બોટાદમાં પ્રભારી મંત્રી ભાનુબેન બાબરીયા દ્વારા વિકાસ કામોની સમીક્ષા કરાઇ

ભાનુબેન દ્વારા 10 લાખના ખર્ચે નિર્માણ પામેલા ટ્રાફિક સિગ્નલનું લોકાર્પણ
ખાસ-ખબર ન્યૂઝ બોટાદ

રાજ્યના મુખ્યમંત્રી ભૂપેન્દ્રભાઈ પટેલના માર્ગદર્શન હેઠળ, નાગરિકોની સલામતી અને સુવિધા સુનિશ્ચિત કરવા માટે મંત્રીઓ દ્વારા જિલ્લાકક્ષાએ સમીક્ષા બેઠકો યોજાઈ રહી છે. આ અંતર્ગત, સામાજિક ન્યાય અને અધિકારિતા તથા મહિલા અને બાળ કલ્યાણ વિભાગના તેમજ બોટાદ જિલ્લાના પ્રભારી મંત્રી ભાનુબેન બાબરીયાએ કલેક્ટર કચેરી ખાતે મહત્વના મુદ્દાઓ પર વિસ્તારપૂર્વક સમીક્ષા કરી હતી.
મંત્રી ભાનુબેન બાબરીયાએ બોટાદ જિલ્લામાંથી પસાર થતા નેશનલ હાઈવે, સ્ટેટ હાઈવે, પંચાયત હસ્તકના માર્ગો અને નગરપાલિકાના રસ્તાઓ તથા તેના પર આવેલા બ્રિજોની સ્થિતિની સમીક્ષા કરી હતી. તેમણે બંધ કરાયેલા બ્રિજોની વિગતો મેળવી, ટ્રાફિક ભારક્ષમતા અને ડાયવર્ઝન થયેલા રૂટમાં આવતા ગામડાંઓના રોડ-રસ્તાની મરામત તથા તેને મોટરેબલ રાખવા માટે સૂચનો કર્યા હતા.
આ ઉપરાંત, તેમણે જિલ્લાના પ્રાથમિક અને માધ્યમિક શાળાના મકાનો, આંગણવાડી કેન્દ્રો, પ્રાથમિક આરોગ્ય કેન્દ્રો અને પંચાયત ઘરોની પણ બારીકાઈથી સમીક્ષા કરી. જોખમી હોય તેવી તમામ બિલ્ડીંગો બંધ કરવા અને માળખાંની સ્થિતિ સુદૃઢ બનાવવા તુરંત પગલાં લેવાના નિર્દેશ આપ્યા હતા. નાગરિકોને કોઈ તકલીફ ન પડે અને સેવાઓ સતત ઉપલબ્ધ રહે તે જોવા પર ખાસ ભાર મૂકવામાં આવ્યો હતો.

સમીક્ષા બેઠક બાદ, મંત્રી ભાનુબેન બાબરીયાએ બોટાદ શહેર ખાતે વકીલ પેટ્રોલ પંપ પાસે રૂ. 10 લાખના ખર્ચે નિર્માણ પામેલા ટ્રાફિક સિગ્નલનું લોકાર્પણ કર્યું. આ સિગ્નલ બોટાદ જિલ્લા વહીવટી તંત્ર, પોલીસ વિભાગ, તેમજ ટેક્સપિન, જાયન્ટ્સ ગ્રુપ, બોટાદના સહયોગથી તૈયાર કરવામાં આવ્યું છે, જે શહેરની ટ્રાફિક વ્યવસ્થાને વધુ સુવ્યવસ્થિત અને સુરક્ષિત બનાવવામાં મદદ કરશે.
આ બેઠક અને કાર્યક્રમમાં જિલ્લા પંચાયતના પ્રમુખ જેઠીબેન પરમાર, જિલ્લા કલેક્ટર ડો. જીન્સી રોય, જિલ્લા વિકાસ અધિકારી અક્ષય બુડાનિયા, નિવાસી અધિક કલેક્ટર પી.એલ. ઝણકાત, બોટાદ જિલ્લા પોલીસ અધિક્ષક કે.એફ. બલોલિયા સહિત વિવિધ વિભાગોના અધિકારીઓ અને અગ્રણીઓ ઉપસ્થિત રહ્યા હતા.