ખાસ-ખબર સંવાદદાતા
ગુજરાત રાજ્યમાં જેમ જેમ વિધાનસભાની ચુંટણી નજીક આવી રહી તેમ વર્ષોથી પ્રાથમિક સુવિધાઓ ઝંખતા લોકોની સુવિધાઓ આપવામાં તમામ રાજકીય પક્ષની નિષ્ફળતાને કારણે આ ચૂંટણીઓમાં લોકોનો રોષ ખૂલીને સામે આવ્યો છે ત્યારે મોરબીના બોરીયાપાટી વિસ્તારમાં ચૂંટણી બહિષ્કારના બેનરો લાગ્યા છે અને વર્ષોથી પ્રાથમિક સુવિધાથી વંચિત આ વાડી વિસ્તારમાં સુવિધાઓ આપવામાં અન્યાય થવાથી આગામી ચૂંટણીનો બહિષ્કાર કરવાનો સતવારા સમાજે નિર્ણય કર્યો છે. મોરબીના છેવાડાના વાડી વિસ્તાર બોરીયાપાટી વિસ્તારમાં રહેતા સમસ્ત સતવારા સમાજ દ્વારા આગામી મોરબી માળીયા બેઠકની વિધાનસભાની ચૂંટણીનો બહિષ્કાર કરવાના બેનરો પ્રદર્શિત કરવામાં આવ્યા છે.
આ બેનરોમાં લખ્યું છે કે, આ વાડી વિસ્તારમાં પાણી, લાઈટ, પોસ્ટ-ટપાલ, રોડ-રસ્તા, સફાઈ સહિતની મૂળભૂત સુવિધાઓનો વર્ષોથી અભાવ છે. આ મૂળભૂત સુવિધાઓ આપવામાં અત્યાર સુધીની દરેક પક્ષની સરકાર નિષ્ફળ નીવડી હોય વર્ષોથી હાલાકી ભોગવતા આ વિસ્તારના સતાવારા સમાજે અન્યાયનો જડબાતોડ જવાબ આપવા માટે આગામી મોરબી માળીયા બેઠકની વિધાનસભાની ચૂંટણીનો બહિષ્કાર કરવાનો નિર્ણય કરીને ચૂંટણી બહિષ્કારના બેનરો લગાવી દીધા છે.
