સરકારી બોલેરોમાંથી 4 બિયરના ટીન પણ મળી આવ્યા
વંથલી પોલીસે ડ્રાઈવર વિરુદ્ધ ગુનો નોંધી વધુ તપાસ તેજ કરી
- Advertisement -
ખાસ-ખબર ન્યૂઝ જૂનાગઢ, તા.15
જૂનાગઢ જિલ્લાના વંથલી તાલુકામાં એક અત્યંત કરૂણ ઘટના સામે આવી છે, જેમાં સરકારની માલિકીની ગાડીએ ચાર પગપાળા જઈ રહેલા યુવાનોને હડફેટે લેતા એક યુવાનનું ઘટનાસ્થળે જ મોત નીપજ્યું છે. આ ઘટનાને પગલે ગ્રામજનોમાં ભારે રોષ જોવા મળ્યો હતો અને આરોપીઓ સામે કડક કાર્યવાહીની માંગ સાથે મોટી સંખ્યામાં લોકો પોલીસ સ્ટેશને ઉમટી પડ્યા હતા.
પ્રાપ્ત વિગતો અનુસાર, લુશાળા ગામના સુભાષભાઈ કાનાભાઈ ડાંગર સહિત ચાર યુવાનો સાંજના પાંચ વાગ્યાની આસપાસ પગપાળા સતાધાર જવા નીકળ્યા હતા. તેઓ ખોરાસા-અરણીયારા રોડ પરથી પસાર થઈ રહ્યા હતા ત્યારે તાલાળા તરફથી આવતી ‘ગવર્મેન્ટ ઓફ ગુજરાત’ લખેલી મહિન્દ્રા બોલેરો ગાડી નંબર જીજે 25 યુ 8229ના ચાલકે બેફિકરાઈપૂર્વક ગાડી ચલાવીને તેમને હડફેટે લીધા હતા.
અકસ્માત બાદ ગ્રામજનોએ તાત્કાલિક ઘટનાસ્થળે પહોંચીને ગાડીના ડ્રાઈવર અને સાથે રહેલા અધિકારીને ઝડપી પાડ્યા હતા. આશ્ચર્યજનક રીતે, કુતિયાણા પાણી પુરવઠા અધિકારી અને ડ્રાઈવર રાહુલ ચંદુભાઇ પાતર ચિક્કાર દારૂ પીધેલ હાલતમાં મળી આવ્યા હતા. ગાડીની તલાશી લેતા તેમાંથી દારૂની બોટલ અને 4 બિયરના ટીન પણ મળી આવ્યા હતા.
આ ઘટનાની જાણ થતાં જ ગ્રામજનોએ તાત્કાલિક વંથલી પોલીસને જાણ કરી હતી, જેમણે સ્થળ પર પહોંચી આરોપીઓને પોલીસ સ્ટેશને ખસેડ્યા હતા. અકસ્માતમાં ગંભીર રીતે ઘાયલ થયેલા સુભાષભાઈ કાનાભાઈ ડાંગરનું સારવાર દરમિયાન મોત થયું હતું, જ્યારે અન્ય યુવાનોની હાલત સ્થિર હોવાનું જાણવા મળ્યું છે.
આ ઘટનાના વિરોધમાં લુશાળા ગામના ગ્રામજનોએ વંથલી પોલીસ સ્ટેશને પહોંચી ભારે સૂત્રોચ્ચાર કર્યા હતા અને બેદરકાર ડ્રાઈવર તેમજ નશાની હાલતમાં રહેલા ડ્રાઈવર રાહુલ ચંદુભાઈ પાતર રહે.સાંગોદ્રા ગામ, તાલાળા, જી. ગીર સોમનાથ અને અધિકારી સામે કડક કાર્યવાહી કરવાની માંગણી કરી હતી. વંથલી પોલીસ સ્ટેશનના પીઆઈ ચૌધરીએ ઘટનાને કમનસીબ ગણાવી, રાહુલ પાતર સામે કડક કલમો હેઠળ ગુનો દાખલ કર્યો હતો અને કડકમાં કડક સજા થાય તેવી ખાતરી આપી હતી. આ બનાવ ગુજરાતમાં દારૂબંધીના કાયદાના અમલ સામે પણ અનેક સવાલો ઉભા કરે છે. એક તરફ સરકાર કડક દારૂબંધીના દાવાઓ કરે છે, ત્યારે સરકારી ગાડીમાં જ દારૂ મળી આવવાની અને નશાની હાલતમાં ગંભીર અકસ્માત સર્જાવાની ઘટનાએ લોકોમાં ભારે રોષ પેદા કર્યો છે.
