ્પ્યુટર પર તૈયાર થયેલું ગાણિતિક મોડેલ)નો આધાર લીધો છે. આ અભ્યાસમાં ભારત, પાકિસ્તાન, બ્રિટન,અમેરિકા, ડેનમાર્ક વગેરે દેશના હવામાનશાસ્ત્રીઓએ હિસ્સો લીધો છે.
આ અભ્યાસમાં એવો ઉલ્લેખ છે કે 2022ના માર્ચ-એપ્રિલની હીટ વેવ જેવી પરિસ્થિતિ ખરેખર ભાગ્યે જ સર્જાય છે.

એટલે કે 1 ટકાની શક્યતા સાથે હીટ વેવ જેવી ચિંતાજનક પરિસ્થિતિ દર વરસે સર્જાવાની શક્યતા ખરી. જોકે માનવ સર્જિત ક્લાઇમેટ ચેન્જને કારણે તો આવી અસહ્ય પરિસ્થિતિની સંભાવના 30 ગણી વધી જવાની છે. ઉપરાંત, આ અભ્યાસમાં એવો સંકેત પણ છે કે સમગ્ર વિશ્વના તાપમાનમાં ફક્ત બે(2) ડિગ્રી સેલ્સિયસનો વધારો થાય તો હીટ વેવની ભારે ચિંતાજનક પરિસ્થિતિ દર પાંચ વરસે સર્જાશે. વળી, ચોમાસામાં પૂરતો વરસાદ ન વરસે તો હીટ વેવની પરિસ્થિતિ વહેલી સર્જાઇ શકે છે.ભારતમાં તો અતિ ગરમીને કારણે ઘઉંના પાકને ભારે નુકસાન થયું હોવાના અખબારી અહેવાલ પણ પ્રસિદ્ધ થયા છે.