ક્લિનિકમાં આવેલા દર્દીએ ખોદકામ દરમિયાન દાગીનાં નીકળ્યા છે કહી શીશામાં ઉતાર્યા
તબીબને ચોટીલા બોલાવી નકલી સોનું ધાબડી દીધું, ગાંધીગ્રામ પોલીસ મથકમાં ગુનો
- Advertisement -
ખાસ-ખબર ન્યૂઝ રાજકોટ, તા.27
રાજકોટના મોરબી બાયપાસ રોડ પર રહેતા અને ત્યાં જ કલિનિક ધરાવતા તબીબને ગઠિયાઓએ સસ્તામાં સોનું દેવાની લાલચ આપી 5 લાખની છેતરપિંડી કરી નકલી સોનું ધાબડી દેતા મહિલા સહિત ત્રણ શખ્સો વિરુદ્ધ ગાંધીગ્રામ પોલીસ મથકમાં ફરિયાદ નોંધાવી છે.
રાજકોટના આસ્થા સાંગ્રીલામાં રહેતા તબીબ ધવલભાઇ પ્રવિણભાઈ મોલીયા ઉ.28એ ગાંધીગ્રામ પોલીસ સ્ટેશનમાં રમેશ નામનો વ્યક્તિ તથા અન્ય એક અજાણ્યો શખસ, અજાણી મહિલા સામે નોંધાવેલ ફરિયાદમાં જણાવ્યું છે કે, તે રૂદ્ર કલીનીક નામે દવાખાનું ધરાવી પ્રેક્ટીસ કરે છે ગઇ તા.15/05/2025ના સવારે ઘરે હતા ત્યારે અજાણ્યા નંબર પરથી ફોન આવ્યો હતો અને વાત કરી હતી કે, ડોકટર સાહેબ દવા લેવાની છે, તમે કયારે દવાખાને આવશો તેમ પુછતા તબીબે તેમને થોડીવારમાં આવવાની વાત કરેલ અને તે આશરે સાડા અગિયારેક વાગ્યે દવાખાને ગયા હતા ત્યાં રમેશભાઇ નામની એક વ્યકિત આવેલ હોય તેણે પોતાને તાવ આવતો હોય અને કમર દુ:ખે છે તેમ વાત કરેલ હતી. જેથી તેને દવા આપી હતી ત્યારે તેણે કહ્યું હતું કે, ગોંડલ ચોકડી પાસે કામ ચાલતુ હોય ત્યાં સાઇડ પર રહીએ છીએ અમે મજુરીકામ કરતા હોય અને ખોદકામ કરતી વખતે આ ચાંદીનો સિકકો તથા અન્ય સોનાના દાગીના મળેલ હોવાની વાત તબીબને કરી હતી બાદ જણાવેલ કે, તમારે સોનાના દાગીના જોતા હોય તો તમે આવીને જોઇ જાજો અમે વાત કરી જતા રહેલ હતા ગઇ તા.16ના ફરીવાર તબીબને રમેશનો ફોન આવેલ અને સોનાના દાગીના બાબતે વાતચીત કરી હતી કે, અમે સિવિલ હોસ્પીટલ ખાતે બતાવવા આવવાના છીએ તમે ત્યાં આવજો અને સોનાના દાગીના જોઈ જજો તેમ વાત કરેલ બાદ બપોરના એકાદ વાગ્યે તબીબ સિવિલ હોસ્પીટલ ચોક ખાતે જતા રમેશ પુલ નીચે લઈ ગયેલ અને ત્યાં અન્ય એક શખ્સ આશરે 25 વર્ષનો તથા એક બહેન આશરે 55 વર્ષ વાળી હાજર હતાં ત્યાં આ બહેને કાળી કોથળી ખોલી તબીબને બતાવતા તેમાં પીળી ધાતુની માળાઓ હોય જેથી તબીબે તેમને પુછતા સોનાની હોવાનું જણાવેલ અને આશરે એક કીલો હોવાની વાત કરેલ હતી. બાદ તબીબે તેમને સોની પાસે બતાવાવનું કહેતા તેઓએ તેમાંથી કટકો આપ્યો હતો બાદ તેઓ નીકળી ગયેલ હતા. તબીબે આ સોનું રણછોડનગર ખાતે જઇ પટેલ હોલમાર્ક સેન્ટર ખાતે જઇ ટચ કરાવતા સોનુ 18 કેરેટ આવેલ હતુ. બાદ તેમણે દાગીના લેવાનું નકકી કર્યું હતુ.
બાદ ગઇ તા.17 ના સવારમાં આશરે સાડા અગિયારેક વાગ્યે તબીબે રમેશ નામના વ્યક્તિને ફોન કરી સોનાના દાગીના બાબતે વાતચીત કરી બાદ તેઓએ બધા દાગીના આપી દેવાની વાત કરતા તબીબે એક લાખમાં સોનાના દાગીના માંગેલ હતા બાદ વાતચીતના અંતે છેલ્લે 5 લાખમાં સોનાના દાગીના લેવાનું નકકી કરેલ હતુ બાદ તે શખ્સે જણાવેલ કે, અમે સુરેન્દ્રનગર ખાતે છીએ તમે સુરેન્દ્રનગર ખાતે આવો જેથી તબીબે ના પાડતા ચોટીલા બોલાવેલ હતો. જેથી ગઇ તા.19 ના સવારમાં તબીબે તેમને ફોન કરી ચોટીલા આવતા હોવાની જાણ કરી હતી. બાદ ફરિયાદી તથા તેના પત્ની બંને રૂપીયા પાંચ લાખની વ્યવસ્થા કરી બાઇક લઇને ચોટીલા ગયેલ હતા બાદ બપોરના આશરે અઢી વાગ્યે ચોટીલા ભકિતવનમાં ઉભેલ હતા. ત્યાં આરોપીને ફોન કરી બોલાવતા તેઓએ બહાર હાઇવે પર ગેઇટ પાસે આવવાની વાત કરેલ હતી. બાદ તબીબ એકલા હાઇવે પર ગેઇટ પાસે ગયા હતાં. ત્યાં રમેશ નામનો આ શખ્સ ઉભો હોય તે ફરિયાદીને સંકલ્પ હોટલ પાસે લઇ ગયેલ હતો. બાદ ત્યાં અગાઉ મળેલ શખ્સ તથા બેન બંને પણ હાજર હતાં.બાદમાં તબીબ તેમની પત્નીને અહીં લાવી આરોપીઓએ વસ્તુ જોવા આપતા તે જોઇ થેલામાં રહેલા 5 લાખ આપી દીધા હતાં બાદ આરોપી રમેશે જણાવેલ કે, તમે ચેક કરાવી લેજો ખોટુ નીકળે તો અમને પરત આપી દેજો અમે તમને રૂપીયા પરત આપી દેશુ, એમ વાત કરેલ હતી. બાદમાં ફરિયાદી આ સોનુ લઇને રાજકોટ આવેલ અને સીધા સાંજના સમયે રણછોડનગરમાં પટેલ હોલમાર્ક સેન્ટર ખાતે ગયેલ અને તપાસ કરાવતા સોનુ ખોટુ નીકળેલ હતુ. બાદ આરોપી રમેશને તેના મોબાઇલમાં ફોન કરતા સ્વીચ ઓફ આવતો હતો ફરિયાદીની પત્નિની તબિયત સારી ન હોવાથી તેમની સારવારમાં વ્યસ્ત હોય તુરંત ફરિયાદ કરી ન હતી હવે તેમણે આ અંગે ફરિયાદ નોંધાવતા ગાંધીગ્રામ પોલીસે ગુનો નોંધી જરૂરી કાર્યવાહી કરી હતી.
